1 Pegkepenga te peg-ikagi i Jesus diyà te menge tinoledaan din, limengag sikandin doton te langit aw migtawal-tawal, kagi din, “Amà, dimateng den se oras pinemallì nikaw. Pekitai te melangkaw se Batà nikaw, amon ipekità ko heman te melangkaw ka. 2 Insalig no kanak se peglowan diyà te kedita te otaw amon mekebegay a te kaling pedowan wedad temanan diyà te kedita te otaw imbegay no kanak. 3 Seini se otaw doen kaling pedowan wedad temanan, se otaw netaga-taga kamno, sebad no se ontò benal Timanem, aw netaga-taga heman kanak, si Jesu Cristo insogò no dini te keneyonan. 4 Impekità ko den dini te keneyonan te melangkaw ka, so tinoman ko den se kedita te impunù no kanak. 5 Nayan Amà, pekitai heman kidoen te langit te melangkaw a, iling te kelangkaw ko gebii te pegdoma ko kamno te wedà pa inangi se keneyonan.

6 “Migpetaga-taga a kamno diyà te kedita te otaw seini insalig no kanak dini te keneyonan. Pinemallì no dan, aw imbegay no dan kanak, aw timolò dan te impunù no kandan. 7 Netegahan den dan te lekat kamno se kedita te insalig no kanak. 8 Ingkeliwat ko diyà kandan se kebenalan insalig no kanak, aw nemenal den dan kenyan. Netegahan den dan heman te benal sikona se tinikedowan ko. Nemenal den dan te insogò a nikaw.

9 “Doen den pemoyoen ko kamno tepad te menge otaw seini. Kenà tepad te menge otaw egtaking te medaet dini te keneyonan se pemoyoen ko kamno, meneng tepad te menge otaw insalig no diyà kanak, so sakop no dan. 10 Se kedita te sakop ko, yan se sakop no heman. Se kedita dan diyà kamno, diyà dan heman kanak, aw impekità te melangkaw a pineokit kandan. 11 Nayan, agpet a den molì doton kamno, aw eked a peg-ogpà dini te keneyonan. Meneng meg-ogpà pa dini te keneyonan se kedita te sakop ta. Amà, metòlid se kedita te eg-inangen nikaw. Peg-ipat ka kandan amon eked dan soway lekat te kebenalan tepad te kamno pegkeotawun insalig no kanak. Peg-ipat ka kandan amon megsebad dan te pedowan, iling te pegsebad te pedowan ta. 12 Dalem te pegdoma ko kandan, mig-ipat a kandan amon eked dan soway lekat te kebenalan tepad te kamno pegkeotawun insalig no diyà kanak. Migtonggò a kandan, aw yan se doun te wedad palos nebàtan kandan. Meneng sebad se kebàtan, sìyan sakop te medaet, amon metoman se kagi tapay no impesolat tepad kandin. 13 Nayan, agpet a den molì doton kamno. Dalem te dini a pa te keneyonan, minikagi a kani amon ontò dan meluba iling te keluba ko. 14 Ingkeliwat ko den kandan se kagi no, so netegahan ko te kebensihan dan kwani te menge otaw medaet dini te keneyonan. Kebensihan dan so kenà dan egtaking te otaw medaet dini te keneyonan. Iling heman kanak, kenà a egtaking te otaw medaet dini te keneyonan. 15 Memoyò a den kamno kenà amon ebaten no dan lekat te otaw egtaking te medaet dini te keneyonan, meneng ibeg ko meg-ipat ka kandan amon eked dan keekali i Satanas. 16 Kenà a egtaking te otaw medaet dini te keneyonan, aw iling heman kanak se menge sakop ta, so kenà dan egtaking te otaw medaet dini te keneyonan. 17 Se kedita te sakop ta, ibeg ko inangen no dan otaw ontò egpenimanem pineokit te kebenalan lekat kamno, so benal se kedakel te kagi nikaw. 18 Insogò a no dini te keneyonan, aw yan isogò ko den dan megtoladà te kedita te otaw dini te keneyonan. 19 Amon ketebangan ko dan, ibegay ko den kamno se pegkeotawun ko tomolò te ibeg no, amon memegay dan heman kamno te pegkeotawun dan aw melobos heman se pegtolò dan te ibeg no kandan.

20 “Kenà olò sakop ta seini se intawal-tawal ko den diyà kamno, meneng kedita heman te doma otaw memenal kwani kanak pineokit te itoladà dan kandan. 21 Ibeg ko megsebad dan te pedowan, iling te pegsebad te pedowan ta seini, so sikona Amà, diyà ka kanak, aw diyà a heman kamno. Iling heman kenyan, ibeg ko diyà dan kenita, amon memenal se kedita te otaw dini te keneyonan te insogò a nikaw. 22 Imbegay ko den kandan se kelangkaw imbegay no kanak, amon megsebad dan te pedowan iling te pegsebad te pedowan ta, 23 so diyà a kandan aw diyà ka kanak. Ibeg ko, ontò dan megsebad te pedowan amon ketegahan te kedita te otaw dini te keneyonan te sikona se simogò kanak, aw dakel se pedowan no kandan iling te kedakel te pedowan no kanak.

24 “Amà, se menge otaw insalig no diyà kanak, ibeg ko gayed dan meg-ogpà doma kanak kidoen te langit, amon komità dan te kelangkaw ko imbegay no kanak, so dakel se pedowan no kanak gebii te wedà pa inangi se keneyonan. 25 E Amà, metòlid se kedita te eg-inangen nikaw. Se otaw egtaking te medaet dini te keneyonan, wedà dan ketegahi aw sinu ka, meneng netaga-taga a kamno, aw netegahan heman te menge sakop ta seini te insogò a nikaw. 26 Impetaga-taga ko den kandan tepad te pegkeotawun no, aw doen pa ipetaga-taga ko kandan tepad kenyan, so ibeg ko, megpedekelay dan te pedowan iling te kedakel te pedowan no kanak, aw meg-ogpà a heman diyà te pedowan dan.”