1-2 Midsurung ni Hadì Nebucadnezar he hadì te Babilonia is Jerusalem wey is menge inged diyà te peliǥuy kayi. Duma zin te nenurung is langun he menge sundaru zin ragkes is menge sundaru he ebpuun diyà te langun he menge ginhedian he nesakup din. Dutun he timpu migkaǥi is Nengazen he Mekeǥeǥehem, he Megbevayà te Israel, diyà te ki Jeremias te: “Hendiyè ka te ki Hadì Zedekia he hadì te Juda, ne keǥiyi nu te siak is Nengazen migkaǥi te: Ibeǥey ku heini he inged te hadì te Babilonia ne ebinsulan din heini. 3 Ne kenè ka ebpekelikey kandin, su egkezekepan ka ne ibeǥey ka kandin. Ed-etuvang ka kandin su wey ke zin mehukumi, ne zutun ebihaǥen ka pehendiyà te Babilonia. 4 Piru pemineǥa nu, Hadì Zedekia, heini is idsaad ku kenikew: Kenè ka ebpatey te tebek, 5 kekenà, ebpatey ka he melinawen. Edtutung te veyewà is menge etew nu su ebeǥayan ke zan te zengeg iring te mibeelan dan hein inleveng is menge kepuun nu he nehuna kenikew he midhadì. Igkeseeng ke zan ne ke sikandan te, ‘Minatey en is hadì dey!’ Iyan a, is Nengazen, is migkaǥi kayi.”

6 Ne midhendiyà si Jeremias te Jerusalem, ne migkaǥi zin haazà is langun diyà te ki Hadì Zedekia he hadì te Juda. 7 Dutun he timpu midsurung te menge sundaru te hadì te Babilonia is Jerusalem, Lakish, wey Azeka. Iyan dà heini nesamà te menge vinerengbeng he menge inged diyà te Juda.

8 Duen pa migkaǥi te Nengazen diyà te ki Jeremias hein timpu te kebpekid-uyun ni Hadì Zedekia te langun he menge etew ziyà te Jerusalem he ibpeengkezan din en te ed-uripen is menge uripen. 9 Mibmandù si Zedekia he is minsan hentei he zuen din menge uripen he Hebriyuhanen, maama etawa vahi, kinahanglan he veǥayi zan sikandan te vayàbayà. Wazà Judio he ed-uripen te iring din he Judio. 10 Ne mid-uyun kayi he kesebutan is langun he menge etew zutun ragkes en is menge upisyal, ne mibeǥayan dan te vayàbayà is menge uripen dan, maama man etawa vahi. 11 Piru nahalin is isip dan ne mid-uman dan ded uripena is menge uripen dan he mibeǥayan dan en pezem te vayàbayà.

12-13 Umbe, migkaǥi is Nengazen he Megbevayà te Israel, ziyà te ki Jeremias te, “Midhimu ku is kebpekid-uyun te menge kepuun niw hein impeǥawas ku sikandan diyà te Ehipto he zutun sikandan mengeuripen. Ke siak te, 14 ‘Kada pitu he tuig kinahanglan he ebeǥayan niw te vayàbayà is duma niw he Hebriyuhanen he imbelegyà diyà te keniyu su wey niw meuripen. Emun ebpekepenilbi en sikandin diyà te keniyu te heenem he tuig, kinahanglan he ebeǥayan niw sikandin te vayàbayà.’ Piru wazà mebpezumazuma kedì is menge kepuun niw mehitenged kayi. 15 Diyà te nenlavey he menge andew neisip-isip niw he kenà haazà hustu, ne mibeelan niw is hustu ziyà te etuvangan ku. Pudu kew mibpezumazuma he ebeǥayan niw te vayàbayà is menge uripen niw he zuma niw he Hebriyuhanen. Nekid-uyun kew pa man ganì kediey mehitenged kayi ziyà te valey ku he mibpili ku he zutun a ebeǥayi te zengeg. 16 Piru, nahalin is isip niw ne wazà a keniyu tehuza. Mid-umanan niw uripena is menge uripen niw he impeǥawas niw en. Egkesuat pezem sikandan he mekeǥawas te kegkeuripen, piru mibpeǥes niw sikandan umana uripena.

17 “Umbe siak, is Nengazen, migkaǥi a te geina te wazà a keniyu pezumdumahi su wazè niw veǥayi te vayàbayà is menge uripen niw he iring niw he Hebriyuhanen, ebeǥayan ku sikiyu te vayàbayà he ebpematey pinaaǥi te tebek, bitil, wey menge zaru. Tenged te egkeulaula keniyu egkelimezangan is langun he ginhedian kayi te kelibutan. 18-19 Is menge upisyal ziyà te Juda wey Jerusalem, wey is menge upisyal ziyà te turuǥan, ragkes is menge memumuhat wey zuma pa he menge meǥinged, nekid-uyun kediey pinaaǥi te kebaas te nati he vaka he imped-atbang is kedsevuka zuen, ne mibayà sikandan diyà te pid-elangan kayi. Piru wazè dan tumana haazà is kebpekid-uyun dan kedì. Umbe ebeelan ku zaan diyà te kandan is mibeelan dan duen te nati he vaka. 20 Ibeǥey ku sikandan diyà te menge kuntada zan he egkesuat he edhimatey kandan. Ne is menge lawa zan egkehimu he keenen te menge tagbis wey zumezaas he menge langgam.

21 “Ibeǥey ku si Hadì Zedekia he hadì te Juda wey is menge upisyal zin diyà te menge kuntada zan he egkesuat he edhimatey kandan, he iyan is menge sundaru te hadì te Babilonia. Minsan mid-engked dan en he edsurung keniyu, 22 edsuǥuen ku sikandan te ked-uman kedsurung diyà te inged niw. Edsurung dan kayi ne ed-eǥawen dan heini, ne ebinsulan dan. Edhimuwen ku he mekevulungbulung is menge inged diyà te Juda ne wazè en ed-ubpè kayi. Iyan a, is Nengazen, is migkaǥi kayi.”