10
Jesus ramtungey tati wüdakuren
(Matew 19.1-12)
1 Jesus tripay ta Kapernaum waria mew, fey amuy Judea trokiñ mapu mew ka ti trokiñ mapu mülelu Jordan lewfü tañi tripawe antü ad püle. Tiye mew ka wiñome trawüluwi tati pu che, fey kisu eluwi tañi wiñome kimeltuafiel, femngechi wimtulelu am.
2 Fey kiñeke farisew fülkonpuy ta Jesus mew femngechi tañi entuüñfilafiel engün, fey ramtufi engün:
—¿Kümey am ñi wüdakureael wentru chem dungu mew rume?
3 Fey Jesus llowdungueyew:
—¿Chem werkün dungu am elueymünmew ta Moyse?
4 Kisu engün feypi:
—Moyse wüli ti werkün dungu tañi wüdangeael ta kure fey ñi elungeael ta kiñe wirin dungu tañi dew wüdangen.
5 Feymew Jesus ta feypieyew:
—Moyse ta femngechi feypikünuy tamün rume wesa yafü piwkengen mew ta eymün. 6 Welu llituka mew kom dewmangelu, ‘Ngünechen dewmafi ta wentru ka domo.’* Genesis 1.27 LXX. 7 ‘Feymew ta wentru wichuay tañi chaw mew ka tañi ñuke mew tañi wichu amayewael ñi kure engu,† Kiñeke kuyfi wirin mew ngelay: “tañi wichu amayewael ñi kure engu”. 8 fey mür kiñe che reke ñi feleael engu.’‡ Genesis 2.24 LXX. Fey tüfa famngechi epu che reke mülewetulay engu, fey kiñe che reke müten. 9 Fey ngelay tañi wüdamentumekeafiel Ngünechen tañi trapümel.
10 Dew müleputulu engün ta ruka mew, fey ti pu disipulu wiñome ramtufi ta Jesus fey tüfachi dungu.
11 Fey Jesus feypieyew:
—Tati wüdalu tañi kure fey ka domo kureyetule, ñiwaldomofengey ñi wüdafiel mew tañi wünen kure. 12 Fey tati domo kay wüdakünutule tañi füta, fey fütayetufile kangelu wentru, ka femngechi ñiwafengey.
Jesus ngillatuñmafi tati pichikeche
(Matew 19.13-15; Luka 18.15-17)
13 Yelelngey ta kiñeke pichikeche ta Jesus tañi fampuwülael ñi kuwü ta kisu engün mew, welu tati pu disipulu eluwi engün tañi katrütuafiel tüfey engün tati yeniefilu ti pu pichikeche.
14 Fey Jesus, ngüneduamfilu tüfachi dungu, lladküy ka feypifi ñi pu disipulu:
—Elufimün tati pichikeche ñi küpayael engün iñche mew. Katrütukefilmün. Tati pichikeche reke femngelu, fey engün koneltuley Ngünechen tañi longko ülmenngen mew. 15 Rüf dungu feypiwayiñ tati llownofilu kiñe pichiche reke Ngünechen tañi longko ülmenngen, konpulayay ta Ngünechen ñi mülewe mew.
16 Fey fülümtukupafi ñi lipang mew ti pichikeche, fey fampuwülelfi ñi kuwü ta kisu, fey ngillatuñmafi.
Kiñe ülmen wentru nütramkafi ta Jesus
(Matew 19.16-30; Luka 18.18-30)
17 Feymew Jesus amulerpulu tañi rüpütulen, lefkülen puwi kiñe wentru, lukunagpuy kisu tañi inafül ka ramtufi ta Jesus:
—Lif mongen kimeltufe, ¿chem chuman am tañi llowael tati rumel mongen?
18 Jesus ta llowdungueyew:
—¿Chem mew anta lif mongen pien? Kiñeley müten ta lif mongenngelu: Ngünechen llemay. 19 Dew kimimi tati werkün dungu: ‘Langümchekilnge, ñiwaldomokilnge, weñekilnge, üñfitukefilnge ta koylake dungu mew ta iney no rume, ngünenkakilnge rume, ka yamafimi tami chaw ka tami ñuke.’§ Exodo 20.12-16; Deuteronomio 5.16-20.
20 Fey tati wentru feypifi ta Jesus:
—Kimeltufe, kom tüfeychi dungu ta femken wechewentrungelu müten ta iñche.
21 Jesus leliwüleyew rume piwkeyen mew, fey llowdungueyew:
—Kiñe dungu ta petu femlaymi. Amutunge. Fendenge kom tami nieelchi chemkün ka elufinge tati nienolu chem rume. Femngechi ta nieaymi fütra küme felen ta wenu mapu mew. Fey wüla, fey nüaymi tami kürus,* Kiñeke kuyfi wirin mew ngelay: “fey nüaymi tami kürus”. küpange ka inayaen.
