1 Iyan heini menge erubasa ni Solomon:

Is anak he uluwanen ebpekeveǥey te kelipey te ǥinikanan din, iyan, is anak he tulebung ebpekeveǥey te seeng kandan.

2 Is ketiǥeyunan he nekuwa te mezaat he paaǥi kenà ebpekeveǥey te keupiyaanan. Is metazeng he kebpengungubpaan ebpekelibri kenikew te kemetayen.

3 Kenà idtuǥut te Nengazen he mevitil is menge metazeng, iyan, kenè din ebmehimuwen he mekuwa te menge lalung is egkesuatan dan.

4 Is kepepeǥul te etew egkehimu he iyan hinungdan te kegkeey-eyuwi zin. Ne is keǥied te etew egkehimu he iyan hinungdan te kebpekaangken din te zekelà he ketiǥeyunan.

5 Is anak he edezerengdeng emun timpu te tiraǥun uluwanen sikandin, iyan, is anak he và dà edliplipezeng emun timpu te tiraǥun, ebpekeveǥey te keelezan.

6 Edtuvazan te Megbevayà is metazeng he etew, iyan, is menge lalag te lalung he etew ebpekezezaat.

7 Is metazeng he etew, egkehimu sikandin he tuvad te zuma ne layun sikandin egketenuzi, piru is lalung he etew egkelipatan en.

8 Is uluwanen he etew, ebpezumdumahan din is menge suǥù, iyan, is etew he sumalè en is ebpengeǥiyen din, ne kezeetan is egkepengkusan din.

9 Is etew he metazeng meziyù te kezeetan, piru is etew he ebaal te mezaat egketuenan is salè din.

10 Is etew he limbungan ebpekeveǥey te samuk, ne is etew he sumalè en is ebpengeǥiyen din egkezeetan.

11 Is menge lalag te etew he metazeng ebpekeveǥey te keupiyaanan diyà te zuma, piru is menge lalag te lalung he etew ebpekezezaat.

12 Is kegkeepes ebpeketuvù te kesamuk, piru is etew he zuen din kebmahal ne ebpekepesaylu te langun he menge sayep.

13 Duen menge meupiya he penurù he egkekuwa ta ziyà te menge lalag te etew he metau, iyan, is engey ereg he ebmensuwen etawa edsilutan.

14 Is menge uluwanen ebpenigudu pa wey meumani is ketau zan, piru is menge tulebung edtulung egkaǥi te ebpekezezaat kandan te kenà egkeuǥet.

15 Is menge sepian iyan kutè dan is ketiǥeyunan dan, ne is menge ayu-ayu, iyan ebpekezezaat kandan is kewewezai.

16 Is suhul te etew he metazeng iyan is meupiya wey meluǥayad he untung, piru silut mulà is egkeraǥun te lalung he etew.

17 Is etew he ebpezumazuma te menge penurù, ebpekaangken te meupiya wey meluǥayad he untung, piru is etew he kenà ebpemineg te menge penurù egketazin.

18 Teruen is etew he id-eles din is kegkepauk din, ne tulebung is etew he pereituk.

19 Is etew he verak melemu ebpekesalà. Piru is uluwanen he etew egketuenan din te ked-eǥen is dilè din.

20 Is menge lalag te metazeng he etew mahal iring te pelata, piru is isip te lalung he etew wazè din pulus.

21 Is lalag te metazeng he etew ebpekeveǥey te keupiyaanan diyà te mezakel he menge etew, piru is menge tulebung ebpemematey tenged te kekurang te kedsavut dan.

22 Ebpekepesepian te etew is kedtuvazi kandin te Nengazen, ne kenà heini egkekuwa pinaaǥi te subra he kebpenigudu.

23 Is igkelipey te tulebung iyan is kebaal te mezaat, piru is igkelipey te etew he zuen din kedsavut iyan is kebpengungubpaan duma is ketau.

24 Iring te is igkeherati te etew he mezaat is menge ulaula zin, ne egkelaus egkehitavù diyà te kandin, is etew he metazeng, egkekuwa zin is edtinguhaan din.

25 Emun ebpekeuma is menge penggezam te ked-ubpà he iring te vagyu, egkehanew is lalung he etew, piru is etew he metazeng kenà egkewaleng, edhitindeg he melig-en.

26 Iring te sukà he ebpekengingilu te ngipen, wey is evel ebpekepeluhà te mata, ne is peǥulen he etew igkererengiti zaan te edsuǥù kandin.

27 Is kedtahud te Nengazen ebpekepeluǥayad te untung, piru mevavà is untung te lalung he etew.

28 Kelipey is egkeperateng te etew he metazeng, iyan, is ebperetengen te etew he mezaat is menge ulaula zin, ne kenè din egkekuwa.

29 Is kedsunud te menge suǥù te Nengazen iyan iliyan te menge metazeng, iyan, is menge lalung he edsupak kayi ne egkengezeetan mulà.

30 Is menge etew he metazeng, ebpedayun is ked-ubpè dan, iyan, is menge etew he mezaat is menge ulaula zan, ne kenà ebpekepedayun is ked-ubpè dan kayi te tanà.

31 Is menge lalag te metazeng he etew ebpekeveǥey te ketau, iyan, is ebpengeǥiyen te etew he limbungan ne kenà ibpepedayun.

32 Is metazeng, egketuenan din ke hengkey is dait he egkeǥiyen, iyan, is menge etew he mezaat is menge ulaula, ne winalì dà is egketuenan dan.