1 Ne midtavak si Zofar is tig-Naama te, 2 “Kinahanglan he edtavak a su henduen be te kenà ebpeketanà is gehinawa ku. 3 Midawey ka kedì duma is ked-insultu, ne midsuǥù a te isip ku te kedtavak kenikew. 4 Siguradu netuenan nu he puun pa te nehuna he timpu, zutun te kedlimbaǥa te etew kayi te seled te kelibutan, 5 ne edlavey zà is kelipey te lalung he etew. Uya, kenà egkeuǥet is kelipey te etew he wazà medtuu te Megbevayà. 6 Minsan utew subra is kebpelavew zin, su henduen te ebpekeume en diyà te menge ǥapun, 7 egkahanew sikandin te wazà pidtemanan iring te tai zin. Is nekekilala kandin egkeinuinu ke hendei en sikandin. 8 Egkahanew sikandin iring te teǥeinep wey iring te egkelewasan ke mezukilem, ne kenè en sikandin egkaahà. 9 Kenè en sikandin egkaahà te nekekilala kandin, ne wazè en diyà te lugar he ubpeey zin te nehuna he timpu. 10 Is menge anak din iyan ebayad diyà te menge pubri te tinakew zin diyà te kandan. 11 Ebpatey sikandin ne igkeleveng he vetan-en wey mezesen pa.

12 “Is kebaal te mezaat iring te kegkaan te meemis diyà te vèbà, 13 ne ebpekeuǥeten is kebpurunga kedsepsepaa kayi su wey mepurung meǥezam is taam din. 14 Piru kebpekeuma kayi ziyà te ǥetek din ne ebmepezes heini ne edhilu iring te hereg te uled. 15 Iring te keenen he egkeutà, egkeutà te lalung he etew is tinakew zin. Minsan diyè en heini te ǥetek din ne ibpeuta heini kandin te Megbevayà. 16 Iring sikandin te edsupsup te hereg te uled he iyan ibpatey zin. 17 Kenè din en egkeǥezaman is taam te zekelà he lana, gatas wey teneb, he henduen be te edtudà he zezeisey wey zezekelà he menge wahig. 18 Kenà sikandin ebpekezawat te veǥas te kedhaǥù din. Kenà sikandin ebpekelipeylipey pinaaǥi te ketiǥeyunan din. 19 Su midaagdaag din is menge pubri wey mibey-anan din is ebpemenlised. Mid-angken din is menge valey he kenà kandin. 20 Minsan dekelà is azen din tenged te kebpeleleǥed din ne kenà sikandin egkeperahan. Ne kenà ebpekelibri kandin is langun he egkesuatan din. 21 Wazè en egkesamà diyà te kandin he egkekaan din, su egkahanew is ketiǥeyunan din. 22 Dutun te timpu he zekelà is azen din, egkeumahan sikandin te kelised. Utew subra he elentusen is ebpekeuma ziyà te kandin. 23 Edhentayen sikandin te Megbevayà te kemeresayan. Ibpeǥezaman kandin te Megbevayà is dekelà he pauk din, ne ebpeuzanan din te silut. 24 Minsan egkelikayan din is putew he ǥumaan, egketiyuk gihapun sikandin te brunsi he vesut te panà. 25 Egketiyuk is epezu zin, ne edlehusan dutun te vesut is lawa zin. Ne utew sikandin egkahandek. 26 Egketazin diyà te utew merusirem is ketiǥeyunan din. Ne ebinsulan sikandin wey is langun he nesamà diyà te ubpeey zin te hapuy he kenà etew is edretem duen. 27 Ibpezayag te langit is salè din ne edtistiǥus is tanà kuntra kandin. 28 Egkaanud te zalem is baley zin dutun te andew te kebpeǥezama kandin te Megbevayà te pauk din. 29 Iyan heeyan egkepeveyaan te lalung he etew he imbanglis te Megbevayà kandin.”