1 Pegtoladà i Jesus te menge otaw netipon kidoen te dakel simbahan, migtoladà sikandin tepad te Mèpiya Indan. Dalem te pegtoladà din, dimateng se menge pengolo te simbahan aw menenoladà te punù aw menge obanen te Judiyo. 2 Minikagi dan, “Indani kay te nengà lay eg-inang ka te kedita nini. Sinu lay se simogò kamno?”

3 Timaba si Jesus, “Doen heman insà ko kenyo. Na, indani a niyo. 4 Sinu lay se simogò ki Juan amon memonyag? Timanem, aw otaw se simogò kandin?”

5 Penga niyan, migpebelaw-belaway dan aw eden se itaba dan kandin. Minikagi dan, “Simpana tomaba kidon te Timanem se simogò ki Juan, silahen kidon din, so wedà kidon pemenal ki Juan. 6 Meneng simpana tomaba kidon te olò otaw se simogò ki Juan, bontogan kidon te kedita te otaw te bato lamig matay kidon, so nenamay dan mig-aneng-aneng te ontò telekeliwat te kagi te Timanem si Juan.”

7 Yan se doun te timaba dan ki Jesus te wedà dan ketegahi aw sinu se simogò ki Juan. 8 Minikagi si Jesus, “So wedà kaw taba te insà ko, eked a peg-indan diyà kenyo aw sinu se simogò kanak.”

9 Nayan, mig-indan si Jesus te tegdeyanan seini diyà te medita otaw netipon kidoen, kagi din, “Doen otaw migpawà aw nenanem te paras. Penga niyan, impetonggò din iyan te menge doma otaw, aw dimoton sikandin te mediyò ogpeanan amon meg-ogpà te ontò menamay. 10 Pegdateng te aldaw te peglegani, doen sineligan insogò te tig-apò amon doen talad te paras ebaten din lekat te otaw impetonggò din. Meneng pegdateng te sineligan doton kandan, binadas dan sikandin aw impekesayo dan te wedad palos imbegay kandin. 11 Penga niyan, doen doma sineligan insogò te tig-apò. Meneng binadas dan heman sikandin, aw ontò dan pigyàyà, aw impekesayo dan te wedad palos imbegay kandin. 12 Penga niyan, doen iketelo sineligan insogò te tig-apò. Meneng ontò dan sikandin impeeleg, aw ginoyod dan doton te lowà te pawà. 13 Penga niyan, mig-aneng-aneng se tig-apò, ‘Megmeno a? Mèpiya aw isogò ko se batà ko egkedekelan ko te pedowan, so keilangan segmanen dan sikandin.’ 14 Meneng pegdateng te batà din doton kandan, migpebelaw-belaway dan, ‘Seini se meketig-apò te tanà seini aw matay se amay din. Mèpiya aw imetayan tadon sikandin amon sikitadon se meketig-apò te tanà seini.’ 15 Penga niyan, ginoyod dan sikandin doton te lowà te pawà aw inimetayan dan sikandin.

“Nayan, meg-indan a den diyà kenyo aw eden se inangen te tig-apò diyà kandan. 16 Domoton sikandin aw imetayan din se kedita dan. Penga niyan, ipetonggò din se pawà din te doma otaw.”

Nayan, pegdineg te menge otaw te tegdeyanan sìyan, minikagi dan, “Eked iyan peden ketoman.”

17 Meneng timengteng si Jesus diyà kandan aw minikagi, “Meneng keilangan iyan metoman, so doen kagi te Timanem insolat,

19 Na, se menge menenoladà te punù aw pengolo te simbahan, netegahan dan te sikandan se nesogatan te tegdeyanan sìyan in-indan i Jesus, aw yan se doun te ibeg dan megdakep peden kandin te aldaw sìyan. Meneng wedà dan peketoman, so nelemitan dan te menge otaw gayed egpenenalan kandin aw domapit dan kandin. 20 Yan olò dan migtagad te mèpiya aldaw. Doen heman menge otaw insogò dan migpelingo-lingo te tomaking kandin, meneng olò dan nengemahà aw doen kemalì te ikegiyen din amon doen idimanda dan tepad kandin aw ipedakep te gobirnador. 21 Minikagi dan diyà kandin, “Sir, netegahan day te ontò benal se eg-ikegiyen no aw ipegtoladà nikaw. Pengkey sinu se otaw toledaan no, gayed ka egtoladà te kebenalan tepad te ibeg te Timanem. 22 Nayan, indani kay den. Lomàpang kidon lay te menge punù ingkeliwat i Moises aw mayad kidon te mihoras diyà te gobirno te Roma? Mepakay lay aw eked?”

