1 Impelaus ni Job is menge lalag din te, 2 “Duen ibpenangdù ku ziyà te uuyag wey Mekeǥeǥehem he Megbevayà. Minsan wazà sikandin mebeǥey kedì te hustu he kukuman wey minsan mibpeǥezam kedì te mesakit he ǥehinawa, 3 iyan penangdù ku is: mintras egeǥehinawa e pa, ne idtuǥut pa kedì te Megbevayà is kegkeuyag-uyag, 4 ne kenà a egkaǥi te mezaat wey kenà a edtarùtarù. 5 Kenà a ebpengumbenar keniyu. Idliet ku te egkaǥi he wazè ku salà taman te ebpatey a. 6 Edtindeǥan ku he metazeng a, ne kenè ku heini ed-engkezan. Mintras uuyag e pa ne kenè ku ed-isipen he mekesesalà a.

7 “Deyzey ke edsilutan te Megbevayà is mibpekigkuntada kedì te silut he ereg he idsilut te lalung he menge etew. 8 Ebmenmenuwen te Megbevayà te kegkehewi a zin te untung te etew he wazà medtuu kandin? 9 Ebpemineg be is Megbevayà te kebuyù din te tavang emun egkeumahan sikandin te kemereǥenan? 10 Igkelipey zin be vuwa is Mekeǥeǥehem he Megbevayà? Ebpengumew-umew ve sikandin te Megbevayà seled te langun he timpu?

11 “Ebpenuruen ku sikiyu mehitenged te ǥehem te Mekeǥeǥehem he Megbevayà. Egkeǥiyen ku ziyà te keniyu is menge paaǥi zin. 12 Piru sikiyu is langun netau kayi. Ne maan is migkaǥi kew kayi te kediey te wazè din pulus?

13 “Iyan heini egkeulaula he inteǥana te Megbevayà he Mekeǥeǥehem diyà te lalung wey mesipala he etew. 14 Is lalung he etew, minsan mezakel is menge anak din, is duma kandan, ebpatey te tebek etawa vitil. 15 Is egkesamà kandan he uuyag ne ebpatey te zaru, ne wazà edlalew mehitenged te kebpatey zan, minsan is menge esawa zan.

16 “Minsan edtiǥum is lalung he etew te zekelà he selapì wey visti, 17 kenà heini ebpulus diyà te kandin. Is metazeng wey wazà mekesalà he menge etew iyan ebpekesul-ub te visti te lalung he etew, ne ebehinen dan is selapì din. 18 Is baley he ebengunen din iring keǥevù te valey te kelelawà etawa vuǥawan diyà te pemuleey. 19 Ebpurung edrerey-as is sepian, piru kegkepukew zin ne egkahanew en is langun he ketiǥeyunan din. 20 Ebpekeuma ziyà te kandin is kegkahandek he iring te zalem he ed-anud kandin ke mezukilem. 21 Idlayap sikandin te keramag he ebpuun diyà te edsilaan, ne egkaawà sikandin diyà te ubpeey zin. 22 Henduen be te kenè en heini egkehizu he edhiyup kandin te ebpenigudu para mekelingkawas. 23 Ebpelakpak wey ebpemunsuwit te kedsudia kandin su naawà sikandin diyà te ubpeey zin.