1 Midsuǥù te Nengazen si Moises 2 he keǥiya zin heini ziyà te menge Israilihanen: “Emun diyè kew en te tanà he ibeǥey ku keniyu he egkeubpaan niw, 3 ne pemuhat kew te para kediey te menge ibpemuhat he ebpuun te menge uyaǥen niw. Pemuhat kew te menge pemuhat he edtutungen, menge pemuhat para te kedtuman te menge penaad, menge pemuhat he kineugelingen he suat, etawa menge pemuhat para te kedsilibra te menge pista. Is kehemut kayi te menge pemuhat he pinaaǥi te hapuy ne ebpekepenunuat kedì. 4-5 Is ebpemuhat te nati he kerehidu he pemuhat he edtutungen para kedì ne mebpemuhat daan te pemuhat he para gasa. Heini he pemuhat is para gasa kinahanglan he zezuwa he kilu he meupiya he kelasi he herina he edsehuǥan te senge litru he lana. Ne edlepikan heini te pemuhat he inumen he senge litru he vinu. 6 Emun meǥurang en he kerehidu is ibpemuhat niw, lepiki niw heini te pemuhat he para gasa he heepat he kilu he meupiya he kelasi he herina he edsehuǥan te senge litru wey tengà he lana. 7 Ne edlepikan daan heini te pemuhat he inumen he senge litru wey tengà he vinu. Is kehemut kayi he pemuhat ebpekepenunuat kedì.

8 “Is ebpemuhat te turiti he vaka he pemuhat he edtutungen etawa pemuhat para te kedtuman te penaad, etawa pemuhat he para te meupiya he kedepità, 9 kinahanglan he mebpemuhat daan sikandin te pemuhat he para gasa he heenem he kilu he meupiya he kelasi te herina he edsehuǥan te zezuwa he litru he lana. 10 Edlepikan pa heini te pemuhat he inumen he zezuwa he litru he vinu. Is kehemut kayi he pemuhat te pinaaǥi te hapuy ne ebpekepenunuat kedì. 11 Iyan heeyan beeli niw emun ebpemuhat kew te tudu he vaka etawa meǥurang en he meemahan he kerehidu etawa nati he kerehidu etawa kambing. 12 Beeli niw heeyan diyà te kada sevaha he uyaǥen he ibpemuhat niw.

13 “Is langun he tutuu he Israilihanen he ebpemuhat te menge pemuhat pinaaǥi te hapuy he mehemut he pemuhat he ebpekepenunuat kedì, kinahanglan he edsunud keniyan he menge sulunuzen. 14 Ne is kenà menge Israilihanen he ed-ubpà duma keniyu, pirmeninti etawa kenà, he egkesuat he ebpemuhat te pemuhat pinaaǥi te hapuy he mehemut he pemuhat he ebpekepenunuat kedì, kinahanglan he edsunud dan daan keniyan he menge sulunuzen. 15 Sikiyu is menge Israilihanen wey kenà menge Israilihanen he mid-ubpà duma keniyu ne neked-iring dà kayi te etuvangan ku, ne neked-iring dà he kesuǥuan is edtumanen niw. Heini he sulunuzen kinahanglan he tumana niw taman te huziyan he lapis te menge kevuwazan. 16 Uya, neked-iring dà he menge suǥù wey menge sulunuzen is kinahanglan he edtumanen niw te menge Israilihanen wey is kenà menge Israilihanen he mid-ubpà duma keniyu.”

17 Midsuǥù pa te Nengazen si Moises 18 he keǥiya zin heini ziyà te menge Israilihanen: “Emun diyè kew en te tanà he ibeǥey ku keniyu, 19 ebpekekaan kew te sebpet kayi. Piru kinahanglan he edtapid kew zutun te para ibpemuhat niw kayi te kedì. 20 Pemuhat kew te supas he iyan ebeelan niw is herina he egkehuna he ǥinaling niw, iring te ebeelan niw ziyà te egkehuna he sebpet te trigu niw he ebpuun te gunasà. 21 Heini is pemuhat he ebpuun diyà te egkehuna he ginaling niw he herina, ne ipemuhat niw kayi te kedì taman te huziyan he lapis te menge kevuwazan niw taman te taman.