23 Meneng netegahan i Jesus te medaet se tod dan te peg-insà dan kenyan. Yan minikagi sikandin, 24 “Pekitai niyo kanak se kwarta ipegbayad niyo te mihoras. Sinu lay bawa se insawol kidoen? Sinu lay ngadan se insolat kidoen?”

Timaba dan, “Selotan te Roma.”

25 Minikagi si Jesus, “Yan begayi niyo diyà te selotan se keilangan ibegay niyo diyà kandin, aw begayi niyo heman diyà te Timanem se keilangan ibegay niyo diyà kandin.”

26 Pengkey ibeg dan doen kemalì te kagi din diyà te otaw netipon kidoen, meneng wedad palos kemalì kinità dan. Nepela dan tandà te pegtaba din kenyan, aw nepenek dan.

27 Doen heman menge Sadusiyo dimoton ki Jesus. Yan se menge otaw egtoladà te eked palos keantay se otaw lekat te nematay. 28 Mig-insà dan diyà ki Jesus, kagi dan, “Sir, doen impunù i Moises kenitadon tepad te inangen te telekedowa meama. Aw matay se meama te wedad pa batà te esawa din, keilangan mengognan se kedowa te nematay diyà te nayi din nebalo, amon doen peden batà te kedowa din nematay. 29 Nayan, doen ekon pito telekedowa meama. Nengognan se kakay dan, aw nematay sikandin te wedad pa batà dan. 30 Penga niyan, nengognan se ikedowa meama te nayi din nebalo, meneng nematay heman sikandin. 31 Penga niyan, nengognan heman kandin se iketelo meama. Migpetibos-tibosay se pito telekedowa nengognan te bayi sìyan, meneng nematay se kedita dan te wedad pa palos batà dan. 32 Penga niyan, nematay heman se bayi. 33 Nayan, indani kay. Aw meantay se otaw lekat te nematay, sinu lay lebò diyà kandan se ontò esawa te bayi sìyan? So migpetibos-tibosay dan se pito nengognan kandin.”

34 Minikagi si Jesus, “Gayed pa egpengognan se otaw dini te keneyonan. 35 Meneng kidoen te langit, eked den pengognan se otaw pinemallì te Timanem aw entayen din dan lekat te nematay. 36 Eked dan todà kematay, so iling dan te menge anghil. Meinang dan menge batà te Timanem, so entayen din dan lekat te nematay. 37 Metoman dan meantay lekat te nematay, so impetaga-taga iyan heman i Moises. Pegsolat din tepad te pegpekità te Timanem diyà kandin kidoen te sagbet limegdeg, tinawal din se Pengolo ‘Timanem gayed egseligan i Abraham, aw si Isaac, aw si Jacob.’ 38 Kenà otaw wedad pedowan se egsalig te Timanem, meneng otaw doen pedowan se egsalig kandin. Yan se doun te keilangan ketegahan tadon te doen keentayan te lawa te otaw nematay, so binegayan dan te Timanem te kaling pedowan wedad temanan.”

39 Doen kidoen menge menenoladà te punù, aw minikagi dan, “Sir, ontò mèpiya se intaba no kandan.”

40 Penga niyan, wedad palos otaw migtelaman mig-insà kandin.

41 Minikagi si Jesus, “Pengkey benal se ipegtoladà dan te bowad-bowad i David se Misiyas isogò te Timanem dini kenyo, 42 meneng minikagi si David te Pengolo din se Misiyas, so simolat si David kidoen te libro te Delangan,

45 Dalem te pegpenenalan te medita otaw ki Jesus, minikagi sikandin diyà te menge tinoledaan din, 46 “Peg-ahà kaw te menge menenoladà te punù ingkeliwat i Moises. Gayed dan egpenaol te melayat, aw ibeg dan segmanen dan te doma otaw doton te pedyanan. Ibeg dan heman menenoo doton te mèpiya onsedanan kidoen te simbahan te Judiyo. Ibeg dan heman, aw doen dakel kànen, sikandan se monà ipekaen. 47 Meneng sikandan se eg-agaw te kedònan te bayi balo, aw penga niyan menamay se pegtawal-tawal dan amon megpelingo-lingo dan te melobos se pedowan dan diyà te Timanem. Meneng metoman dan ontò ipelumun labi pa diyà te doma otaw.”