22 Fey ti wentru allkülu tüfachi dungu, rume wesa duami, rume rikulelu am.
23 Feymew Jesus adkinturupay wall püle, fey feypifi tañi pu disipulu:
—¡Rume küdawngeay ñi konpuael tati nielu fentren chemkün Ngünechen ñi longko ülmenngeelchi mülewe mew!
24 Fey tüfachi dungu ta rumeñma afmatulkafi tati pu disipulu, welu Jesus ka wiñome feypifi ñi pu disipulu:
—Pu weni, ¡rume küdawngey konpuael Ngünechen ñi longko ülmenngeelchi mülewe mew, feyti pu che maneluwlu ñi fentren chemkün mew!† Kiñeke kuyfi wirin mew ngelay: “feyti pu che maneluwlu ñi fentren chemkün mew”. 25 Doy küdawngelay ta kiñe kamellu ñi rumeael ti longko akucha mew, fey kiñe riku ñi konael Ngünechen ñi ülmen mülewe mew.
26 Femngechi allkülu ti pu disipulu, doy afmatulewey engün, fey welukonkechi ramtuwi engün:
—¿Iney anta pepi monturkeay?
27 Jesus ta leliwülfi ñi pu disipulu, fey feypifi:
—Che ñi pepilnoel, Ngünechen ta pepilniey. Kisu mew ta ngelay chem no rume ta pepilfalnolu.
28 Fey Pedro eluwi tañi feypiaetew:
—Iñchiñ ta elkünuiñ itrokom taiñ niekefel, fey inawiyiñ ta eymi.
29 Jesus feypifi ñi pu disipulu:
—Rüf dungu ta feypian iney rume fey iñche tañi duam ka tati werkün montuluwün dungu ñi duam elkünule ta ruka, kam peñi, kam lamngen, kam chaw, kam ñuke, kam domo,‡ Kiñeke kuyfi wirin mew ngelay: “kam domo”. kam fotüm, kam mapu, 30 welu fewla ta tüfachi mapu mew lloway doy pataka rupachi tañi niekefel ta ruka mew, peñi, lamngen, ñuke, fotüm ka mapu, tunte üyawtuniengeay rume. Fey tati we mületuachi mapu mew lloway tati rumel mongen. 31 Welu fentren che wüneltulelu, inaletuay. Ka fentren che tati pu inalelu, fey ta wüneletuay.
Jesus kimeli küla rupachi dewma tañi layael
(Matew 20.17-19; Luka 18.31-34)
32 Trekaley engün ñi amuael ta Jerusalen, fey Jesus ella wüne konküley tañi pu disipulu mew. Kisu engün ta afmatuley, ka tati pu inaleyelu llükaley engün. Jesus ka wiñome mütrümfi tañi wichudunguafiel tati mari epu disipulu, fey llituy tañi feypiafiel ñi rupayael ta kisu fey tüfachi dungu mew: 33 “Fey fewla amuaiñ ta Jerusalen, chew tañi chalintukungeael tati Wentrukünuwpalu ti pu longkolechi pu saserdote mew ka tati pu kimeltukelu Moyse ñi ley dungu. Fey engün ta kondenayaeyew ñi langümngeael ka chalintukungeay tati pu katripanche mew. 34 Ayentukangeay ta kisu, tofkütukangeay ka wülelkangeay ka langümngeay. Welu küla antü rupale, wiñomongetuay.”
Santiaw engu Juan fürenemuyu pifi ta Jesus
(Matew 20.20-28)
35 Santiaw ka Juan, Sefedew tañi epu fotüm, fülkonpuy engu ta Jesus mew, fey feypifi:
—Kimeltufe, fürenemuayu tüfachi dungu mew.
36 Fey Jesus ramtueyew engu:
—¿Chem dungun anta duamtunieymu?
37 Fey feypifi engu:
—Elumuyu tami fütra longko ülmen mülewe mew tayu mülepuael kiñe tami man püle, kangelu tami wele püle.
38 Jesus ta llowdungueyew engu:
—Eymu ta kimlaymu tamu feypipeel. ¿Ayüafuymu tamu kutrankawael ka tamu langümngeael chumngechi ta iñche ñi rupayael feychi dungu mew?§ ¿Ayüafuymu tamu kutrankawael ka tamu langümngeael chumngechi ta iñche ñi rupayael feychi dungu mew?: ¿Pepi putuafuymu kay tati füre pulku iñche tañi putuael ka tamu llowael ti fawtismo iñche tañi llowael? pin ürke.
39 Kisu engu ta llowdungufi ta Jesus:
—Femafuyu.
