1 “Iling a te ontò pinonoan te belagen te paras, aw Amay ko se iling te otaw eg-ipat te paras. 2 Aw doen metesan belagen kidoen kanak kenà egpongo, yan se tepoen din. Meneng se kedita te belagen egpongo kidoen kanak, yan se linisan din amon labi pa dakel se paras mongo kidoen kenyan. 3 Lininisan kaw den pineokit te kebenalan intoladà ko kenyo. 4 Keilangan meg-ogpà kaw diyà kanak aw meg-ogpà a heman diyà kenyo, so eked pongo se belagen singed aw meg-ogpà diyà te pinonoan. Iling kaw heman kenyan, so wedad ontong niyo singed aw meg-ogpà kaw diyà kanak.

5 “Siaken se iling te pinonoan, aw sikiyo se iling te menge belagen ko. Aw meg-ogpà se otaw diyà kanak aw meg-ogpà a heman diyà kandin, yan se otaw mongo te dakel. Meneng aw tomani kaw kanak, wedad palos mebatog niyo. 6 Aw eked peg-ogpà se otaw diyà kanak, iagbel ko sikandin iling te menge belagen tepoen aw iagbel. Aw melangkay iyan, tiponen aw sonogen. 7 Meneng aw meg-ogpà kaw diyà kanak, aw isawol niyo se menge kagi ko kidoen te pedowan niyo, mepakay aw memoyò kaw te keibegan niyo, aw yan se inangen ko kenyo. 8 Iduyun se Amay ko pineokit te pegpemongo niyo te dakel, aw yan se kitaen te tinoledaan ko sikiyo. 9 Dakel se pedowan te Amay ko kanak. Iling heman kenyan se kedakel te pedowan ko kenyo. Peg-ogpà kaw diyà kanak amon gayed dakel se pedowan ko kenyo. 10 Aw tomolò kaw te impunù ko kenyo, yan ketegahan niyo te dakel se pedowan ko kenyo, iling te timolò a te impunù te Amay ko kanak, aw netegahan ko te dakel se pedowan din kanak.

11 “Seini se intoladà ko kenyo amon makop kaw heman diyà te keluba ko, so ibeg ko ontò kaw meluba. 12 Seini se ipunù ko kenyo. Keilangan megpedekelay kaw te pedowan iling te kedakel te pedowan ko kenyo. 13 Aw meketagad se otaw somelilin te menge sigalak din imetayan, yan se pengilala te ontò dakel se pedowan din kandan. 14 Aw tomolò kaw te menge punù ko kenyo, sikiyo se menge sigalak ko. 15 Lekat seini, eked ko sikiyo tewali menge sineligan ko, meneng tewalen ko sikiyo menge sigalak ko. Se menge sineligan, eked dan ketegahi aw eden se tod te amo dan. Meneng sikiyo se menge sigalak ko, so impetaga-taga ko kenyo se kedita te intoladà te Amay ko kanak. 16 Kenà sikiyo se nemallì kanak, meneng siak se nemallì kenyo, aw isogò ko den sikiyo amon megterbaho kaw kanak aw mongo kaw heman te dakel pongo wedad keeminan. Yan aw doen pemoyoen niyo diyà te Amay ko pineokit te ngadan ko, yan se ibegay din kenyo. 17 Seini se impunù ko kenyo. Keilangan megpedekelay kaw te pedowan.”

18 “Aw kebensihan kaw te menge otaw egtaking te ketanem te keneyonan, keilangan eneng-enengen niyo te tapay a dan heman nebensihan te wedà kaw dan pa kebensihi. 19 Simpana sakop kaw te menge otaw sìyan, sigalak kaw dan so onawa kaw kandan. Meneng kenà kaw den sakop dan, so nemallì a den kenyo aw impelowà ko den sikiyo lekat kandan. Yan se doun te kebensihan kaw dan. 20 Eneng-enengi niyo se inikagi ko diyà kenyo kedengan. Wedad sineligan labi pa melangkaw diyà te amo din. Aw nemilang se menge doma otaw kanak, memilang dan heman kenyo. Aw timolò dan te kanak toladà, tomolò dan heman te kenyo toladà. 21 Meneng wedà dan ketaga-taga te simogò kanak, aw yan se doun te memilang dan heman kenyo, so migpesakop kaw diyà kanak. 22 Simpana wedà a dini amon megtoladà a kandan, yan eked heman petega-tegahi se salà dan seini. Meneng so dimini a, eked den dan pekeikagi te wedad salà dan. 23 Aw mebensi se otaw kanak, mebensi dan heman te Amay ko. 24 Simpana wedà dan kità te menge kepelahan ininang ko eked keinang te doma otaw, eked dan heman petega-tegahi te doen salà dan. Meneng nebensi dan kanak aw Amay ko, pengkey kinità dan se kepelahan ininang ko. 25 Pineokit te pegkebensi dan, netoman den se kagi tapay insolat diyà te kagi te Timanem,

26 “Isogò ko dini kenyo se Teletabang lekat te Amay ko. Yan se Espiritu Santo megtoladà kenyo te kebenalan. Aw domateng sikandin lekat te Amay ko, meg-indan sikandin te kebenalan tepad kanak. 27 Meg-indan kaw heman diyà te doma otaw tepad kanak, so migdoma kaw kanak lekat te ketebò te pegtoladà ko lamig seini.