1 Dutun he timpu midsuǥù te Nengazen is sevaha he suluǥuen din he tig-Juda te kedhendiyà te Betel. Ne kebpekeuma zin diyà, ne edhithitindeg si Jeroboam diyà te pemuhatà su ebpemuhat. 2 Midsuǥù haazà is suluǥuen te Nengazen te kedrawak dutun te pemuhatà. Ke sikandin te, “Iyan heini egkeǥiyen te Nengazen mehitenged kayi te pemuhatà: Duen batà he egkeetew ziyà te menge kevuwazan ni David he iyan ngazan din si Josia. Ebpenhimetayan din wey ibpemuhat din kayi he pemuhatà is menge memumuhat he ebpemenilbi ziyà te menge simbahan diyà te metikang he menge lugar wey ebpemuhat kayi he pemuhatà. Egkeepur is menge tulan dan kayi he pemuhatà.” 3 Dutun he andew, mibeǥey haazà is suluǥuen te Megbevayà te tuus he egketuman heini is migkaǥi te Nengazen. Ke sikandin te, “Egketempag heini he pemuhatà ne egkeulaan is avu kayi he pemuhatà.”

4 Ne kegkezineǥa zutun ni Hadì Jeroboam, ne intezù din haazà is etew he ke sikandin te, “Dekepa niw sikandin!” Ne midtinderan is belad duen te hadì, umbe kenè din en igkehendiyà te zizalem is belad din. 5 Ne zutun netempag haazà is pemuhatà ne neulaan is avu zuen, su iyan haazà nekaǥi zuen te suluǥuen te Megbevayà he impahayag kandin te Nengazen.

6 Ne migkaǥi haazà is hadì dutun te suluǥuen te Megbevayà te, “Iampù a kenikew ziyà te Nengazen he Megbevayè nu he vewii zin is belad ku.” Umbe mid-ampù haazà is suluǥuen te Megbevayà diyà te Nengazen, ne neulian is belad dutun te hadì. 7 Ne mid-umanan keǥiyi zutun te hadì haazà is suluǥuen te Megbevayà te, “Duma ka kedì diyà te valey ne kaan ka, ne ebeǥayan ku sikew te gasa.” 8 Piru midtavak haazà is suluǥuen te Megbevayà te, “Minsan ibeǥey nu pa kediey is ketengà te menge azen nu, kenà a eduma kenikew etawa kenà a egkaan etawa ed-inum kayi he lugar. 9 Su mibmenduan a te Nengazen he kenà a megkaan etawa med-inum mintras kayi a, wey emun ed-ulì a ne kenà a mebayà diyà te imbayè ku te kedhengkayi ku.” 10 Umbe, sengezezalan en is mid-ikul zin te ked-ulì din.

11 Dutun he timpu, duen sevaha he meǥurang he ebpeneuven he ziyà ed-ubpà te Betel. Midhendiyà te kandin is menge anak din he menge maama ne midtudtulan dan sikandin te mibeelan duen te suluǥuen te Megbevayà diyà te Betel dutun he andew. Ne elin dan midtudtul is migkaǥi zuen te suluǥuen te Megbevayà diyà te hadì. 12 Ne mid-insà haazà is amey zan te, “Hendei sikandin mebayà hein mid-ulì?” Ne migkaǥi zan kandin ke hendei mebayà. 13 Ne migkaǥi haazà is amey zan diyà te kandan te, “Iandam niw is asnu he egkeuntuzan ku.” Umbe in-andam dan is asnu ne mid-untud sikandin 14 ne midal-as din sikan is suluǥuen te Megbevayà. Neumahan din he ebpimpinuu ziyà te lempek te kayu he ulayan. Mid-insaan din haazà te, “Iyan ke ve sikan is suluǥuen te Megbevayà he ebpuun diyà te Juda?” Ne midtavak te, “Uya.” 15 Ne migkaǥi haazà is meǥurang he ebpeneuven te, “Ebpezumehè ki ziyà te valey su wey ka mekekaan.” 16 Ke sikandin te, “Es, kenà egkehimu ke edliku a wey eduma a kenikew, wey kenà daan egkehimu ke egkaan a etawa ed-inum a zuma kenikew kayi he lugar. 17 Su migkeǥiyan a te Nengazen he kenà a mebayà duen te imbayè ku te kedhengkayi ku.” 18 Migkaǥi haazà is meǥurang he ebpeneuven te, “Ebpeneuven e man daan iring kenikew. Ne midsuǥù te Nengazen is sevaha he velinsuǥuen din kayi te kediey su wey ku sikew hinggata su para mekekaan ka wey mekeinum.” (Piru midtarùtarù haazà is meǥurang he ebpeneuven.) 19 Umbe, miduma kandin diyà te valey zin haazà is suluǥuen te Megbevayà ne migkaan wey mid-inum sikandin dutun.

