1 Seini se impekità i Jesu Cristo. Ingkeliwat din ini lekat te Timanem diyà te kedita tadon egtolò kandin, amon metaga-taga kidon aw eden se metoman domateng te eked kenamay. Siak si Juan sebad sakop i Jesu Cristo. Doen anghil insogò din amon ipetaga-taga din ini kanak. 2 Simolat a den te kedita te kinità ko, aw eg-indan a kenyo te benal iyan kagi te Timanem aw impetaga-taga i Jesu Cristo.

3 Aw megbasa kaw kani, ontò kaw meluba. Aw menenalan kaw kani, aw tomolò kaw te kebenalan insolat dini, ontò kaw heman meluba, so metoman se kedita te pakang te Timanem te eked kenamay.

4-5 Siak si Juan se simolat kani diyà te kedita niyo menge sakop te pito simbahan kidoen te probinsya te Asya. Ibeg ko tebangan kaw aw begayan kaw heman te kelinaw te pedowan lekat te Timanem, aw Espiritu Santo, aw si Jesu Cristo. Gayed doen Timanem pengkey seini, aw gebii, aw modi heman aldaw. Se Espiritu Santo insogò lekat te langit, gayed din ipegpetaga-taga te metolos sikandin pineokit te pito keokit. Keseligan se kagi i Jesu Cristo. Sikandin se tagnà neantay lekat te nematay amon mengolo diyà te kedita te otaw meantay lekat te nematay. Sikandin se eglowan diyà te kedita te selotan dini te keneyonan. Dakel se pedowan din kenitadon, aw yan impelowà kidon din lekat te salà tadon pineokit te dipanog din te pegkematay din doton te kros. 6 Impeakop kidon din diyà te peglowan din. Ininang kidon din menge sogounun din amon meg-inang kidon te ibeg te Amay din Timanem. Yan mèpiya aw sikandin se iduyun aw lomowan te wedad temanan. Metoman iyan.

7 Na, lomikò si Jesu Cristo domaan te labon. Kitaen te kedita te otaw se pegdateng din, aw komità heman kandin se kedita te otaw nengimatay kandin. Megmatay se otaw te kedita te pongan dini te keneyonan tandà te puluk te pedowan dan, so sikandin se megpelumun kandan. Ontò iyan benal. Metoman iyan.

8 Eglowan se Pengolo tadon Timanem diyà te kedita, aw doen sikandin seini, aw gebii, aw modi heman aldaw. Yan se doun te minikagi sikandin, “Siaken se Alpa aw Omiga.” (Se kelebadan niyan, “Siaken se keteboan aw temanan te kedita.”)

9 Siak si Juan se simolat kani, kedowa niyo te pegpemenal. Iling a kenyo, so medalem heman se pedowan ko te pegtayod ko te pegpemilang dimateng kanak, so siak heman se migpesakop diyà te peglowan te Timanem. Impelumun a te gobirno aw impeibing a doton te polò iningedanan Patmos tandà te pegkeliwat ko te kagi te Timanem aw kebenalan intoladà i Jesu Cristo. 10 Aldaw te Linggo te pegsimba diyà te Pengolo tadon, doen impekità te Espiritu Santo dimateng kanak. Doen dinineg ko minikagi kidoen te getan ko. Iling te peg-edop te bodyong se peg-ikagi din, so ontò dakel. 11 Minikagi sikandin, “Solati se kitaen no, aw peibingi iyan doton te menge sakop te pito simbahan kidoen te Efeso, aw Ismirna, aw Pergamo, aw Tiyatira, aw Sardis, aw Filadelfya, aw Layodisiya.”

12 Pegdineg ko kenyan, miniling a amon kitaen ko se otaw minikagi. Pegbiling ko, kinità ko se pito solò ininang te bolawan. 13 Kidoen te tengà-tengà te pito solò, doen kinità ko iling te bawa te Timanem Migpekeotaw. Melayat se saol din, aw bolawan se in-elen din. 14 Ontò mepotì se logay din so iling te kepotì te sapot. Iling te apoy se mata din. 15 Melalag se benis din iling te galang ininit diyà te apoy aw impesiag. Ontò dakel se peg-ikagi din iling te daging te dakel wayeg egdelog. 16 Lenged te kowanan, inewidan din se pito bitoen. Lekat te bahà din, eglowà se sondang ontò megalang. Iling te aldaw alas dosi se bawa din so ontò iyan simenang.

17 Pegkità ko kandin, ontò a nelemitan aw limemlem a diyà te monà din. Wedà a pekeiwal so iling a te otaw nematay. Meneng pinemàdan a din te kowanan belad din aw impetindeg a din. Minikagi sikandin, “Ikà egkelemitan. Siaken se keteboan aw temanan te kedita. 18 Siak se doen pedowan wedad temanan. Inimetayan a, aw eked a den todà palos kematay. Siaken olò se mekebatog meg-antay te otaw lekat te nematay. Aw matay se otaw, siak olò se mekesogò aw kenan dan peogpai. 19 Nayan, solati se impekità ko den kamno, sìyan neinang den seini, aw sìyan heman ipekità ko kamno metoman te modi aldaw. 20 Ipetaga-taga ko den kamno se kedegdagan te pito bitoen kinità no inewidan ko diyà te kowanan, aw kedegdagan te pito solò ininang te bolawan. Sìyan pito bitoen, yan se menge anghil egtonggò te menge sakop te pito simbahan, aw se pito solò, yan se pito simbahan.”