Fey Jesus ta feypieyew engu:
—Eymu kutrankawaymu ka langümngeaymu chumngechi ñi rupayael ta iñche feychi dungu mew,* Eymu kutrankawaymu ka langümngeaymu chumngechi ñi rupayael ta iñche feychi dungu mew: Eymu ta pepi putuaymu tati füre pulku, ka llowaymu tati fawtisangen iñche tañi llowael pin ürke. 40 welu tamu mülepuael iñche tañi man püle kam tañi wele püle iñche ta ngenngelan tañi ‘felepe’ ñi piael. Fey may ta elungeay ñi femael tüfey engün tati pu pepikanielel ñi puwam.
41 Feymew tati kakelu mari pu disipulu allkülu engün tüfachi dungu, lladkütufi engün ta Santiaw ka Juan, 42 welu Jesus ta mütrümeyew engün, fey feypieyew:
—Eymün kimnieymün tüfa tati pu judiu tuwünngenolu mew müley ta longko ülmenkülelu ka chem awtoridad rume nielu rume aporia ngünekaniekefi tati pu che chumngechi ñi ayüel, 43 welu ta eymün mew ngelay tamün femngechi femael. Ñi feleafel, tati küpa longkolelu kiñeke eymün mew, feley tañi rumel eluwküleael ñi poyeafiel ta kakelu. 44 Ka kiñeke ta eymün mew küpa wünenkülele, fey ta feleay ta kiñe kona reke ta kakelu mew. 45 Tati Wentrukünuwpalu rume am ta küpanolu tañi poyengeael, welu may ñi poyecheael ka ñi wülael tañi mongen ñi montulafiel ta rume fentren che.
Jesus tremolfi tati trawma Bartimew pingelu
(Matew 20.29-34; Luka 18.35-43)
46 Fey puwi engün ta Jeriko waria mew. Fey Jesus tripalepatulu tati waria mew, inaniepatueyew tañi pu disipulu ka rume fentren pu che. Fey mülerkey kiñe trawma limona pikelu, Bartimew pingelu, Timew ñi fotüm, anülelu ta inaltu rüpü. 47 Allkülu ñi küpalen ta Jesus Nasaret tuwlu, tati trawma eluwi tañi wirarael:
—¡Jesus, David mew tripachi Dullin Yomelche,† David mew tripachi Dulliñ Yomelche: tati pu judiu ñi üytukefelchi üy tañi tukulpayafiel ti tukulpakünuelchi Montulchefe David ñi yomelche ñi tripayael. kutranduamyeen ta iñche!
48 Fentren che ta feypieyew tañi ñüküfküleael, welu kisu ta doy wirari:
—¡David ñi Yomelche, kutranduamyeen ta iñche!
49 Feymew Jesus witrakünuwi, fey feypi:
—Küpalfimün.
Fey küpalngey tati trawma, feypilen mew:
—Yafüluwnge. Witrapürange. Petu mütrümeymew tati.
50 Fey ti trawma ütrüfentukünuy tañi takuwün, fey ringkülen fülkonpuy ta Jesus mew, 51 fey ramtueyew ta Jesus:
—¿Chem am duamnieymi ñi femael iñche ta eymi mew?
Fey tati trawma llowdunguy:
—Kimeltufe, ayülefun tañi wiñome pelotuael.
52 Jesus ta feypieyew:
—Amukatunge müten. Tami mupiltun mew ta dew tremotuymi.
Feychi lelen mew müten tati trawma pelotuy, fey inafi ta Jesus rüpü mew.
*10:6 Genesis 1.27 LXX.
†10:7 Kiñeke kuyfi wirin mew ngelay: “tañi wichu amayewael ñi kure engu”.
‡10:8 Genesis 2.24 LXX.
§10:19 Exodo 20.12-16; Deuteronomio 5.16-20.
*10:21 Kiñeke kuyfi wirin mew ngelay: “fey nüaymi tami kürus”.
†10:24 Kiñeke kuyfi wirin mew ngelay: “feyti pu che maneluwlu ñi fentren chemkün mew”.
‡10:29 Kiñeke kuyfi wirin mew ngelay: “kam domo”.
§10:38 ¿Ayüafuymu tamu kutrankawael ka tamu langümngeael chumngechi ta iñche ñi rupayael feychi dungu mew?: ¿Pepi putuafuymu kay tati füre pulku iñche tañi putuael ka tamu llowael ti fawtismo iñche tañi llowael? pin ürke.
*10:39 Eymu kutrankawaymu ka langümngeaymu chumngechi ñi rupayael ta iñche feychi dungu mew: Eymu ta pepi putuaymu tati füre pulku, ka llowaymu tati fawtisangen iñche tañi llowael pin ürke.
†10:47 David mew tripachi Dulliñ Yomelche: tati pu judiu ñi üytukefelchi üy tañi tukulpayafiel ti tukulpakünuelchi Montulchefe David ñi yomelche ñi tripayael.