4
Pegboyo ki Jesus
Luc. 4:1-13; Mat. 4:1-11; Mar. 1:12-13
1 Egbeyà-beyaan si Jesus te Espiritu Santo. Pegkesayo din lekat te wayeg te Jordan, inibing sikandin te Espiritu Santo doton te kebigtilan. 2 Mig-ogpà sikandin kidoen taman te kepatan se aldaw, aw binoyo i Satanas. Peg-ogpà din kidoen, wedad palos kinaen din, aw penga niyan binallos sikandin. 3 Minikagi si Satanas, “Aw ontò ka Batà te Timanem, inangi pan se bato seini pineokit te tolos no amon doen kànen nikaw.”
4 Meneng minikagi si Jesus, “Eked a, so doen kagi te Timanem insolat,
‘Kenà olò kànen se keilangan te otaw amon eked kematay.’ ”
5 Penga niyan, inibing i Satanas si Jesus doton te melangkaw bontod, aw te wedà kenamay, impekità din kandin se kedita te ogpeanan te keneyonan. 6 Minikagi si Satanas, “Inangen ta otaw lomowan diyà te kedita te otaw kidoen, aw begayan ta heman te kèpiya niyan, so siak se eg-awid te kedita niyan diyà te belad ko, aw mekebegay a kenyan diyà te pengkey sinu se pemellien ko. 7 Aw simbahen a no, ibegay ko kamno se kedakel niyan.”
8 Meneng minikagi si Jesus, “Eked a, so doen kagi te Timanem insolat,
‘Timanem se Pengolo niyo aw sikandin se keilangan simbahen niyo, so sikandin olò se mepakay tekingan niyo.’ ”
9 Penga niyan, inibing i Satanas si Jesus doton diatas te dakel simbahan te Jerusalem. Minikagi si Satanas, “Nayan, aw ontò ka Batà te Timanem, kahang ka doton te tanà. 10 Eked ka elegi, so doen kagi te Timanem insolat,
‘Isogò te Timanem se menge anghil amon meg-ipat dan kamno.’
11 Doen heman kagi te Timanem insolat,
‘Ewidan ka te menge anghil, aw engaten ka dan amon eked ka kesongkol te bato.’ ”
12 Meneng timaba si Jesus, “Eked a, so doen kagi te Timanem insolat,
‘Ikà niyo egtandà te Timanem.’ ”
13 Nayan, pegketaga-taga i Satanas te eked keboyo si Jesus aw wedad den doma iboyo din kandin, nesayo sikandin aw migtagad te doma aldaw.
Pegtebò i Jesus migtoladà
Luc. 4:14-15; Mat. 4:12-17; Mar. 1:14-15
14 Ontò egbeyà-beyaan te Espiritu Santo si Jesus. Dimoton sikandin te probinsya te Galiliya, aw dimineg se kedita te otaw kidoen te dengeg din. 15 Timeped sikandin te menge simbahan te Judiyo amon megtoladà, aw induyun sikandin te kedita te otaw.
Wedà segmani si Jesus kidoen te Nasarit
Luc. 4:16-30; Mat. 13:53-58; Mar. 6:1-6
16 Penga niyan, minolì si Jesus doton te Nasarit. Yan se lonsod tinillesan din. Pegkesebado, dimoton sikandin te simbahan te Judiyo, so yan se ketanem din. Timindeg sikandin amon megbasa te kagi te Timanem. 17 Imbegay dan diyà kandin se libro insolat te telekeliwat te kagi te Timanem gebii si Isaias. Migbeka sikandin kenyan aw migbasa te kagi seini,
18 “Dini kanak se Espiritu Santo, so pinemallì a din amon megtoladà a te Mèpiya Indan diyà te menge otaw sagkep. Insogò a din amon mikagi a diyà te menge otaw kineleboso te ipelowà den dan te Timanem. Insogò a heman amon mikagi a diyà te menge otaw bota te komità den dan. Insogò a din amon megpelowà a te kedita te otaw nelimahan, 19 aw amon megpetaga-taga a te dimateng den se aldaw te ipekità te Pengolo se keido din.”
20 Penga te pegbasa din kenyan, linolon din se libro aw in-olì din diyà te egpengibing te simbahan. Penga niyan, nenenoo si Jesus amon megtoladà. Penga niyan, netingen se kedita te otaw aw timengteng dan diyà kandin. 21 Nayan, migtebò si Jesus migtoladà, kagi din, “Seini aldaw, netoman den se kagi te Timanem dinineg niyo.”