20 Dutun te ebpimpinuu sikandan uvey te lemisahan, duen migkaǥi te Nengazen duen te meǥurang he ebpeneuven. 21 Dutun migkeǥiyan duen te meǥurang he ebpeneuven sikan is suluǥuen te Megbevayà he ebpuun diyà te Juda te, “Iyan heini egkeǥiyen te Nengazen: ‘Midsupak nu is migkaǥi te Nengazen he Megbevayè nu; wazè nu tumana is insuǥù din kenikew. 22 Migkeǥiyan ke zin te kenè ka megkaan wey med-inum kayi he lugar, piru midlikù ka kayi ne migkaan ka wey mid-inum. Ne tenged kayi te mibeelan nu, ebpatey ka he kenà diyà igkeleveng te midlevengan te menge kepuun nu.’ ”

23 Ne hein nekepasad he egkaan wey ed-inum haazà is suluǥuen te Megbevayà, in-andam duen te meǥurang he ebpeneuven is asnu he egkeuntuzan din te ed-ulì. 24 Ne zutun te ked-ulì din, midhimetayan sikandin te erimaung he midsinuǥung kandin. Nekesesavuk sikandin diyà te zalan is minatey, ne sikan is asnu wey erimaung ne edhithitindeg diyà te avey zin. 25 Ne naahà haazà te menge sumeseǥazà is minatey he lawa wey sikan is erimaung diyà te avey zin, ne midtudtul zan heini ziyà te inged he ed-ubpaan duen te meǥurang he ebpeneuven.

26 Ne hein nezineg heini zuen te meǥurang he ebpeneuven, ke sikandin te, “Iyan sikandin sikan is suluǥuen te Megbevayà he midsupak din is migkaǥi kandin te Nengazen. Imbeǥey sikandin te Nengazen duen te erimaung he mid-etaki wey midhimatey kandin, su iyan heeyan nekaǥi te Nengazen diyà te kandin.” 27 Segugunà migkeǥiyi zuen te meǥurang he ebpeneuven sikan is menge anak din he maama te, “Endama niw is asnu he egkeuntuzan ku.” Ne in-andam dan haazà. 28 Migenat sikandin, ne neehè din haazà is minatey he nekesesavuk diyà te zalan wey sikan is erimaung wey asnu he edhithitindeg diyà te avey zutun. Wazà keena zutun te erimaung haazà ne wazà daan menuwa zuen te asnu. 29 Migkuwa zuen te meǥurang he ebpeneuven haazà is minatey he lawa zuen te suluǥuen te Megbevayà ne ingkarga zin te asnu, ne mid-uwit dutun te meǥurang diyà te inged din su wey sikandin mekelalew tenged kayi, ne wey zin daan ikeleveng heini. 30 Ne inleveng din heini ziyà te penlevengà he mibpeveelan din he para te pemilya zin, ne inlalew zan haazà is kemetayen te kezuzumahi zan.

31 Ne hein ingkeleveng dan en, ne migkeǥiyan duen te meǥurang he ebpeneuven sikan is menge anak din he menge maama te, “Emun ebpatey a ne ziyè e keniyu ileveng te midlevengan duen te suluǥuen te Megbevayà, ne iavey a keniyu kandin. 32 Su is menge lalag he migkaǥi te Nengazen diyà te kandin mehitenged te pemuhatà diyà te Betel wey te menge simbahan diyà te metikang he menge lugar ziyà te Samaria siguradu he egketuman.”

33 Minsan pa te iyan heini nehitavù, mibpedayun gihapun si Jeroboam te mezaat he vaal zin. Mibpilì gihapun sikandin te menge etew he midhimu zin he menge memumuhat diyà te menge simbahan he ziyà te memetikang he menge lugar. Is minsan hentei he egkesuat he edhimuwen he memumuhat mid-urdinahan din. 34 Heini is mibeelan ni Jeroboam nehimu he hinungdan te kebpekesalà te pemilya zin wey nekeuwit te kezeetan wey kemetayen diyà te kandan.