1 I ngana deyida ku angel numi danthu nanhthi trumpet nukunu, 5 warda mam ku angel nhini-yu. I bamkardu warda ngay-yu nanhthi pilinh dimmat thangunu pirridha ngarra putek ngala kanhi. I kardu numi kathu damnamut nanhthi ki ngarra nanhthi pilinh-nu nhini-ka padharlnu da weyi pewerti pangkuy ngala nimin-ya, nanhthi ngarra weyi mere beyebirr ku-ya.

2 I bere nanhthi pilinh nhini-ka nanhthi ki-re dantharl warda ngarra da weyi ngala nhini-yu i bere warnak ngala da matha yunganawuydha dini i nanhthi ngunga-ka damkap da matha nhini-yu.

3 I ngarra warnak nhini thangunu kathu-ka ku thalarrithay punganawurrdha purni i puddanathutthuttha purni ngarra da putek ngala kanhi-nu. I kardu numi kathu dampirramut nanhthi lurruth i nanhthi mawuye nginipunh ku dalmarnti mani kardu-nu pannerdenu puru. 4 I nukunu nhini kathu-ka mampirra, “Nga. Mere nukun narnimurrk nanhthi parnu i nanhthi mulurn-yu, mu kardu da matha nannerdenu nuru i yidingurr narramutmutnu nuru kardu pana da matha ngarra mere ngadha kumabath kuru nanhthi magim ngarra Yile neki nukunu ngarra wulumu pigunu-ya. 5 Kardu nhini da matha nannerdenu nuru-yu nginipunh ku dalmarnti mani i yidingurr ngala narramutmutnu nuru da merrk 5-nu da matha, mu mere nukun nurduntinuminumi nuru.” 6 I ngarra da merrk 5 nhini-re-ka kardu-ka yidingurr ngala da matha pumabathnu puru i nhini-ka kardu warda marda pumartnu puru puruwuwupnu. Mu wurda, mere warda kurruwuwup nukun.

7 Ku thalarrithay nhini-ka mangini ku nintu mani mardaparl pidha thu kuy-nu. Ku-ka nanhthi pumenawedhaththa pi mangini nanhthi crown mani nanhthi damlarrang-ya. I kamarl pigunu-ka nginipunh kardu mani pumedha pi. 8 I nanhthi pemarr-ka pangkuy nginipunh kardu palngun mani pumebaththa pi-yu. I dimu-ka ngala-wa mangini ku lion mani. 9 I nanhthi mangini steel mani pubanardurdidha pi-yu ngarra marda, thamul bamardabinu. I murrirr pigunu-ka pubewinhitputtha pi nginipunh ku nintu i chariot mani pumpan thu kuy-nu. 10 I miyernu pigunu-ka nginipunh ku dalmarnti mani pumedha pi. I nanhthi lurruth i nanhthi mawuye pumebaththa pi ngarra miyernu kardu-nu pannerdenu puru i yidingurr ngala parramutmutnu puru da merrk 5-nu-ya.

11 I ku pule ngala ngarra ku thalarrithay nhini-ka murrinh nukunu-ka nan-wa Abaddon murrinh Hebrew-ya i nan-wa Apollyon murrinh Greek-yu. Murrinh kanhi-nu-ka kardu murlak thathpirr-wa murrinh-yu. Nukunu-ka ku angel wiye-wa i nukunu ku-ka pule ngala ngarra da weyi pewerti ngala nhini nukunu. 12 Da nhini-re ngarra ku thalarrithay yidingurr ngala parranirramutmuttha purni ngarra kardu-ka, da-ka nhini-ka da wiye ngala kumparra-wa. Mu da wiye perrkenku deyida kathu kurrannintha kardu-nu-yu.

13 Bere ngana deyida ku angel numi danthu nanhthi trumpet nukunu, 6 warda mam ku angel nhini-yu. I ngay-ka binthepup murrinh ngerren ngarra da tikune 4 ngarra altar thangunu, da altar damlarrang pana-ya ngarra kumparra warra pirrim ngarra Yile neki-yu. 14 Murrinh ngerren nhini mamna ngarra ku angel ngarra trumpet danthu. I mamna, “Nga. Thurdunkurerethterethneme ku angel 4 pana ngarra pumampunkudharrkirrkneme ngarra ngipilinh da nan Euphrates i thurdunkuthuk-warda-neme.”

15 I bere ku angel nhini ngarra nanhthi trumpet danthu-ka wurdanpunkurerethterethneme ku angel 4 nhini. Ku 4 nhini-ka pumenuwathawathadhaneme pe thu-nu i pirrinemardamardadhaneme da nhini-nu-re ngarra ku angel numi nhini wurdanpunkurerethterethneme. I bere wurdanpunkurerethterethneme thangunu-ka ku angel 4 nhini-ka purnedha-warda-neme kardu-nu thu punkuthuknemenu puru, kardu terert tharrngini-ya.

16 I ku soldier wurnangat da matha wanku purnidha ku nintu wanku. I ngay-ka binthepup kardu thangku numa kardu-yu, kardu-ka 200,000,000-wa.

17 I ku nintu nhini i kardu pana purninganardarridha-ka ngarra ngay-re bamkardu da nirn-te-ka mangini kanhi mani-wa. Kardu i ku nintu pubanardurdidha purni-ka nanhthi steel ngarra marda pigunu nanhthi bukmantharr nginipunh thungku mani, i blue i yellow. I ku nintu pelpith-ka nginipunh ku lion mani pelpith. I ngarra thathpi thangunu kathu-ka thungku i warnak yunganawuydha wurrini-yu, i warnak kangunu wiye wanku. 18 I kardu wurnangat nimin-ya purniwuwuptha ngarra thungku i warnak ngarra ku nintu thathpi thangunu yunganawuydha wurrini-yu. 19 Ku nintu-re-ka purninthuktha ngarra kardu thu thathpi-re-yu. I miyernu pigunu ku nintu-ka mangini ku pangkuy mani wunku pelpith, i ku pelpith pangkuy nhini-ka pubenleledha purni kardu i yidingurr parrinirramutmuttha purni.

20 Mu kardu ngamere nhini ngarra mere puyinthuktha ngarra thungku i warnak ku nintu thathpirr thangunu-re-ka, kardu bere ngatha wangu da mange wiye pumerithuktha pardi. Kardu-ka mere parniparttha da mange wiye nhini-yu i mere puddananawurldha ngarra Yile neki-nu-yu, wurda da matha. Mu kardu bere matha wangu parranirrariwaktha pardi ku ngepan wiye wiye. I nanhthi bere ngatha wangu pumewathadha pardi nanhthi Kangkarlmawu thirrukduk nanhthi gold one-ya, nanhthi silver one-ya i nanhthi bronze one-ya, i nanhthi thay thangunu-ya i nanhthi palyirr thangunu. Nanhthi nhini-ka mere ngarra karnibirlbirl i mere ngarra kubiyepup i mere ngarra karningerren, mu nanhthi-ka ngala ngala pubuniwakpaktha purni i pubanarrawaththa purni i puddanarrayemittha purni nanhthi nhini-nu-yu. 21 I kardu nhini da ngatha-ka mere deyida parniparttha da mange wiye terert warda ngatha. Mu kardu-ka bere ngatha thu puyenanuthuktha pardi i nanhthi yerrernti-re pirinureldha pardi i purninumatkuttha palngun i nugarn karnabuy purnimatkuttha i darrarart pumenangkardarrararttha pardi.