1 Midtiǥum ni Moises is tivuuk he keet-etawan te Israel ne migkeǥiyan din sikandan te, “Iyan heini ibpeulaula te Nengazen keniyu: 2 Seled te heenem he andew, beeli niw is menge terebahu niw, piru zutun te ikepitu he andew ne himeley kew, su iyan heini andew he segradu ne para heini te Nengazen. Is minsan hentei he edterebahu te haazà he andew kinahanglan he edhimetayan. 3 Umbe kenè kew medterebahu, minsan is kedtetavun diyà te menge ed-ubpaan niw te kedsusuba te haazà he andew.”

4 Migkeǥiyan ni Moises is tivuuk he keet-etawan te Israel te, “Iyan heini insuǥù te Nengazen he veeli niw: 5 Halad kew ziyà te Nengazen puun te menge azen niw. Egkehimu he edhalad kew te vulawan, pelata, brunsi, 6 welin he meitem is kaavuavu zin, merudtem wey kanggan, linu, manggad he vulvul te kambing, 7 lundis te meemahan he kerehidu he midtinà te meriǥà, meupiya he kelasi he lundis, kayu he ekasya, 8 lana para idtubil te sulù, menge pehemut para te lana he idlana wey is para zuen te mehemut he veyewà, 9 wey vatu he uniks wey zuma pa he mahalen he menge vatu he para ibpikit duen te ipud wey zuen te teleǥuey ziyà te kumeng kayi.

10 “Is langun keniyu he zuen ketau te kebaal, ne medhengkayi ne veeli zan is minsan hengkey he insuǥù te Nengazen. 11 Beeli zan is Tulda he Ed-ezapan, is menge tambun dutun, is menge edsenggatan, is menge elavat he tabla, menge marku, menge tukud dutun, wey is menge pundasyun. 12 Elin daan is Kavan te Kebpekid-uyun te Nengazen, is menge tival zuen, is tangeb din wey is kurtina he id-alang duen, 13 is lemisahan wey is menge tival kayi wey is langun he gelemiten duen; is supas he ibpemuhat diyà te etuvangan te Megbevayà; 14 is selevukà te sulù wey is menge gelemiten duen; is menge sulù duma is lana he idtubil zuen; 15 is pemuhatà he edtutungan te veyewà wey is menge tival kayi; is lana he idlana; is mehemut he veyewà; is kurtina zuen te Tulda he Ed-ezapan; 16 is pemuhatà te pemuhat he edtutungen, tuuǥà he brunsi, is menge tival wey is langun he gelemiten kayi; is bisin he brunsi wey is selevukè din; 17 is menge kurtina he ibpeliǥuy te lama wey is menge tukud din wey is menge pundasyun; is kurtina ziyà te pultahan te lama; 18 is menge palpal wey is menge vanting he para zuen te Tulda he Ed-ezapan wey te lama kayi, 19 wey is mekempet wey segradu he menge visti he para te memumuhat he si Aaron wey te menge anak din he maama he ibivisti zan emun ebpemuhat dan duen te Segradu he Lugar.”

20 Ne mid-awà is tivuuk he keet-etawan te Israel diyà te etuvangan ni Moises. 21 Ne is kada sevaha kandan he egkesuat he edhalad, mid-uwit din is idhalad din diyà te Nengazen, he para te ibaal zuen te Tulda he Edtelevukaayan wey te langun he gelemiten kayi, wey is langun he egkinehenglanen para meveeli is menge visti te menge memumuhat. 22 Is langun he egkesuat he edhalad, maama wey vahi, mid-uwit te menge mahalen he menge lipit, menge eritis, menge rintì, wey nekedseselekawà he klasi te menge elahas he vulawan. Mid-uwit dan is menge vulawan dan su impemuhat dan he pemuhat he ibayew ziyà te Nengazen. 23 Duen midhalad te welin he meitem is kaavuavu zin, merudtem wey kanggan, linu, manggad he vulvul te kambing, lundis te meemahan he kerehidu he midtinà te meriǥà, wey meupiya he kelasi he lundis. 24 Is duma, mid-uwit te pelata etawa brunsi, wey menge tabla he ekasya he inhalad dan diyà te Nengazen. 25 Is menge vahi he uluwanen he ebpenhavel, mid-uwit dan te welin he meitem is kaavuavu zin, merudtem wey kanggan, wey linu. 26 Ne is menge vahi he metau he edhavel te vulvul te kambing, ne meupiya is gehinawa zan te kedhavel kayi. 27 Mibeǥey zaan sikan is menge pengulu zan te menge vatu he uniks wey zuma he mahalen he menge vatu he ibpikit duen te visti he ipud, wey zuen te teleǥuey ziyà te kumeng. 28 Duen daan imbeǥey zan he menge penaket wey lana te ulibu he para te idtubil zuen te menge sulù, wey lana he para te idlana, wey is para zuen te mehemut he veyewà. 29 Is langun he menge Israilihanen, maama wey vahi he egkesuat he ebeǥey, mid-uwit dan te idhalad dan diyà te Nengazen he ebpuun te keputian te atey zan is kebeǥaya zan duen; ne para haazà te langun he ebpeveelan te Nengazen kandan he impekaǥi zin ki Moises.

30 Migkeǥiyan ni Moises is menge Israilihanen te, “Mibpilì te Nengazen si Bezalel, is anak he maama ni Uri he apù ni Hur he sakup te tribu ni Juda. 31 Ebpeulinan din sikandin te Mulin-ulin din ne ebeǥayan din te ketau wey ebilidad te kebaal te minsan hengkey he vuluhaten– 32 ebeǥayan ku sikandin te ketau te kebaal te mekempet he menge vutang he vulawan, pelata, wey brunsi; 33 te kebpurma te mahalen he menge vatu he ibpemikit, kegkurti te kayu, wey kebaal te zuma he edeyzeyanan he terebahu. 34 Imbeǥey te Nengazen diyà te kandin wey ziyà te ki Oholiab he anak he maama ni Ahisamac he nesakup te tribu ni Dan, is ketau te kebpetueni te zuma te netuenan dan pinaaǥi te kebpenurù dan. 35 Imbeǥey zin diyà te kandan is ketau te kebaal te langun he kelasi te terebahu: iring te kebpandey te vatu, kebaal te menge zayandayan, wey kedhavel te manggad, keburda te linu, welin he meitem is kaavuavu zin, merudtem wey kanggan. Egkehimu zan is langun he kelasi te terebahu, wey utew sikandan metau he ebaal.