1 Utew zeyzey is etew he nepesaylu en is menge kedrapas din te menge suǥù,

wey mibpanas en is menge salè din.

2 Utew zeyzey is etew he wazè en isipa te Nengazen he mekesesalà sikandin,

wey wazà sikandin mebpenlimbung.

3 Hein wazè ku pa iketug-an is menge salè ku, mibmeluya a,

ne henduen te nerupet en is menge tulan ku,

tenged te kebpekezag-es ku seled te tivuuk he andew.

4 Su maandew wey mezukilem is kedsiluti nu kedì;

naawè en is desen ku ne henduen be te nekagkag a te meinit he andew.

5 Ne intug-an ku ziyà te kenikew is menge salè ku;

wazè ku in-eles.

Ke siak te idtug-an ku is menge salè ku ziyà te kenikew.

Ne zutun te kedtug-an ku, mibpesaylu a kenikew.

6 Umbe, is langun he metinumanen kinahanglan he med-ampù diyà te kenikew zutun te timpu te kelised,

su emun ebpekeuma is kelised he iring te zalem, ne kenè dan egkemenu.

7 Iyan ka elesè ku;

pengalang ku zutun te timpu te kelised.

Himuwa nu he ebpekeliǥuy kayi te kediey is menge etew he ebpemen-ugyab te kegkelipey zan

tenged te kedlibriya nu kediey.

8  Nengazen, migkaǥi ka kayi te kedì te,

“Ibpenurù ku kenikew is dalan he zait he ed-ikulen nu.

Ne zutun te kebentayi ku kenikew ne edsembaǥan ku sikew.

9 Kenè nu iringi is kudà he kenà ebpekesavut,

he kinahanglan pa he egkekangan wey edrindahan su para mekepezumazuma.”

10 Mahabet is menge kemereǥenan he egkeseǥazan te lalung he menge etew,

iyan, sikan mulà, is midsarig diyà te Nengazen, ebmahalen din wey edlevanan din sikandan.

11 Umbe, sikiyu is menge metazeng,

lipey kew tenged te mibeelan te Nengazen diyà te keniyu!

Sikiyu is nengungubpaan te hustu he paaǥi,

ugyab kew tenged te kegkelipey niw!