1 “Baal kew te pemuhatà he kayu he ekasya he para tutungà te veyewà. 2 Ne haazà, kinahanglan he kuwedradu he 18 he vaney is kelayat din ne 18 zaan he vaney is keluag din, ne 36 he vaney is ketikang din. Ne kinahanglan he zuen kayi menge sungeysungey ziyà te menge suyuk din he idredsè dà is kebpurmaha zuen te kebeeli zuen te pemuhatà. 3 Epizi niw te lunsey he vulawan is dapit te zivavew kayi, is heepat he kilid kayi, wey sikan is menge sungeysungey ziyà te menge suyuk. Ne rebitiyi niw te vulawan is peliǥuy kayi. 4 Ne vaal kew te zezuwa he ebpen-iringen te rintì he vulawan he para idtaud diyà te zizalem duen te ribiti ziyà te pesiziveluyà duen te pemuhatà, he para edteuzan te menge tival he idtival kayi. 5 Kayu he ekasya is beeli niw he menge tival ne epizi niw haazà te vulawan. 6 Isavuk niw heini he pemuhatà diyà te gawas duen te egkurtinahan te kurtina he ibitey ziyà te egkesineruwan duen te Kavan te Kebpekid-uyun ku keniyu. Ne zutun a he lugar ebpekidhinguma keniyu.

7 “Kada meselem emun ed-etimanen ni Aaron sikan is menge sulù, kinahanglan he edtutung sikandin dutun he pemuhatà te mehemut he veyewà. 8 Ne emun edtemteman din sikan is sulù ke egkesakep en, kinahanglan gihapun he edtutung sikandin te veyewà. Ne heini is kebpemuhata kedì pinaaǥi te kedtutung te veyewà, kinahanglan he kada andew is kebeeli zuen pehendiyè en te huziyan he menge lapis te kevuwazan. 9 Kayi he pemuhatà, kenè kew mebpemuhat te selakew he veyewà, kenè niw heini pemuhati te minsan hengkey he pemuhat he edtutungen, etawa pemuhat he gasa, etawa pemuhat he inumen. 10 Kesevaha te kada tuig, kinahanglan he edlumpiyuwan ni Aaron sikan is pemuhatà pinaaǥi te kebpelisi te lengesa zuen te menge sungeysungey te menge suyuk kayi. Haazà is lengesa he ibpalis, ne lengesa zuen te pemuhat he para idlumpiyu. Kinahanglan he kenè en ed-engkezan is kebeeli kayi kada tuig pehendiyè en te huziyan he lapis te menge kevuwazan; mid-isip ku heini he segradu utew he pemuhatà.”

11 Ne migkeǥiyan te Nengazen si Moises te, 12 “Emun edsinsusen nu is menge kevuwazan ni Israel, kinahanglan he ebeyazan te kada sevaha he maama kayi te kediey is untung din su para wazà mezaat he egkehitavù diyà te kandin dutun te kedsinsus. 13 Is kada sevaha he maama he egkeragkes dutun te sinsus, kinahanglan he ebayad te heenem he gramu he pelata he edsungkad diyà te timbangan te pelata te menge memumuhat. Kinahanglan he ebayad is kada sevaha keniyu, su halad niw heini kayi te kedì. 14 Is langun he menge maama he 20 he tuig is penuiǥen din, pehendiyè en te metikang ne iyan sikandan ebeǥey kayi te kediey. 15 Is sepian, kinahanglan he kenà subra is ibayad din, ne is pubri kinahanglan he kenà kurang is ibayad din. 16 Gemita niw heini he selapì para te ked-etiman duen te Tulda he Edtelevukaayan. Iyan heini lugbak para te untung niw, su wey ku kenà melemlemuwi is ked-ipat keniyu.”