22-23 “Ne penenglitan, sikiyu is menge keet-etawan, nekerapas kew he wazè niw tivevaa zuen te sevaha te menge suǥù he imbeǥey ku ki Moises. (Ne heini he menge suǥù imbeǥey ku keniyu pinaaǥi ki Moises kinahanglan he edtumanen niw heini puun te andew te kebeǥaya ku kayi taman te taman.) 24 Ne emun wazè niw tivevaa is kedrapas niw kayi, su wazè niw metueni he nekerapas kew, sikiyu wey is langun he keet-etawan mebpemuhat kew te sevaha he turiti he vaka he iyan pemuhat he edtutungen hein netuenan niw he nekesalè kew. Pemuhat heini he ebpekepenunuat kedì is kehemut din. Ilapik niw kayi is egkinehenglanen he pemuhat he para gasa wey pemuhat he inumen, wey sevaha he meemahan he kambing he pemuhat he para idlumpiyu. 25 Ibpemuhat heini te memumuhat para mevelukasi is langun keniyu tenged te salè dan. Ebpeseyluwen ku sikandan su wazè dan man haazà tivevaa, wey mid-uwit man daan sikandan te pemuhat pinaaǥi te hapuy wey pemuhat he para idlumpiyu. 26 Uya, ebpeseyluwen ku is tivuuk he keet-etawan te Israel, ragkes is kenà menge Israilihanen he emurè dan te inged, su neuwit-uwit is langun dutun te salà he wazà tivevaa.

27 “Ne emun sevaha zà he etew is nekesalà te wazà tivevaa, ne med-uwit sikandin te sevaha he vehiyan he kambing he senge-tuig is keǥurang din he pemuhat he para idlumpiyu. 28 Ibpemuhat heini te memumuhat diyà te etuvangan ku su para mevelukasi haazà he etew tenged te salè din he wazè din tivevaa ne ebpeseyluwen ku sikandin. 29 Neked-iring dà is sulunuzen he para zuen te nekesalà he wazè din tivevaa, Israilihanen man etawa kenà Israilihanen he emurè niw te inged.

30 “Piru sikan is midtivevà is kebaal zin te salà, Israilihanen man etawa kenà, ne midsumpalit e zin. Ne kinahanglan he kenè en sikandin egkilelaan he zuma niw. 31 Su inselikwey zin is lalag ku wey midsupak din is suǥù ku. Kenè niw sikandin kilelaa he sakup niw. Ne televaken din is salè din.”

32 Hein diyà te sibsivayan is menge Israilihanen, duen etew he neehè dan he nengayu zutun te Andew te Kedhimeley. 33 Miduma sikandin duen te menge etew he nekaahà kandin diyà te ki Moises wey ki Aaron wey ziyà te kezekelan. 34 Ne mibpirisu zan sikandin su wazè dan pa mekesiguru ke hengkey is ereg he ebeelan dan kandin. 35 Ne migkaǥi is Nengazen diyà te ki Moises te, “Kinahanglan he edhimetayan haazà he etew, ibpetuleng sikandin te vatu te langun, diyà te ǥawas te kampu.” 36 Umbe, mid-uwit sikandin te menge etew pehendiyà te ǥawas te kampu ne mibpenuleng dan te vatu taman te minatey, sumalà te insuǥù te Nengazen ki Moises.

37 Midsuǥù te Nengazen si Moises 38 he keǥiya zin heini ziyà te menge Israilihanen: “Teuzi niw te egkengevitey is sidsid te visti niw ne teuzi niw te hiket he meitem is kaavuavu zin. Kinahanglan he ed-ul-ulahan niw heini wey te huziyan he lapis te menge kevuwazan niw taman te taman. 39 Heini is egkengevitey, ebpetanudtanud keniyu te langun he menge suǥù ku su wey niw tumana heini ne kenà iyan is keniyu zà he egkesuatan te ebaal. 40 Pinaaǥi kayi te egkengevitey edtentenuzan niw is kedtuman te langun he menge suǥù ku, ne egkehimu kew he ǥaked ku. 41 Iyan a is Nengazen he Megbevayè niw mibpeǥawas keniyu ziyà te Ehipto su wey a mehimu he Megbevayè niw. Uya, iyan a Nengazen he Megbevayè niw.”