4
Jesus Jongjong nehn Japwsoahn
1 Jesus pwurdo jang Jordan, dirkihla Ngen Joarwi; Ngennohr pel kahlwahla ih nehn japwsoahn, 2 wija ih minminehki rehn pahijek, kajongjong pehn Jehsen. Oaroain rehnnok ih joah mwinge, kahrehda rehn pahijekko doarihla ih mwakohkohda.
3 Jehsenno pwehnglahng, “Ma koawoa ioar Nihn Koahs, a koawoa en pwehng sakai oauwe en wiahla pilahwa.”
4 A Jesus japoang, “Ne insingdi nehn Puk Joarwi pwa ‘Jaudi pilahwahr doari ma armaj kak mourki.’ ”
5 Jehsenno pel uklahng Ih wija illoa oau apel kajalehioang wein jampah ohroj nehn marip oau, 6 apel pwehng Ih, “Ngoahi pirin kioang koawoa joangoan manman ohroj apel lingin wei pwiai ohroj. Pwa ohroj ne liklikoang ngoahi a ngoahi kak kioang inje ma ngoahi kak kioang. 7 Ohroj mehpwiai pirin oamw ma koawoa poardi pwongi ngoahi.”
8 Jesus japoang, “Ne insingdi nehn Puk Joarwi pwa, ‘Pwongi Koaunno oamw Koahs, papah ih kalahpwuk.’ ”
9 Jehsenno pel uklahng ih Jerusalem kihdahng ih pohn wija ma keiou illoa pohn koadkoan Umw Joarwiho, pwehng ih, “Ma koawoa ioar Nihn Koahs wa, a koawoa en lujdihwe jang me. 10 Pwa ne insingdi nehn Puk Joarwi: ‘Koahs pirin ruwoj nah sohnloanngok, irai en apwali mwehuwi koawoa, 11 apel kolkihda koawoa poahrai pwa ehmmwen kan en joah ohla pohn sakai.’ ”
12 Jesus pel japoang, “Ne pel insingdi ‘Koawoa en joah kajongjongi Koaunno, oamw Koahs.’ ”
13 Jehsenno koarjoahla ah kajongjong ohroj oang Jesus, ih injang Ih anjoau kij oaroh pel lel oaroain anjoau kij.
Jesus Sapkihda Ah Doadoahk nehn Galilee
14 Jesus japahldohng Galilee manman in Ngen Joarwi mine ipoa. Rongin Ih lohkjili nehn wija ohroj. 15 Ih kin padahk nehn arai jinakoke kan, armaj ohroj kin kapkapnga.
Mihn Nazareth kan lioassoangda Jesus
16 Jesus inla Nazareth, wijahu ma Ih sikda, Ih inla nehn jinakoke oau rehnin Sabbath doahroar Ah siahk. Ih uhda pwa Ih en wadek Puk Joarwi. 17 Pukin joukohp Isaiah ma irai kioang. Ih wilikpijoang pukko wadekda wijahu ma siksikoa,
18 “Ngenin Koaunno audohda Ngoahi
Ih ne kajarwihla Ngoahi
pwa Ngoahi en lohkihoang armaj joamwoahmwoa kan rongmwehu.
Ngoahi en lohkihoang armaj joaldi kan ahr jaldek
apel jaldek oang arai kan ma minmine nehn kalpwuhj
apel kapoahdpijoang mijen ihr majkun kan,
apel kajaledekla iraihok ma mine nehn apwal,
19 apel kalohkihda pwa anjoauwo ne leldo, ma Koaunno pirin koamoaurla nah armaj kan.”
20 Jesus wilikpene pukko kioang papah men. Ih mwindihoang nehn dohiahu. Armaj ohroj nehn jinakokehu ken kakili ih. 21 Ih sapda pwehng irai, “Rehn oauwe iren Puk Joarwi ne pwoaida doahroar amwai ne rong ah wadwadda.”