17 Migkaǥi is Nengazen diyà te ki Moises te, 18 “Baal kew te brunsi he bisin he brunsi zaan is selevukè din. Ne ziyè niw isavuk te tengàtengà te pid-elangan te Tulda he Edtelevukaayan wey zuen te pemuhatà, ne tegui niw haazà te wahig. 19 Ne haazà is wahig dutun, iyan egemiten ni Aaron wey te menge anak din he maama te kedlùlù te menge velad dan wey menge paa zan, 20 te kenè pa sikandan edseled te Tulda he Edtelevukaayan, wey kenè pa sikandan ed-uvey zuen te pemuhatà te kebpemuhat pinaaǥi te hapuy. 21 Kinahanglan he edlùluan dan is menge velad dan wey menge paa zan su wey zan kenà mebpatey. Heini he sulunuzen, kinahanglan he edtumanen ni Aaron wey te menge kevuwazan din taman te huziyan he lapis te menge kevuwazan.”

22 Migkaǥi is Nengazen diyà te ki Moises te, 23 “Kuwa ka te kinemeupiyahan he pehemut: Heenem he kilu he wahig he mira, tetelu he kilu te mehemut he sinamun, wey tetelu zaan he kilu te mehemut he calamus, 24 wey heenem he kilu he kasia (kinahanglan he iyan idtimbang sikan is timbangan te menge memumuhat) ne ed-umanan haazà te senge litru wey tengà he lana te ulibu; 25 pinaaǥi kayi beeli niw is segradu he lana he utew mehemut he para te idlana. 26-28 Ne gemita niw heini te kedlana te Tulda he Edtelevukaayan, wey zuen te Kavan te Kebpekid-uyun ku keniyu, wey zuen te lemisahan wey is langun he kehimanan din wey zuen te ibpehitindeg he sulù wey is langun he menge himan din, wey zuen te pemuhatà te edtutungen he veyewà, wey zuen te pemuhatà te menge pemuhat he edtutungen wey te menge gelemiten din, is bisin wey is selevukè din. 29 Ipehinungud nu kediey heini is langun, ne zutun, egkepurung egkehimu he segradu heini is langun ne tenged dutun, ereg he idsivey para te Nengazen is ebpekezegkit duen.

30 “Ne lenahi niw zutun te lana si Aaron wey sikan is menge anak din he maama he tuus te ibpeveyveyaan niw sikandan kediey su wey zan mekepenilbi kedì pinaaǥi te kebpemuhat. 31 Kegiyi nu is menge Israilihanen te, ‘Heini is lana, iyan segradu he lana te Nengazen he pehendiyè en te egkalapislapis he kevuwazan is kegemita zuen,’ 32 Kinahanglan he kenà heini idlana ziyà te etew zà duen, ne kinahanglan daan he kenè niw ed-iringan is kebeeli kayi he lana emun ebaal kew te lana he selakew en is egemitan niw zuen, su para kenà mevaleyvaley, su segradu heini he lana, ne kinahanglan he ebeǥayan niw te keveǥat is kegkesegradu zin. 33 Is minsan hentei keniyu he ebaal te iring kayi he lana he ibpenlana zin etawa idlana zin te zuma he etew zà duen su kenà memumuhat, ne kenè niw en sikandin isipa he zuma niw.”

34 Ne migkaǥi en maan is Nengazen diyà te ki Moises te, “Kuwa kew te ibped-iiring is kezekelè din he menge pehemut he iyan heini: istakti, uniks, galbanum, wey lunsey he veyewà. 35 Pinaaǥi te kebpedsesehuǥa kayi, baal kew te veyewà he utew mehemut. Timusi niw haazà, ne egkelunsey wey egkehimu he segradu haaza is beyewà. 36 Bekbeka niw is duma kayi taman te egkepurung egkepurbus, ne isawed niw ziyà te etuvangan duen te Kavan te Kebpekid-uyun he zuen te Tulda he Edtelevukaayan, he zutun a ebpekidhinguma kenikew. Kinahanglan he ed-isipen nu heini he utew segradu. 37 Ne kenè kew mebaal te veyewà he para keniyu he iring din su iring te mibpenggamit kayi is ebpenggemiten niw te kebaal. Haazà he veyewà isipa niw he segradu he azen he impehinungud kayi te kediey. 38 Ke zuen minsan hentei keniyu he ebaal te iring dutun he veyewà su ebeelan din he pehemut din, ne kenè niw en sikandin isipa he zuma niw.”