10
1 Nayan, se menge punù ingkeliwat i Moises, yan olò se pengilala te doen pa domateng labi pa mèpiya kenyan. Se kedita te mèpiya dimateng den kenitadon pineokit te ininang i Cristo, yan se neketepad aw nekeselilin te menge punù ingkeliwat i Moises. Se menge otaw timaking te menge punù ingkeliwat i Moises, keilangan gayed dan imetayan se ayam-ayam ibegay diyà te Timanem te kelikit te omay. Pengkey yan se egtekingan dan, eked peg-aneng-aneng se Timanem te metòlid dan. 2 Simpana lininisan dan te Timanem lekat te salà pineokit te pegpengimatay dan te ayam-ayam ipegpemegay dan diyà kandin, metaga-taga dan te pegwedaden din se salà dan, aw mepakay dan lomengà te pegpengimatay dan te ayam-ayam. 3 Meneng so keilangan mengimatay dan te ayam-ayam te kelikit te omay, neeneng-enengan dan te gayed doen salà dan, 4 so eked palos keabat se salà te otaw pineokit te pegpemegay dan te dipanog te menge baka aw kambing.
5 Gebii, te agpet den isogò si Cristo dini te keneyonan, minikagi sikandin diyà te Timanem,
“Netegahan ko te kenà bowang aw ayam-ayam imetayan se meketepad kamno, aw yan impetagad no se lawa ko amon imetayan a.
6 Eked ka keluba pineokit te pegsonog te ayam-ayam aw pegpemegay te dipanog niyan amon pegwedaden se salà.
7 Minikagi a heman, ‘E Timanem, seini a den so meg-inang a den te ibeg nikaw, iling te insolat tepad kanak diyà te libro sinolatan te kagi nikaw.’ ”
8 Tagnà inikagi din, eked peketepad diyà te Timanem se pegpemegay te otaw te menge ayam-ayam diyà kandin tepad te menge punù ingkeliwat i Moises. Pengkey imetayan dan se ayam-ayam, pengkey sonogen dan iyan, pengkey ibegay dan se dipanog niyan diyà kandin tandà te salà ininang dan, meneng eked sikandin keluba pineokit te kedita niyan. 9 Minikagi heman si Cristo, “Seini a den so meg-inang a den te ibeg nikaw.” Pineokit te kagi din sìyan, netegahan tadon te sinelilinan den te Timanem se menge tapay punù tepad te pegpengimatay te ayam-ayam, aw inselilin din den se pegkematay i Cristo. 10 So timoman si Jesu Cristo te ibeg te Timanem, yan lininisan kidon den lekat te salà pineokit te pegpemegay din te kandin lawa te mekesebad olò imetayi, so botong se sebad pegkematay din.
11 Se kedita te menge telekagon te Judiyo, gayed dan egterbaho te kelikit te aldaw, so gayed dan egpengimatay te menge ayam-ayam. Meneng eked palos keabat se salà pineokit te peg-inang dan kenyan. 12 Meneng mekesebad olò se pegkematay i Jesu Cristo amon meabat se salà tadon, aw botong iyan te wedad temanan. Penga niyan, minonsad sikandin kidoen te tangkil te Timanem doton te langit. 13 Egtagad den sikandin te aldaw te pegdaeg te Timanem te poon din amon lomowan sikandin diyà te kedita. 14 Mekesebad olò se pegkematay i Cristo, aw pineokit kenyan, eg-aneng-aneng den se Timanem te metòlid kidon den te wedad temanan tandà te peglinis din kenitadon lekat te salà.
15 Doen heman ipetaga-taga te Espiritu Santo diyà kenitadon tepad kenyan, so doen kagi din insolat,
16 “Minikagi se Pengolo, ‘Iling kani se kaling peokit inangen ko kandan te modi aldaw.
Ipeaneng-aneng ko kandan se menge punù ko amon eked dan iyan kelibeli. Iling te isolat ko se menge punù ko kidoen te pedowan dan amon meibeg dan tomolò kenyan.’ ”
17 Minikagi heman sikandin,
“Eked a den palos todà peg-aneng-aneng tepad te salà dan.”
18 Yan wedad den keilangan te pegpengimatay tadon te ayam-ayam amon meabat se salà tadon, so pigwedad den te Timanem se kedita te salà ininang tadon.
