1 Nehn en Jesus kadoarihla Ah padahk oang pokonno, Ih inla Capernaum. 2 Laplap in jounpei in Rome men mine wijahu ah lidu men ma johmwehu koalik enken oar mehdi. Lidu mene inenin kajampwal ipen koaun in jounpeiho. 3 A nehn en koaun in jounpeiho rongda doahr Jesus, ih kadarla laplap in Jew pwi pwa en poaki Jesus en indoa kemwehuwihla nah liduhwo. 4 Mihn Jew‑ok inla ipen Jesus poaki in ngidngid en inla, pwa, “Woal mene koanoahng oaloa kalahngan, 5 pwa ih kin ipwilki sohn asai wei, apel pein koudahng kisai oau jinakoke.”

6 Doari, Jesus ken pwilihla irai. A nehn Ah ne koaroanlahng ummwo, laplap in jounpeiho kadarla koampoakpah pwi pwa irai en pwehng Jesus, “Maing, koawoa en joah koakoahkihla oamw indoa pwa ngoahi johpwa warroang kadilihda koawoa nehn umwoaie; 7 ngoahi pel johpwa warroang alwe ipoamw. Koawoa en pwen lal oar, a noai liduhwo ken sihkeida. 8 Pwa ngoahi armaj men ma ne mine pehn koaun pwi, ngoahi pel koaunda jounpei pwi. Nehn oai kin pwehng emen irai, ‘Alwe,’ a ih kin inla; oang emen, ‘Indoa,’ a ih kin indoa; a oang oai lidu, ‘Wiahda me,’ a ih kin wiahda.”

9 Nehn en Jesus rongda mehpwiak, Ih ken pwuriamweikihla, jipwoallahng pokonno ma pwilpwilihwe Ih, Ih pwehnglahng irai, “Ngoahi kahjik kidalda uhwen koalik in pwojon oauwe, pel joh nehn Israel.”

10 Iraihok ma ne koadoaddoarla japahldo in ummwo, kidalda pwa liduhwo ne sihkeida.

11 Mwerin anjoau kij, Jesus inlahng kahnihmw oau ma adanki Nain; Nah sohnpadahkkok apel pokon koalik oau pel pwili Ih. 12 Nehn Ah koaroanlahng wanihmw in kel in kahnihmmwo, a kapar in mehdi oau allaluhdo jang loaloa. Armaj mehdiho, nihn liohdi men nah jeri iehroj, ma ihr wahwahla likin, armaj dir pwi ma pwili liohdiho. 13 Nehn en Koaunno kapangda liohdiho, Ih ipwilkihda pwehng, “Li, joah joang.” 14 Ih ken sohlahng ipen jepjeppo kihdahng poah puwoa, a iraihok ma wa jepjeppo ken uhdi. Jesus pwa, “Mwahnkapw! Pwohrda!” 15 Nehn anjoauwohr armaj mehdiho pwohrda sapda lallal. Jesus kapwurihlahng inahu.

16 Irai ohroj inenin majpwehkda, irai kapkapnga Koahs pwahpwahpwa, “Joukohp laplap men ne pwokda nehn pwungasai,” irai pwa “Koahs ne indoa pwa en koamoaurla Nah armaj ohroj!”

17 Rong in en Jesus manman oauwe lohkjili nehn wija ohroj nehn Judea apel nehn jappwok ma pidekihpene.

18 Nihn John sohnpadahkkok kajalehioang ih doahroar mehpwiai ohroj. John ken pangindo nah sohnpadahk roahmen 19 kadarlahng ipen Koaunno pwa ira en idoak, “Ioar koawoa ma John pwa pirin indoa, ke kamai en joujowi oar emen sohrohr?”

20 Nehn ara lel ipen Jesus, ira pwehng Ih, “Maing, John jounpoapdaij ma kadardo kama en kalelpoak ipoamw ma ioar koawoa ma pirin indoa, ke kamai en joujowihoar emen sohrohr?”

21 Nehn anjoauwohr Jesus pel kemwehuwihla armaj dihrdir jang ahr johmwehu kan, jasihkei kan, ngen jaus kan, apel kapoahdpijoang mijen armaj majkun dir. 22 Ih japoang, “Kamwa pwurwe pwehng John da ma kamwa ne kapang apel rong; doahroar en majkun kan ahr ne kak kapangda wija, doahroar ihr ma johkak alu ne kak alu, ihr lepa kan ne mwakelkelda, doahroar ihr ma pongpong ne rongda wija, ihr ma mehdi kan ne mourda, apel doahroar Rongmwehu kin kalohk oang ihr ma joamwoahmwoa kan. 23  Meid pai armaj men ma johkin jakoapwoarpwoarki Ngoahi!”

