1 Mwerin mehpwiai, Jesus wudla Oaloap Lehn Galilee (ke Lehn Tiberias). 2 Doari, pokon koalik oau kaujla, pwa irai ne kapang kilel manmannok ma Ih wiahng armaj johmwehuwok. 3 Jesus indahla pohn dol oau apel mwindihoang wijahu, pwilihkihla Nah sohnpadahkkok. 4 Joarwihn Passover in mihn Jew‑ok ne koaroando. 5 Jesus ken jipwoalla kapangda pokon koalik oau ma allaluhdohng ipoa, Ih ken pwehng Philip, “Ia wija kisai kak dupuk jang mwinge ma en isarroang kamwingehla armaj pwiai ohroj?” 6 Ih pwahla mehpwiai pwa en jong Philip, pwa pein Ih kidal dahkij Ih pirin wia.

7 Philip japoang Ih, “Oang joangoan dir oauwe, ma emenemen pirin kangla ekijjoar, kisai nen anahne mwani silper* Mwani silper: Me ioar uhwen dupukoan sohndoadoahk men rehn oau nehn anjoauwo. 200 (riepwiki).”

8 Emen Nah sohnpadahk, Andrew, rien Simon Peter, pwehng Jesus, 9 “Jermwein siksik men mine me, ma wa lopwonin pilahwa limoau ma wiawihda jang wehn parli apel mwumw roahmen. A nen pwen uhdahn johpwa isar oang armaj pwiai!”

10 Jesus pwehng irai, “Kamwai kamwindihdi irai.” Wijahu dirkihla mo. Armaj ohroj mwindi, woalloar doari dapwa 5,000 (limekid). 11 Jesus ken oaloa lopwonin pilahwahk, kapingkihoang Koahs, apel nehk oang irai ma ne mwindihok, pel doahroar mwummwok, irai mwinge oaroh ken moad. 12 Nehn irai ne moad, Ih pwehng Nah sohnpadahkkok, “Kamwai rikda luhwoahkan, pwa joh ekij en luhjla mwahl.” 13 Irai ken rikpene luhwoahk ohroj, irai audohkihda pwuko eijek riau luhwen pilahwa jang in lopwon in pilahwa limoauwo ma ihr ne kangla.

14 Nehn armajjok ma mine wijahu irai ne kapang kilel oauwe ma Jesus ne wiahda, irai ken pwa, “Mehlel, Woal mene ioar Ih Joukohpwa † Joukohpwa: Soahk 1.21. ma pirin indoahng jampah!” 15 Nehn Jesus Ah kidalda pwa irai pirin indoahng oaloa ih, pwa irai en ipong oang Ih en wiahla nahmwarki, Ih ken dillahjang irai indahlahng pohn dollo kalahpwukla.

16 Nehn ah joausikpene, Nah sohnpadahkkok indihlahng nehn lehu. 17 Irai ken doauda pohn pohs oau, apel kosehla lehu pwurlahng Capernaum. Doari, ne pwongihdi, a Jesus kahjikkoar lellahng iparai. 18 Anjoauwo inenin koalik eng, apel mwoakidkid nehn lehu. 19 Nehn sohnpadahkkok irai jeijeijeiki dapwa mwail jiluh ke pahu, irai kapangda Jesus Ah allaluhdo — pohn pillo, nehn Ah koaroandohng wararai pohsso, irai ken majpwehkda. 20 Ih pwehng irai, “Ngoahi me, kamwai joah majpwehk.” 21 Irai ken perenda kajamwo Ih oang pohn pohsso, apel nehn anjoauwohr pohsso lel in oaroahrro, wija ma irai jeijeilahng.

22 Rehnwa mwerin, pokonno ma mine oaloap lehu kapang pwa pohs passoar mine wijahu. Irai kidal pwa Jesus johpwa pwili Nah sohnpadahkkok doaudahng pohn pohsso, irai kijoujang Ih. 23 Pohs pwi jang Tiberias pel kijkijoulahng in oaroahr oau ma koaroandohng wijahu ma pokonno kangla pilahwahk ma Koaunno kapingkalahnganki. 24 Doari, nehn anjoau ma pokonno kapang pwa Jesus apel Nah sohnpadahkkok joah mine wijahu, irai ken dakoahda pohs pwi apel inlahng Capernaum, pwa irai en rapahki Jesus wijahu.

