1 Dutun he timpu, heini he kanta egkentahan diyà te Juda: “Melig-en en is inged tew. Is kedlibriya kenitew te Megbevayà ne iring te melig-en he verengbeng he nekeliǥuy kenitew. 2 Puwasi is menge pultahan te inged su wey mekeseled is metazeng he menge etew ziyà te menge nasyun, menge etew he mepezumdumahan te Nengazen.

3 “Ebeǥayan nu, Nengazen te kelinew he wazè din kurang is etew he iyan ka zekelà diyà te isip din, su midsarig sikandin kenikew.

4 “Layun kew sarig te Nengazen, su is Nengazen iyan endilungè tew te wazè din pidtemanan. 5 Benar iyan, ibpekevavè din is menge mepelevawen. Midezeetan din is menge inged dan taman te netempag heini ziyà te tanà. 6 Midtekutakan heini te menge pubri he menge dinaagdaag.

7 “Patag is dalan te menge metazeng, ne iyan ka is Metazeng he Megbevayà, mibpekeupiya kayi. 8  Nengazen, edsunuzen dey is menge suǥù nu, ne midsarig key kenikew. Iyan penganduy zey he meveǥayi ka te zengeg. 9 Ebpengenduyen ku sikew ke timpu te mezukilem, te ebpuun te tivuuk he gehinawa ku. Tutuu he emun edhukuman nu is menge etew kayi te kelibutan, ne egketau sikandan te metazeng he kebpengungubpaan. 10 Minsan egkehizuwan nu is lalung he menge etew, wazà gihapun sikandan mebpenginenau te metazeng he kebpengungubpaan. Minsan diyà sikandan ed-ubpà te tanà te menge metazeng, edsigudu zan gihapun ebaal te mezaat, ne wazè dan kilelaa is kegkemekeǥeǥehem nu. 11  Nengazen, andam ke en he edsilut kandan, iyan, wazè dan metueni heini. Petueni nu kandan Nengazen! El-eleza nu sikandan pinaaǥi te kebpaahaa nu kandan te kebmahala nu te menge etew nu. Binsuli nu sikandan te hapuy is menge kuntada nu.

12 “Nengazen, beǥayi key te meupiya he kebpkesavuk. Su is langun he nehimu zey nehimu zey tenged te tavang nu. 13  Nengazen he Megbevayè dey, nezizalem key te gehem te zuma he menge egalen, piru iyan ke zà ed-ezapen dey. 14 Guntaan nemematey en sikandan ne kenè en sikandan egkeuyag. Midsilutan nu sikandan wey midezeetan nu; midhimu nu he melipati sikandan. 15  Nengazen, impeiseg nu is kezekelà te nasyun dey; impemeluag nu heini pinaaǥi te kebpeiseǥa nu te menge zulunà kayi, ne nekeveǥey heini kenami te zengeg, 16  Nengazen, mibmansu nu is menge etew nu, ne tenged te kedlised dan midangep dan wey mibpengumew-umew kenikew. 17 Neehè nu Nengazen is kemeresayan dey. Iring key te vahi he ebeliliten he ebpekepengulahì tenged te utew mesakit. 18 Ebpekezag-es key te kesakit piru wazà batà he inlusad. Wazè dey egkehimu para kenà maaǥew is menge tanè dey, ne wazè dey zaan mezezeeti is menge etew kayi te kelibutan he menge kuntada zey. 19 Piru egkevanhew is menge etew nu he nemematey. Ed-enew sikandan is egkanta tenged te kelipey iring te zehemug emun meselem he ebpekeveǥey te keǥenew te tanà, sikew Nengazen ebenhawen nu is menge minatey.”

20 Sikiyu is menge emurè ku te inged, seled kew ziyà te menge valey niw ne lelekeb kew. Eles kew zèpa taman te egkaawà is pauk te Nengazen. 21 Su edhendini en sikandin puun te ubpeey zin su edsilutan din is menge meǥinged kayi te kelibutan tenged te menge salè dan. Ibpeǥawaǥawe en diyà te tanà is menge etew he mibpenhimetayan; ne kenè din en heini id-eles.