1 Nayan, menge kedowa ko, ibeg ko meluba kaw tandà te pegpesakop tadon diyà te Pengolo tadon. Eked a pegkelomay pengkey sobloden ko se impunù ko kenyo kedengan, so aw tomolò kaw kenyan, eked kaw keekali. 2 Peg-ahà kaw te menge otaw egtewalen ko menge toyang. Medaet se eg-inangen dan, so egtoladà dan te eked kidon sekopi te Timanem singed aw tomolò kidon te punù ingkeliwat i Moises aw megpetolì kidon. 3 Meneng sikitadon se doen pengilala te ontò kidon sakop te Timanem, so egsimba kidon te Timanem pineokit te tabang te Espiritu Santo, aw doen den keluba tadon lekat ki Jesu Cristo. Impelowà kidon den lekat te salà, meneng kenà iyan pineokit te pegtolò tadon te punù ingkeliwat i Moises. 4 Simpana ipelowà se otaw tandà te inang din aw pegkeotawun din, siaken se ontò ipelowà, so pengkey sinu otawi se eg-aneng-aneng te ipelowà sikandin pineokit te inang din aw pegkeotawun din, labi a pa melangkaw diyà kandin. 5 Tinolì a te ikewalo aldaw lekat te pegtebaw ko iling te punù te kemonaan ko. Siak se sebad bowad-bowad i Israel, aw nesakop a diyà te pongan i Benjamin. Ontò a Judiyo, aw timaking a te ketanem te menge kemonaan ko. Ontò a timolò te menge punù ingkeliwat i Moises, so migpesakop a diyà te gropo iningedanan Parisiyo. 6 Ontò a measeb igsà nemilang a te menge otaw egpemenal ki Cristo. Ontò metòlid se pegtolò ko te menge punù ingkeliwat i Moises igsà wedad palos punù linèpangan ko. 7 Kedengan iman ko doen ontong ko kenyan, meneng songkani limengà a den te pegsalig ko te punù sìyan, so migpesakop a den diyà ki Cristo. 8 Yan pengkey eden se mèpiya inang ko kedengan, netegahan ko den te wedad palos ontong ko kenyan, so labi pa mèpiya se pegtaking ko te Pengolo tadon si Jesu Cristo. Pegpemenal ko kandin, tinenanan ko se kedita te doma egseligan ko. Tinenanan ko se wedad ontong amon tomaking a ki Cristo, 9 aw amon meinang a sakop din. Wedà peg-aneng-aneng se Timanem te metòlid a pineokit te pegtolò ko te menge punù ingkeliwat i Moises, meneng eg-aneng-aneng se Timanem te metòlid a pineokit olò te pegsalig ko ki Cristo, so eneng-enengen te Timanem te metòlid se kedita te otaw somalig ki Cristo. 10 Ibeg ko den ontò a metaga-taga kandin. Ibeg ko heman tebangan a din pineokit te tolos eggemiten din lekat te pegkeantay din lekat te nematay. Ibeg ko heman mekeiling a kandin pengkey detengan a te kelimahan iling te kelimahan dimateng kandin, aw pengkey imetayan a iling te pegkematay din, 11 so egpeliman a te mekeakop a heman diyà te menge otaw entayen din lekat te nematay.

12 Eked a ikagi te netoman ko den se kedita niyan. Eked a heman ikagi te neinang a den te Timanem ontò metòlid. Meneng measeb a pa egtaking te ibeg din, so yan se doun te pegsakop i Jesu Cristo kanak. 13 Menge kedowa ko, wedà a peg-aneng-aneng te netoman ko den se kedita niyan, meneng seini se eg-inangen ko. Egkelibelan ko se kedita te ininang ko, aw gayed a egpekagsen amon mapet a te temanan. 14 Gayed a egpekagsen iling te otaw egkoyà gayed egkagnan pesalo doton te temanan amon mekekinawà a te ontong ibegay te Timanem kanak, so tinawal a din meg-ogpà doton te langit tandà te ininang i Jesu Cristo kanak.

15 Nayan, sikiyo menge otaw nelobos se pegpemenal niyo, keilangan iling te kanak aneng-aneng se aneng-aneng niyo tepad te inikagi ko sìyan. Aw kenà iling te kanak aneng-aneng se aneng-aneng niyo, ipetaga-taga te Timanem kenyo aw eden se ontò kebenalan. 16 Meneng keilangan gayed kidon tomolò te kedita te kebenalan impetaga-taga din den kenitadon.

17 Menge kedowa ko, ibeg ko meg-iling se kedita niyo kanak. Sikami se gegonan niyo, aw keilangan peg-ilingan niyo se menge otaw mig-iling kenami. 18 Doen melikit ko in-indan kenyo, meneng pengkey mekepuluk te pedowan ko, sobloden ko pa iyan seini. Doen menge otaw egpetaga-taga te egkebensihan dan se pegkematay i Cristo doton te kros pineokit te medaet eg-inangen dan. 19 Meneng metoman dan detengan te pelumun te Timanem, so olò dan eg-aneng-aneng tepad te ibeg te lawa dan. Keilangan meyàyà dan tandà te medaet inang dan, meneng egpelangkaw-langkaw dan. Kenà dan eg-aneng-aneng tepad te Timanem, so olò dan eg-aneng-aneng tepad te keogpà dan dini lanto te tanà. 20 Meneng kenà iling kenyan se kedita tadon egpemenal ki Cristo, so migpesakop kidon diyà te peglowan te Timanem doton te langit. Yan se lekatan te Pengolo egpelimanan tadon, si Jesu Cristo egpelowà kenitadon. 21 Aw lomikò sikandin, inangen din iling te lawa din eked kematay se lawa tadon egkematay. Yan se inangen din pineokit te tolos din, so metolos sikandin aw mekedaeg sikandin te kedita pengkey kenan amon lomowan sikandin diyà kandan.