22 Mig-aneng-aneng se kedita te otaw te mèpiya se kagi din, aw nepela dan kenyan so eden dan aw olò sikandin batà i Jose. 23 Minikagi heman si Jesus, “Meibeg kaw besi megpeaneng-aneng kanak te eg-ikegiyen tadon, ‘Aw doktor ka, keilangan ipetaga-taga no iyan pineokit te pegbolong no te kamno pegkeotawun.’ Dinineg niyo den te doen menge kepelahan ininang ko doton te Kapirnaom, aw mikagi kaw besi heman diyà kanak te keilangan inangen ko heman se menge kepelahan dini te kanak probinsya. 24 Meneng eneng-enengi niyo se kagi ko seini. Kenà egsegmanen se telekeliwat te kagi te Timanem kidoen te kandin probinsya. 25 Seini se kebenalan ipeaneng-aneng ko kenyo. Gebii dalem te pegkeliwat i Elias te kagi te Timanem, wedad palos odan taman te telo se omay aw enem se bolan, aw doen heman ontò medaet bayil dini te kedita te ogpeanan te kemonaan tadon. Pengkey medita se bayi balo nelimahan dini te Judiya, 26 meneng kenà dan se sinogoan te Timanem ki Elias, so insogò din si Elias megtabang te bayi balo kenà Judiyo eg-ogpà kidoen te Saripta sakop te Sidon. 27 Iling heman kenyan se neinang dalem te pegkeliwat i Eliseo te kagi te Timanem. Pengkey medita se Judiyo pigtompig, meneng kenà dan se pinegolian din, so olò din pinegolian se kenà Judiyo si Naaman sakop te Sirya.”
28 Se otaw netipon kidoen, yan se menge Judiyo. Pegdineg dan te egkeidowan te Timanem se menge otaw kenà Judiyo, yan se doun te neopal se kedita dan. 29 Penga niyan, timindeg dan aw impelowà dan sikandin lekat te lonsod dan. Kidoen diatas te bontod se lonsod dan. Yan inibing dan si Jesus doton te pangpang niyan amon idagdag dan sikandin. 30 Meneng minokit si Jesus diyà te tengà-tengà te otaw netipon, aw nesayo sikandin.
Otaw dinetengan te bosaw
Luc. 4:31-37; Mar. 1:21-28
31 Nayan, dimoton si Jesus te lonsod te Kapirnaom sakop te probinsya te Galiliya. Pegkesebado, migtoladà sikandin. 32 Ontò nepela se kedita te otaw dimineg te intoladà din, so tinekingan si Jesus te tolos. 33 Kidoen te simbahan te Judiyo, doen otaw dinetengan te bosaw. Timawal sikandin aw dakel se kagi din, 34 “Tay, Jesus tege Nasarit. Ikà egsamok kenami. Eked kay keibeg aw pegbàtan kay nikaw. Netegahan ko aw sinu ka. Sikona se metòlid otaw insogò te Timanem.”
35 Meneng migsagda si Jesus te bosaw, kagi din, “Kepenek ka. Lowà ka den lekat kandin.”
Penga niyan, imbontog te bosaw se otaw sìyan aw limowà lekat kandin, meneng wedà elegi se otaw. 36 Nepela se kedita te otaw, aw migpebelaw-belaway dan, “Tay law. Sebad se ipegtoladà din. Ontò sikandin metolos, so aw megpelowà sikandin te menge bosaw, egtolò dan kandin.”
37 Penga niyan, ontò nedengeg si Jesus kidoen te kedita te ogpeanan medapag doton.
Pinegolì i Jesus se medita otaw
Luc. 4:38-41; Mat. 8:14-17; Mar. 1:29-34
38 Pegkesayo i Jesus lekat te simbahan te Judiyo, dimoton sikandin te balay i Simon iningedanan din ki Pedro. Pegdateng din doton, ontò netigdaan se ogangan i Pedro bayi piglegenaw, aw nemoyò dan te tabang din. 39 Penga niyan, dimoton si Jesus kandin, aw migpetunung te keinit te lawa din. Pegketà migkèpiya sikandin, aw minenaw amon meg-inang te kànen i Jesus aw menge doma din.
40 Pegsallep te aldaw, inibing dan doton ki Jesus se kedita te doma dan doen medita kemolò te mesakit. Pinemàdan din se kedita dan aw negolian dan. 41 Doen heman medita otaw dinetengan te bosaw inibing doton ki Jesus. Peglowà te bosaw, timawal dan, “Sikona se Batà te Timanem.”
Meneng sinagda i Jesus te menge bosaw amon eked dan ikagi, so netegahan dan te sikandin se Misiyas insogò te Timanem.
Migtoladà si Jesus doton te Galiliya
Luc. 4:42-44; Mar. 1:35-39
42 Pegkeiselem niyan, nesayo si Jesus aw dimoton te wedad otaw eg-ogpà amon megtawal-tawal. Meneng nengemahà se medita otaw kandin. Pegkità dan kandin, ontò dan peden sikandin temengan. 43 Meneng minikagi si Jesus, “Keilangan domoton a heman te doma lonsod amon megtoladà a kandan te Mèpiya Indan tepad te peglowan te Timanem, so yan se doun te insogò a din.”
44 Penga niyan, migtoladà si Jesus kidoen te menge simbahan te Judiyo doton te kedita te ogpeanan dan.