25 Nehn anjoauwo irai kapangda Jesus oaloap pillo, irai idoakkoang, “Maing Jounpadahk, ngehd koawoa lel me?”

26 Jesus japoang irai, “Ngoahi pwehng kamwai in mehlel: kamwai raprapahki ngoahi pwa kamwai ne kang pilahwahk apel moadkihla, jaudi jang in amwai woahwoahki kilel manman kan. 27  Joah doadoahk oang mwinge ma kin mwelingla, a doadoahk oang mwinge ma kin kioang kamwai mour joahsuk. Ioar mwingehioauwe ma Nihn‑Armaj pirin kioang kamwai, pwa Koahs Jahm ne kioang Ngoahi kilel in kadehdehda doahroar Ah pwungki Ngoahi.”

28 Irai ken kalelpoak ipoa, “A dahkij kamai en wia pwa kamai en kapwaihahda doadoahkko ma Koahs koajoanehdi?”

29 Jesus japoang irai, pwa, “Me ioar doadoahk wa ma Koahs nimen kamwai en wia: pwojon Ih ma Ih kadardo.”

30 Irai pel japoang, “Kilel da ma koawoa pirin wia, pwa kamai en kak kapang apel pwojonla koawoa? Dahkij koawoa pirin wia? 31 Jamamwai koalikkok ne kangla manna nehn japwsoahnno, ma doahroar Puk Joarwi pwa, ‘Ngoahi kihdihdohng irai pilahwa jang nehnloannge pwa irai en kang.’ ”

32 Jesus pwehng irai, “Ngoahi pwehng kamwai in mehlel: jaudi Moses ma kioang kamwai pilahwa jang nehnloannge, a Joamoaiho, ioar Ih ma kihdihdohng kamwai pilahwa mehlello jang nehnloannge. 33  Pilahwahu ma Koahs kihda, ioar ma indihdo jang nehnloannge apel kioang mour oang jampah.”

34 Irai pel poaki Ipoa, “Maing, kihdoahng kamai pilahwa oauwe anjoau ohroj.”

35 Jesus pwehng irai, “Ngoahi ma pilahwahn mour. Ma emen ma kin indoahng Ngoahi johla pirin nimen mwingehda, a ma emen ma kin pwojon Ngoahi johla pirin nimen nimpilda. 36  Ngoahi ne pwehng kamwai pwa kamwai ne pwen kapang Ngoahi a kamai pwen johpwahr kamehlele. 37  Iraihok ohroj ma Joamoaiho kioang Ngoahi pirin indoa Ipoai. Emen ma indoa Ipoai Ngoahi jehpirin kajpahlihla. 38  Pwa Ngoahi indihdo jang nehnloannge pwa Ngoahi en kapwaihahda kupwuren Ih ma kadardo Ngoahi, a jaudi pwa Ngoahi en wia injenoai. 39  A ioar kupwuren Ih ma kadardo Ngoahi: Ngoahi en joah kajoaloangehla emen jang nehn ohroj ma Ih ne kihdoahng ngoahi, a Ngoahi en kamourihda ohroj imwin rehnno. 40  Pwa me ioar kupwuren Joamoaiho: irai ohroj ma jipwoallahng Nahu apel pwojon, irai nen anki mour joahsuk, a Ngoahi pirin kamourihda irai imwin rehnno.”

41 Mihn Jew‑ok sapda lipahnede Ih pwa Ih pwa, “Ngoahi ioar pilahwahu ma indihdo jang nehnloannge.” 42 Irai ken pwa, “A jaudi Jesus me, ma nihn Joseph? Kamai kidal jamahu apel inahu. A imdoahr Ih kak pwa, ‘Ngoahi indihdo jang nehnloannge?’ ”

