1 Ikà egkeopal te menge temoay meg-inang te salà, meneng keilangan mèpiya se pegsagda no kandan iling te peg-ikagi no diyà te amay nikaw. Peg-aneng-aneng ka te menge kaling meama iling te kedowa nikaw. 2 Peg-aneng-aneng ka te menge lokes iling te inay nikaw, aw menge kaling bayi iling te etebay nikaw, aw wedad medaet inangen no kandan.

3 Se menge bayi balo wedad palos menogpò kandan, yan se keilangan tebangan niyo. 4 Meneng aw doen batà aw apò te bayi balo, pegtoladà ka kandan te keilangan sikandan se menogpò te kandan pamilya aw memegay te ontong diyà te kandan inay aw amay, so yan se ibeg te Timanem inangen tadon. 5 Meneng se bayi balo wedad palos menogpò kandin aw sebad din olò, Timanem olò se egseligan din, aw gayed sikandin egtawal-tawal aw egpemoyò te tabang din te kelikit te aldaw aw delem. 6 Meneng se bayi balo gayed egkeibeg te keluba te otaw dini te keneyonan, yan se iling te nematay den pengkey wedà pa kematay. 7 Se impunù ko kamno, yan se keilangan itoladà no diyà te kedita te otaw egpemenal amon wedad mekesila kandan. 8 Aw doen otaw egpemenal kenà egpenogpò te kandin pamilya, labi pa aw kenà egpenogpò te otaw eg-ogpà diyà te kandin balay, yan se otaw timinàyog te kebenalan tapay pinemenalan din, aw labi pa medaet se ketanem din diyà te ketanem te otaw kenà egpemenal.

9 Ikà egsolat te ngadan te bayi balo diyà te lista te menge balo egtebangan niyo singed aw minapet den te keneman se omay din, aw sebad olò heman se esawa din. 10 Eked sikandin peekopi singed aw medengeg sikandin eg-inang te mèpiya. Pelistahi olò se ngadan te bayi balo mig-ipat te menge batà din aw migsagman te menge otaw gimemaw kandin, aw mig-onaw te benis te menge doma sakop te Timanem, aw migtabang te menge otaw nelimahan, aw migpekeaseb sikandin te medita kemolò te mèpiya inang.

11 Ikà egsolat te ngadan te kaling bayi balo diyà te lista te menge balo egtebangan niyo, so aw meibeg dan todà mengognan, lomengà dan te eg-inangen dan ki Cristo. 12 Pineokit kenyan, silahen dan te menge doma otaw so eked dan tomani se tapay pakang dan ki Cristo. 13 Megketaka dan heman, aw meglegeb-legeb dan doton te menge doma balay. Kenà olò dan megketaka, meneng megkebelikbikun dan heman, aw meg-inabut dan te doma, aw mikagi dan tepad te eked kepakay iindan. 14 Yan se doun te ibeg ko mengognan beling todà se kaling bayi balo, aw megbatà dan, aw meg-ipat dan te kandan pamilya, amon wedad isila te menge poon tadon tepad kenitadon egpemenal. 15 Yan se ibeg ko, so doen den menge bayi balo simoway lekat te kebenalan aw timaking den dan ki Satanas. 16 Se otaw egpemenal doen bayi balo doton kandin, yan se keilangan menogpò kandin. Eked kepakay aw sikiyo egpemenal se keilangan menogpò kandan amon mekebatog kaw menogpò te menge doma bayi balo wedad palos pamilya menogpò kandan.

17 Aw mèpiya se pegpengibing te menge egpengibing te simbahan, aw ontò dan measeb egtoladà aw egsoblod te kagi te Timanem, mèpiya aw tendanan dan te dobli. 18 So doen kagi te Timanem insolat,

21 Egtengtengen ki te Timanem, aw si Jesu Cristo, aw menge anghil te Timanem, aw yan egpunù a kamno te keilangan tomolò ka te insolat ko kamno. Keilangan wedad palos otaw pedigselan no te pegsagda no te medaet, so keilangan segdahen no se kedita te otaw, pengkey melangkaw otaw aw kenà. 22 Keilangan eked ka kesasaw te pegpemallì no te otaw inangen egpengibing te simbahan, so aw mekesalà sikandin, silahen ka heman doma din. Yan keilangan wedad salà inangen nikaw.

23 Olò wayeg se eg-inemen no, meneng labi pa mèpiya aw inemen no heman se deitek bino amon kebolongan se mesakit te getek no aw menge doma mesakit melikit egdateng kamno.

24 Doen menge otaw egpekesalà sikil egketegahan te menge doma otaw, aw detengan dan te pelumun. Meneng doen menge doma otaw egpekesalà eked ketegahi te doma otaw singed aw menamay. 25 Iling heman kenyan, doen menge otaw eg-inang te mèpiya sikil egketegahan te menge doma otaw. Meneng pengkey eked iyan tagmon ketegahi te doma otaw, eked iyan keeles te wedad temanan.