22 Ihr ohroj kadehde apel pwuriamweikihla lal mwehu kan ma Ih pwa, “Jaudi ih nihn Joseph jermwein wa?”
23 Ih pwehng irai, “Uhdahn kamwai pirin pwehng ngoahi loapin lal oauwe: ‘Doahksoa pein kemwehuwihla koawoa.’ Apel kamwai pirin pel pwa, ‘Joang kapwuriamwei ohroj ma kemi ne rong pwa koawoa ne wiahda nehn Capernaum, a koawoa en pel wiahda nehn uhdahn oamw wija.’ ” 24 Ih pel pwa, “Ngoahi pwehng kamwai in mehlel, pwa johpwa joukohp men kin kenken nehn ah wija ipen kijeh kan. 25 Mehlel pwa mine liohdi dir Israel nehn mwein Elijah, anjoauwo ma johla wud oaroain johnpar jiluh oaloap apel lehk koalik lel oang jappwo pwon. 26 A johpwa emen irai ma Elijah inla ipoa, a oang oar liohdi men ma minmine Zarephath nehn Sidon. 27 Pel nehn mwein joukohp Elisha dirin armaj lepa mine nehn Israel; a johpwa emen in irai mwakelkella, ioarroar Naaman mihn Syria.”
28 Armaj ohroj nehn jinakokehu inenin lioas nehn ahr rongda lal pwiai. 29 Irai uhdahr warahkihla Jesus jang nehn kahnihmmwo wahdahlahng Ih pohn dollo ma ahr kahnihmmwo kokouda puwoa pwa irai en jinoakla Ih. 30 A Jesus alu nehn pwungarai inla jang irai.
Woal men ma Ngen Jaus Dilingla
31 Jesus allaluhlahng Capernaum, kahnihmw in Galilee oau; Ih ken padahk oang armajjok rehnin Sabbath. 32 Armaj ohroj ken pwuriamweikihla mwomwen Ah padahk, pwa Ah lal kan kin manman. 33 Mine woal men ma pwili mine nehn jinakokehu, ma ngen jaus dilingla ih. Ih rahrahu koalik pwahla, 34 “Ah! Jesus mihn Nazareth, da koawoa nimen wiahng kamai? Koawoa indoahng koauwehla kamai! Ngoahi kidal pwa inje koawoa; Koawoa ioar Nihn Koahs jounpakair joarwihwa!”
35 Jesus ruwoj ngen jausso, “Nennenla, diljang nehn armaj menen!” Ngen jausso peiddi woallo mijarai ohroj, diljang nehn ih, apel johla wiahng woallo me nauna.
36 Ihr ohroj ken pwuriamweikihla pwahpene nehn pwungarai, “Dahkij mine nehn en woal mene ah lal kan? Pwa Ah lal sihkei apel manman oang ngen jaus kan, a irai kin peikkoang!” 37 Rongin Jesus ken lohkla wija ohroj nehn jappwo.
Jesus Kemwehuwihla Armaj Dihrdir
38 Jesus injang nehn jinakokehu allaluhlahng in umwen Simon. Inen pahien Simon‑o onohnki nehn ummwo ki johmwehu karkar koalik. Irai pwehng Jesus en jeuweje liho. 39 Jesus ken sohla ipoa apel ruwoj karkarro. Karkarro injang ipen liho, ih ken pwohrda apwali arai.
40 Injoausikdi, armaj ohroj ma mine nihrai armaj johmwehu joah lipilpil wijikdohng ipoa; Ih kihdihoang poah kan pohrai ohroj kemwehuwihla irai. 41 Ngen jaus kan pel kin injang ipen armaj dir ma kin rahrahu pwahpwahpwa, “Koawoa ma Nihn Koahs!”
Jesus lipwoarehda irai apel johpwa nimen mweidoahng irai en lallallal, pwa irai kidal pwa ioar Ih ma Messiah.
Jesus Kapahrakki Rongmwehu nehn Judea
42 In ah rehnpijoang Jesus injang nehn kahnihmmwo inla kalahpwukla wijahkij. Armajjok sapda raprapahkihjili; nehn ahr kapangda Ih, ihr engdehnkihoang Ih en joah injang iparai. 43 Ih pwehng irai, “Ngoahi uhdahn pirin pel kapahrakki rongmwehuin in Wein Koahs oang kahnihmw kan, pwa ioar mehwa ma Koahs kadarkihdo Ngoahi.”
44 Ih ken kapkapahrakjili nehn jinakoke kan nehn Judea.
This is a DRAFT translation. Please email comments and suggestions for improvement to peter_knapp at sil dot org, giving the translation, book, chapter, verse, current reading, and suggested reading.