43 Jesus japoang irai, “Kamwai joah lipahned nehn pwungamwaikan. 44  Joh emen kak indoa ipoai, ma Joamoaiho ma kadardo Ngoahi joah kadardohng Ngoahi; a Ngoahi pirin kamourihda imwin rehnno. 45  Joukohppok ne insingehdi, ‘Irai ohroj pirin oaloa padahk jang ipen Koahs.’ Emenemen ma rong Jahmmo apel padahk jang, ih kin indoa Ipoai. 46  Me johpwa woahwoahki pwa emen ne kapang Jahmmo; ioarroar Ih ma indoa jang ipen Jahmmo, ne kapang Ih. 47  Ngoahi pwehng kamwai in mehlel: emen ma kamehlele, anki mour joahsuk. 48  Ngoahi ioar pilahwahn mour. 49  Jamamwaihok kangla manna nehn japwsoahnno, a irai mehdi. 50  A pilahwahu ma indihdo jang nehnloannge, ma emen ma pirin kang, ih jehpirin mehdi. 51  Ngoahi ma pilahwahn mour ma indihdo jang nehnloannge. Ma emen pirin kang pilahwahioauwe, Ih pirin mour allaluhla. Doari, pilahwahu ma Ngoahi pirin kihda, ioar udukoaihoa, ma Ngoahi kihda pwa jampah en mourkihla.”

52 Me kahrehda en mihn Jew‑ok irai lioas sapda akmaipene nehn pwungarai. Irai ken idoak, “Imdoahr Woal mene, Ah kak kioang kisai udukoa pwa kisai en kang?”

53 Jesus pwehng irai, “Ngoahi pwehng kamwai in mehlel: ma kamwai jehpirin kang uduk en Nihn‑Armaj, a nim insahn, a doar, joah mour nehn kamwai. 54  Ma emen ma kin kang udukoaihoa a nim insahi, ioar ih ma anki mour joahsuk, a Ngoahi pirin kamourihda ih in imwin rehnno. 55  Pwa udukoaihoa ioar uhdahn mwinge apel insahi ioar pilin nimpil mehlel. 56  Ma emen ma kin kang udukoaihoa a nim insahi, Ih kin oauwoang Ngoahi, a Ngoahi kin oauwoang ih. 57  Doahroar Jahmmo ma mour kadardo Ngoahi, a Ngoahi kin mour ki Ih, ioar doahr ma emen ma kin kang udukoaihoa pirin mour ki ngoahi. 58  Ioar me pilahwawa ma indihdo jang nehnloannge; jaudi joanngo ma jamamwai koalikkok ne kangla, a mwuhr irai mehdi. Ma emen ma kin kang pilahwa oauwe pirin mour allaluhla.”

59 Jesus pwa mehpwiai nehn jinakokehu, nehn ah kin padpadahkjili nehn Capernaum.

60 Doari, dirin Nah sohnpadahk ok rongda mehpwiai, irai pwa, “Padahk pase inenin apwal! Inje kak rong?”

61 Joh emen pwehng Ih, a Jesus, a pein ih kidal pwa Nah sohnpadahkkok lipahnedkihla doahroar mehpwiai. Ih pwehng irai, “Imdoahr, padahk oauwe kahrehioang amwai pwojon siksikla? 62  A imdoahr ma kamwai kapang Nihn‑Armaj ah pirin japahldahlahng wijahu ma Ih kin koaujoan mwohn Ah indihdo? 63  Ngenin Koahs ma kin kioang mour, a manman in armaj, ioar mehkij mwahl. Sikesik kan ma Ngoahi kin padahkihoang kamwai, dirkihla Ngen apel mour. 64  A epwi kamwai johpwa pwojon.” Pwa Jesus kidal jang in sapdahu inje nehn pwungarai ma johpwa pwojon, apel inje woallo ma pirin pangla Ih. 65 A Ih pel pwa, “Ioar kahrpoa oauwe ma Ngoahi ne pwehngkihoang kamwai pwa joh emen kak indoa ipoai, ioarroar ma Jahmmo mweidoahng.”

66 Pwa padahk oauwe, dirin sohnpadahkkok ne mweikijang apel johla nimen pwilpwil Ih. 67 Jesus ken idoakkoang irai eijek roahmenno, “A kamwai, kamwai pel pirin injang Ngoahi?”

68 Simon Peter japoang, “Maing, inje kamai en inla ipoa? Oamw lal kan, ioar lalin mour joahsuk. 69 Doari, apkas kamai ne kamehlele apel kidal pwa Koawoahr ioar ma Joarwi jang ipen Koahs.”

70 Jesus japoang, “Ngoahi ne pilda kamwai min eijek roahmen. A emen kamwai ioar ma lidu in Jehsen!” 71 Ih pwahkihla me pwa Judas, nihn Simon Iscariot; mihndahr ma ih emen in eijek roahmenno, a ih pirin pangla Jesus.