1 Penga niyan, dalem te pegtengteng ko, inabat te Karniro se tagnà te pito pengilala impeket diyà te solat linolon. Penga niyan, dinineg ko se kagi te sebad ayam-ayam metolos, aw iling te daging te kilat se kagi din. Minikagi sikandin, “Ayas ka den.”

2 Penga niyan, kinità ko se kodà mepotì, aw doen heman simakay kenyan nengibing te bosog. Binegayan sikandin te korona amon isangkob diyà te olo din, aw penga niyan, insogò sikandin amon dàgen din se kedita te poon din kidoen te keneyonan.

3 Penga niyan, inabat te Karniro se ikedowa pengilala diyà te solat, aw dinineg ko se ikedowa ayam-ayam metolos minikagi, “Ayas ka den.”

4 Penga niyan, dimateng se doma kodà ontò melalag. Se otaw simakay kenyan, yan se insogò amon mesamok se kedita te otaw te keneyonan, aw yan se doun te megbebolaw dan aw megpeimetayay dan. Doen heman melayat sondang imbegay kandin.

5 Penga niyan, inabat te Karniro se iketelo pengilala diyà te solat, aw dinineg ko se iketelo ayam-ayam metolos minikagi, “Ayas ka den.”

Penga niyan, kinità ko se kodà meitem. Doen heman simakay kenyan nengibing te timbangan. 6 Doen dinineg ko minikagi kidoen te tengà-tengà te epat ayam-ayam metolos. Migpunù sikandin diyà te otaw simakay, kagi din, “Pemehali se kànen dan, so olò sebad litro te trigo se mepakay beyadan te kwarta itandan te sebad se aldaw, aw olò telo litro te sebada se mepakay beyadan te itandan te sebad se aldaw. Meneng ikà eg-alin te keelagà te lana aw bino.”

7 Penga niyan, inabat te Karniro se ikeepat pengilala diyà te solat linolon, aw dinineg ko se ikeepat ayam-ayam metolos minikagi, “Ayas ka den.”

8 Penga niyan, kinità ko se kodà ponsì. Si Kemetayun se ngadan te otaw simakay kenyan, aw si Kemeteyanan se ngadan te doma otaw timaking kandin. Insogò dan amon imetayan dan se ikeepat ketengà te otaw te keneyonan. Imetayan dan pineokit te gira, aw bayil, aw mesakit, aw menenanap te kebenesan.

9 Penga niyan, inabat te Karniro se ikelima pengilala diyà te solat, aw penga niyan doen kinità ko kidoen te kilid te sonoganan te ayam-ayam ibegay diyà te Timanem. Kinità ko se pedowan te kedita te otaw inimetayan tandà te pegtoladà dan te kagi te Timanem, aw tandà te peg-indan dan te kebenalan tepad ki Jesu Cristo. 10 Timawal dan te dakel se kagi dan, “E Pengolo Metolos, ontò ka egkeseligan, aw ontò metòlid se eg-inangen nikaw. Menamay lay pa se pegtoman no te pegpelumun te otaw eg-ogpà kidoen te keneyonan tandà te pegpengimatay dan kenami?”

11 Penga niyan, doen melayat saol mepotì imbegay diyà te teg sebad-sebad kandan. Minikagi heman se Pengolo diyà kandan te keilangan megtagad dan pa te eked kenamay lamig mesikop se kedita te sineligan te Timanem, so doen pa doma dan imetayan iling kandan.

12 Penga niyan, inabat te Karniro se ikeenem pengilala diyà te solat linolon. Penga niyan, doen ontò magsen linog, aw migkeitem se aldaw iling te tila ontò meitem, aw migkelalag se kedakel te bolan iling te dipanog. 13 Nedagdag heman se menge bitoen diyà te tanà iling te pongo te kayo igira posot nelampod te kelamag mebandes. 14 Nealin se kedita te bitoen lekat te langit, iling te peglolon te papil. Neantag aw nealin se kedita te bontod aw polò. 15 Penga niyan, se kedita te otaw, pengkey menge selotan, aw doma otaw limowan, aw menge pengolo te sondalo, aw meyeyaman, aw otaw mebolot, aw kedita te otaw pengkey allang aw kenà allang, mineles dan kidoen te menge ilib aw kidoen te bontod. 16 Timawal dan heman diyà te menge bontod aw dakel bato, kagi dan, “Bonboni kay niyo, aw selibengi kay niyo amon eked kay kitai te Timanem egpenenoo kidoen te onsedanan te peglowan kidoen te langit. Elesi kay niyo amon eked kay detengi te pelumun lekat te Karniro, 17 so dimateng den se aldaw te pegpelumun dan te otaw, aw wedad palos mekelowà kenyan.”