1 Hein neuǥet migkaǥi si Job te mibmehey sikandin ke maan is neetew pa sikandin. 2 Ke sikandin te, 3 “Edrewakan ku is andew te kegkeetew ku. 4 Deyzey pa ke mibmerusirem en haazà he andew ne wazè en silai te andew. Wazè en heini pezem tentenuzi te Megbevayà diyà te langit. 5 Deyzey ke netembunan en haazà te kerusireman etawa mekepal he ǥapun, ne netenges en pezem te kerusireman is kerayag din. 6 Deyzey ke nehimu he merusirem he kezukileman is ked-enaka kedì, ne wazè en haazà pezem mekeragkes diyà te pitsa te kelindar. 7 Deyzey ke wazà ad meetew zutun he kezukileman, wazè en pezem nelipey zutun he timpu. 8 Deyzey ke rewaki haazà he kezukileman te edrawak he metau he ebpukew te dragun he egngezanan te Leviatan. 9 Wazè en pezem medsiǥa is mekevugwas dutun he andew wey wazè en mebmeselem. 10 Edrewakan ku haazà he andew su wazè din eǥena is ked-enaka kedì su wey ku kenè en meseǥazi heini he menge kemeresayan.

11 “Deyzey pa ke minatey e en diyà te ǥetek te iney ku. 12 Maan is nesepipi e pa wey ingkepesusu e pa te iney ku? 13 Emun pezem minatey ad dutun he timpu ne melinawen ad pezem guntaan, he midlipezeng wey midhimeley 14 duma te menge hadì wey menge pengulu te kelibutan he mibangun te menge turuǥan hein kaazen dan pa. 15 Nekehimeley ad pezem duma te ebpemendumala he nepenù te vulawan wey pelata is menge valey zan. 16 Deyzey pezem ke neiring a te menge vatà he nemematey zutun te ked-enaka kandan, ne inleveng he wazè en mekaahà te kerayag. 17 Diyà te lugar te menge minatey, is menge lalung kenè en ebaal te kelelalung, ne is nengeveley nemekehimeley en. 18 Dutun he lugar, is menge vinihag ebpeeyehey en ne kenè dan en egkezineg is kegkulehia kandan te menge etew he ebpeǥes kandan ebpeterebahu. 19 Ne zutun he lugar is langun he klasi te menge etew, bentuǥan etawa kenà. Is menge uripen, kenè en egkeveyveyaan te menge egalen dan.

20 “Maan is edtuǥutan pa he meuyag is etew he egkerasey wey egkeseeng? 21 Egkesuat sikandan he ebpatey, piru wazè dan mebpatey. Ebpen-ahaan dan is kemetayen subra pa te kebpen-ahà te etew te ketiǥeyunan he nekeeles. 22 Wey sikandan ebmelipayen emun ebpatey zan en wey igkeleveng dan en. 23 Maan is edtuǥutan he meuyag is etew he wazè din man hanew ke hengkey is egkepengkusan din? Ketau te Megbevayà he kenà metueni te etew is diyà te huziyan he egkehitavù kandin. 24 Kenà a ebpekekaan tenged te subra he kegkeseeng, kenè en egkeengked is kebpekezag-es ku. 25 Is merasey he egkeulaula he igkahandek ku ne nehitavù en kayi te kedì. 26 Wazè ku kelinew wey keeyehey. Kenà ad ebpekehimeley su layun dà kesamuk is egkehitavù kedì.”