24 Mwerin nihn John jounwijik pakairrok ne inla, Jesus sapda kadehde oang pokonno doahroar John, Ih pwa, “Nehn amwai inlahng ipen John nehn japwsoahnno, dahkij kamwai nimen kapang? Alek pas ma kin jahjahjahkkihjili eng? 25  Da kamwai inlahng kapang? Armaj men ma mine nehn likkoau mwehu? Joangoan armaj ma kin mine nehn likkoau mwehu kan apel anki dir in koapwoa kin diarek nehn Umwen Nahmwarki kan. 26  A, dahkij kamwai nimen kapang? Joukohp men? Eh mehlel, kamwai en kapang pwa ih laplap jang joukohp men. 27  Pwa ioar John ma ne insingdi doahroar ih nehn Puk Joarwi, ‘Koahs pwa, Ngoahi pirin kadarwe Noai jounpakairro mwohn Koawoa, ma pirin koaunopda allo mwohn Koawoa.’ ”

29 Armaj ohroj apel jounrik daksissok ne rong Jesus, ioar irai ma peikkoang Koahs apel oaloa poapdaij ipen John. 30 A Pharisee‑ok apel jounpadahk in Kojonneddok ioar irai ma kajohwe Koahs nehn arai johpwa nimen poapdaijla ipen John.

31  “A dahkij Ngoahi pirin karjahkihoang armaj in anjoau oauwe? Dahkij irai en doahroar? 32  Irai doahroar jerihkan ma kin ummwummwoais wijahn noasnoas kan. Oau pwihn kin rahrahu pwehpwehpwehnglahng oau pwihn, ‘Kamai koajkoajoang in malau oang kamwai, a kamwai johpwa nimen kahlek; kamai koaulki koaul in injinjuwed in mehdi oang kamwai, a kamwai johpwa nimen joang!’ 33  Pwa nehn en John jounpoapdaij ah indoa ih kin wia kaijihjol apel johpwa nim wain, a kamwai kin pwa, ‘Ngen jaus dilingla ih.’ 34  A Nihn‑Armaj ne indoa mwinge apel nim wain, a kamwai pel pwa, ‘Kapang woal mene! Oawoan mwinge apel mumki wain, pirienki jounrik daksis apel armaj jekenken kan!’ 35  A, en Koahs erpis kin janjalkihda Nah kan ohroj ma oaloahda.”

36 Pharisee men pangin Jesus en pwili ih mwinge in umwahu. Jesus inla in umwahu mwindi oang mwinge. 37 A lihmen mine nehn kahnihmmwo ma anki mour in dihp. Ih rongda pwa Jesus pwili mwingmwinge nehn umwen Pharisee‑o, ioar ih wahkihdo rumehn le karahdin oau. 38 Ih mwindi likinjarkin Jesus ipen pwoalkoa, ih ken joang, pilen mijoa dundundihoang pohn pwoalkoan Jesus, ih limwihki pisen moange, kiski pwoalkoa kan apel salipki lehu pwoalkoan Jesus‑ok. 39 Pharisee‑o ma lukehdo Jesus, nehn ah widahli me, ih pein pwahla nehn kapehdin, “Ma uhdahn joukohp men woal mene, Ih pirin kidal inje lihmene ma pukpukkoang Ih; Ih pirin kidal joangoan mour in dihp ma ih kin wihwia!”

40 Jesus pwehng ih, “Simon, mine mehkij ma Ngoahi nimen pwehng koawoa.”

Simon japoang, “Maing, Jounpadahk, pwehng ngoahi.”

41 Jesus pwa, “Armaj roahmen mine ma pwaipwaniddoang woal men. Emen in ira pwaipwanidki mwani silper limepwki, a emen mwani silper limeijek. 42  Joh ara mihn koapwungla ara pwaipwaniddok, ioar mehwa woallo mahkoahngki ira. Doari, menlau japoang Ngoahi, inje in ira ma ah limpoak koalik oang woallo?”

43 Simon japoangkihla Jesus, “Ngoahi lemleme pwa armaj ma oaloa mahk koalik ipen woallo.”

A Jesus pwa, “Oamw pajpoangen pwung.” 44 Ih jipwoallahng liho, ih pwehnglahng Simon, “Koawoa en kapang da lihmene wia? Nehn Oai indoa in umwoammwe, koawoa johpwa kioang Ngoahi pil mihn Ngoahi en duhpki pwoalkoaioa kai, ah ih duhpkihla pwoalkoaioa kai pilen mijoa apel dahlimwihkihda pisen moange. 45  Koawoa joah misik Ngoahi in doahroar asai rahnmwahu in popohl, a ih johpwa uhdihjang ah mismisik pwoalkoaioa kai jang nehn Oai dildahdo. 46  Koawoa johpwa salip Ngoahi, ah ih salipkihla pwoalkoaioa kai le karahdin. 47  Doari, Ngoahi pwehng koawoa en kidal pwa ih ne oaloa mahk in dipoa kan ma inenin dir, pwa jang ah limpoak koalik. Pwa ma ih ma pirin oaloa mahk siksik in dipoa kan, ah limpoak kin siksik.”

48 Jesus pwehnglahng liho, “Dipoamw kan ne lapwda.”

49 A iraihok ma pwili mine in sehpil in mwingehu sapkihda pwahpene nehn pwungarai, “Inje woalmene ma pel kin lapwadda dihp kan?”

50 Jesus pwehnglahng liho, “Oamw pwojon ma koamoaurla koawoa, alwe nehn popohl.”