Mepakay den aw megpedapag kidon diyà te Timanem
19 Nayan, menge kedowa ko, so nemegay den si Jesus te dipanog din te pegkematay din kenitadon, eked kidon den sagkà te peg-awop tadon doton te Ontò Tambì te Timanem doton te langit. 20 Pineokit ki Cristo, doen den kaling peokit amon mekinawà tadon se kaling pedowan. Wedad den mekebelabag diyà kenitadon aw Timanem, so inabat den i Cristo se kayad diyà te tengà-tengà pineokit te pegkematay din. 21 Sikandin se egkagon kenitadon doton te Timanem so eglowan sikandin diyà te kedita tadon menge sakop te Timanem. 22 Keilangan megpedapag kidon den diyà te Timanem te doen pegkelobos te pedowan tadon somalig diyà kandin. Melinis den se pedowan tadon aw aneng-aneng tadon so iling te winilikan kidon te dipanog aw lininisan kidon te wayeg. 23 Keilangan megpekagsen kidon se egpeliman diyà te pakang te Timanem pinemenalan tadon, so egkeseligan sikandin aw tomanen din se kedita te impakang din. 24 Keilangan megpetebangay kidon amon ontò benal se pegpedekelay tadon te pedowan aw peg-inang tadon te mèpiya. 25 Pengkey doen menge otaw limengà te pegsimba, meneng keilangan eked kidon peg-iling kandan. Keilangan megpekegsenay kidon te pedowan amon meketayod kidon te pegpeliman. Ontò iyan keilangan songkani so netegahan tadon te lomikò se Pengolo tadon te eked kenamay.
26 Aw netegahan tadon den se kebenalan, meneng gayed kidon pa eg-inang te medaet, wedad den doma matay amon meabat se salà tadon. 27 Aw iling kenyan se inangen te otaw, detengan sikandin te ontò medaet pelumun te Timanem, so sonogen te Timanem se kedita te otaw mato kandin. 28 Gebii, aw doen otaw egkebensi te menge punù ingkeliwat i Moises, aw doen telo otaw aw kenà dowa otaw megsistigos te benal iyan, eked sikandin keidowi meneng tiblug imetayan. 29 Meneng labi pa medaet se pelumun domateng diyà te otaw megtompuyus te Batà te Timanem, so pineokit te pegtompuyus din kandin, impetaga-taga din te wedad ontong din diyà te dipanog i Cristo ilinis peden kandin, pengkey yan se pengilala te doen den kaling peokit pesalo doton te Timanem. Ipelumun sikandin so nengako sikandin te Espiritu Santo gayed egkeido. 30 Netegahan tadon te Timanem se minikagi kani,
“Siaken se megpelumun kandan.
Siaken se megmalit kandan.”
Doen heman doma kagi te Timanem insolat,
“Meg-okom se Timanem te menge sakop din.”
31 Ontò mekelelamit se pelumun domateng diyà te otaw ipelumun te Timanem wedad temanan din.
32 Ikà niyo egkelibel tepad te pegtebò niyo te pegpemenal kedengan. Penga te pegketaga-taga niyo te kebenalan, medita se kelimahan dimateng kenyo, meneng neketayod kaw te kedita niyan. 33 Seletà tinompuyus kaw aw pinemilang kaw diyà te keditaan te otaw, aw seletà egpekesipat kaw te menge doma pinemilang iling kenyan. 34 Neidowan niyo se doma otaw kineleboso aw migtabang kaw kandan. Pengkey linompak se kedita te kedònan niyo, meneng gayed pa neluba se pedowan niyo, so netegahan niyo te doen ontong niyo labi pa mèpiya doton te langit eked palos kelompak lekat kenyo. 35 Yan ikà niyo eglengà te pegsalig niyo diyà te Timanem, so aw melobos se pegsalig niyo diyà kandin, mèpiya se ontong kinewaen niyo. 36 Keilangan medalem se pedowan niyo amon mekebatog kaw tomoman te ibeg te Timanem, aw yan kominawà kaw te impakang din kenyo. 37 Doen kagi te Timanem insolat,
“Domateng se Pengolo egpelimanan niyo te eked kenamay.
Eked sikandin peg-alà-alà.
38 Se menge otaw eg-eneng-enengen ko te metòlid dan, yan se meketayod te pengkey eden se kelimahan tandà te pegsalig dan kanak.
Meneng aw lomengà se otaw tomaking kanak tandà te ketalaw din, eked a keluba kandin.”
39 Meneng menge kedowa ko, kenà kidon iling te sìyan telawun pegbàtan te Timanem, so melobos se pegsalig tadon diyà kandin, aw yan eked kidon din pegbàti.