1 Pikinini, yu no ken stilim ol kaikai samting bilong ol rabisman. Na taim ol i lukluk strong long yu, yu no ken larim ol i wet nating. 2 Yu no ken mekim ol manmeri i hangre bai ol i wari moa, na yu no ken krosim ol manmeri i sot long ol samting. 3 Yu no ken hipim planti trabel antap long ol manmeri i gat hevi pinis, na sapos rabisman i singaut long wanpela samting yu no ken pasim. 4 Yu no ken givim baksait long tarangu i askim yu long wanpela samting, na yu no ken givim baksait long ol manmeri i sot long samting. 5 Yu no ken abrusim ol manmeri i sot long samting. Nogut ol i toknogutim yu. 6 Long wanem, sapos bel bilong ol i hevi tru long yu, na ol i toknogutim yu, orait bai Papa Antap i harim prea bilong ol.

7 Yu wokabaut long dispela pasin, orait ol manmeri bai i laikim yu. Yu mas daunim het bilong yu long ai bilong ol bikman. 8 Yu mas putim yau long tok bilong ol rabisman, na yu mas bekim gude bilong ol olsem yu save mekim long poroman bilong yu. 9 Yu mas kisim bek ol rabisman long han bilong ol manmeri i wok long mekim nogut long ol, na long kot yu no ken pret long skelim gut ol manmeri. 10 Lukautim gut ol pikinini, papa bilong ol i dai pinis, na sambai long mama bilong ol. Olsem na bai yu kamap pikinini bilong Bikpela Antap Tru. Tru tumas, mama bilong ol bai i laikim yu, tasol Bikpela bai i laikim yu moa yet.

11 Gutpela tingting i save givim biknem long ol pikinini bilong em, na em i lukautim ol lain i wok long painim em.* Gutpela tingting i olsem wanpela mama i skulim ol pikinini bilong em long ol gutpela pasin. 12 Ol manmeri i save laikim gutpela tingting, ol i laikim gutpela taim tu, na ol manmeri i kirap hariap long painim em, bikpela amamas bai i pulap long laip bilong ol. 13 Ol manmeri i holimpas gutpela tingting, ol bai i gat biknem, na Bikpela bai i mekim gut long wanem ples gutpela tingting i go long em. 14 Ol manmeri i litimapim nem bilong gutpela tingting, ol i litimapim nem bilong God i holi olgeta, na ol manmeri i laikim gutpela tingting, orait God i laikim ol tu. 15 Ol manmeri i harim tok bilong em, bai ol i kamap lida bilong ol pipel. Husat i putim yau long em, em bai i sindaun gut tasol. 16 Sapos ol manmeri i bilip long gutpela tingting, orait ol bai i kisim na holim em, na ol lain pikinini i kamap bihain ol tu bai i kisim em. 17 Pastaim gutpela tingting i save pulim ol manmeri i go nabaut long ol rot i krungut, na i mekim ol i pret na guria. Gutpela tingting i mekim save long ol long hatpela skul, inap long taim pasin bilong ol manmeri i kamap stret olgeta, na ol i strong pinis long bihainim ol gutpela skul bilong em. 18 Orait nau gutpela tingting i kamap long ol manmeri long stretpela rot, na i mekim ol i amamas, na i soim ol tok hait bilong em long ol. 19 Tasol sapos ol manmeri i paul, orait gutpela tingting i lusim ol, na i larim ol i go bagarap olgeta.

20 Long gutpela taim, yu no ken westim taim, tasol yu mas lukaut, nogut sampela kain trabel i kamap na bai yu sem. 21 Pasin bilong sem i save kamapim sin, tasol pasin bilong daunim yu yet bai i givim yu biknem long ai bilong ol arapela. 22 Nogut yu grisim ol arapela na yu yet yu lus, na dispela em i as bilong pundaun bilong yu. 23 Taim yu mas toktok, yu no ken pasim maus. 24 Long wanem, gutpela tingting i ken kamap ples klia long taim yu toktok, na maus bilong yu i autim save bilong yu. 25 Yu no ken giaman nabaut. Mobeta yu tokaut klia olsem yu no save long olgeta samting. 26 Maski sem long autim ol sin bilong yu, long wanem, yu no inap long pasim wara i ran. 27 Yu no ken putim yu yet aninit long ol manmeri i longlong, na yu no ken grisim ol manmeri i gat pawa. 28 Maski yu i dai, yu mas hatwok bilong mekim tok tru i win, na Bikpela bai i pait long helpim yu.

29 Yu no ken toktok na mauswara, na yu no ken slek na les long taim bilong wok. 30 Yu no ken singaut olsem laion insait long haus bilong yu, na yu no ken bikmaus long ol wokman na wokmeri bilong yu. 31 Yu Ap 20.35 no ken putim han bilong yu long kisim samting, na long taim bilong bekim, yu no ken pasim han bilong yu.