1 Pogpitow ku no duon on iam no langit woy ka iam on no tano su ka an-anayan no langit woy ka an-anayan no tano, nanaawo on. Woy songo warad on ka dagat.* Ogkabasa to Isaias 65:17 woy 22. 2 Songo nigkita ku ka Dakol no Lunsud to Magboboot no ian ka iam no Hirusalim no ogligkat kandin no dio to langit. Ka sikan no lunsud, ian ogkounawaan ka boi no nanginabo to maroyow no ogtagad to pogdatong to sikan no ogpangasawa kandin.† Ogkabasa to Isaias 52:1 woy 61:10. 3 Pogkaponga, nigdinog ku ka maagbot no lagong no nigligkat to sikan no pinnuuanan to pandatuan no nigkagi to, “Kuntoon, diad on og-ugpo ka Magboboot to mgo koot-otawan. Ogdumaruma kandan no ogkohimu on sikandan no mgo sakup din. No sikandin, ka ogkohimu no Magboboot dan.‡ Ogkabasa to Ezequiel 37:27. 4 Og-awoon din on ka tibo no igmasakit to goinawa ran su warad kamatayon, warad on igpandawot, warad on ogsinsinogow, su ogpunasan din ka tibo no mgo luwo to mgo mata ran su ka tahan no pog–ugpo to soini no kalibutan, ogkaawo on.”§ Ogkabasa to Isaias 25:8 woy 35:10 woy 65:19.

5 Nò, ka ogpinpinnuu to sikan no pinnuuanan to pandatuan, nigkagi to, “Og-iamon kud on ka tibo.” Woy nigkagi to, “Isulat nu ka soini su malogot ian ka soini no ignangon ku woy lagboy no ogkasaligan.” 6 Woy kagi rin kanak to, “Napongaan on ka tibo. Sikanak ka an-anayan woy ka mohurian. Woy sikanak dod ka kabinunsuran woy ka katamanan to tibo. Ko duon agad hontow no ogkammaraan, ogpoinumon ku sikandin to woig no waro bayad no ogligkat to sobsob no ogpakabogoy to kouyagan no waro katamanan.* Ogkabasa to Isaias 55:1. 7 Ka otow no kono ogparoog ki Satanas, ogkohimu a no Magboboot din woy ogkohimu sikandin no anak ku. 8 Di ka otow no ogkahallok no og-unug kanak, woy ka kono ogkasaligan, woy ka oghimu to mgo maroot, woy ka ogpamunu, woy ka oghimu to maroot to kono no asawa ran, woy ka oghimu to mgo pamulinganon, woy ka ogsimba to mgo inotow-otow, woy ka og-uubat, igdogpak sikandan tibo dio to ogliabliab no hapuy to asupri. No ian ka igkararuwa no kamatayon.”

9 Pogkaponga, nigdani kanak ka sagboka to sikan no papitu no diwata to Magboboot no niggongon to sikan no papitu no mgo boung no nataguan on to sikan no papitu no mohuri no igkabaybayari. Kagi rin to, “Hondini kad su igpapitow ku koykow ka ogkohimu no asawa to sikan no ogkohingaranan to Nati no Karniru.” 10 Inogo on no nigbobootan ad to Gimukud to Magboboot, no nig-alap a to diwata to Magboboot dio to lipupukan to matikang lagboy no bubungan woy impapitow rin kanak ka Hirusalim no ian ka Dakol no Lunsud to Magboboot no ogpohulughulug dio to tano no ogligkat to langit no ligkat to Magboboot. 11 Ka sikan no lunsud, oglayag no ogligkat to Magboboot. No ian ogkounawaan ka mahal no batu no marulag tad ogkitoon no ogkohingaranan to haspir no ogmating-ow no ogkoiling to lamita. 12 No ka alad no impalibut to sikan no lunsud, makopal woy matikang lagboy. Sampulu woy daruwa ka mgo gumawan din. No to tag sagboka to sikan no mgo gumawan, duon diwata to Magboboot no ogbantoy. Woy duon ingkasulat to sikan no mgo gumawan ka mgo ngaran to sikan no sampulu woy daruwa no mgo pinanganak ni Israil. 13 Duon hop-at no ilis to sikan no lunsud. No to tag sagboka no ilis din, duon tatolu no mgo gumawan. Tatolu ka dio to silaan, woy tatolu ka dio to salopan, woy tatolu ka dio to balabagan no diraya woy songo tatolu ka dio to dibabo. 14 Ka alad to sikan no lunsud, impountud to sampulu woy daruwa no dagdakol no mgo batu no nasulatan to mgo ngaran to sikan no sampulu woy daruwa no mgo suguanon to sikan no Nati no Karniru. 15 Nò, ka diwata to Magboboot no nigkagi kanak, nig-alap to sosokoroy no bulawan. No ian din igsokod to sikan no lunsud woy ka mgo gumawan woy ka alad. 16 No nig-un-unawa ka katikangi woy ka kaluagi woy ka kalayati rin. No ka diwata to Magboboot, ian din insokod to lunsud ka sosokoroy rin no bulawan. No daruwa no malan woy hop-at no gatus no kilumitru ka kalayati, woy ka kaluagi woy ka katikangi rin. 17 Songo nigsokod din ka alad to sikan no lunsud. No ka sokod din, kohon-oman no mitrus. No ka pogsokod din, nig-un-unawa to sikan no tahan no igsokod to mgo otow.† To kinagian to Ginirigu, songo gatus woy kohop-atan woy hop-at no siku. Songo kuwo kun ko ian ka kalayati woy ko ka kapokali to alad. No to kanta no sokod, songo kuwo ko ogkohimu on no 60 woy ko 64 no mitrus. 18 Ka alad to sikan no lunsud, hinimu to mahal no mgo batu no ogkohingaranan to haspir. No ka mgo baloy, hinimu to bulawan no waro solug no ogkoiling to lamita su mating-ow. 19 Ka mgo batu no nig-unturan to alad to sikan no lunsud, nigpanabukan to nigkaloinloin no mahal no mgo batu. Ka immaroyow to an-anayan no batu, ian ka ogkohingaranan to haspir. No to igkararuwa, sapiru. No ka igkatatolu, agata. No ka igkohop-at, ismiralda. 20 Ka igkalalimma, unisi. No ka igkohon-om, kurnalina. Ka igkapitu, kirisulitu. Ka igkawawalu, birilu. Ka igkasiam, tupasiu. Ka igkasampulu, karisuparasu. Ka igkasampulu woy sagboka, asintu. No ka igkasampulu woy daruwa, amatista. 21 No ka tag sagboka to sikan no sampulu woy daruwa no gumawan to lunsud, hinimu to sagboka no ogkoiling to baliog no ogkohingaranan to pirlas. No ka mgo dalan to sikan no lunsud, inhimu to bulawan no waro solug no ogkoiling to lamita su mating-ow.

22 Waro nigkita ku no Dakol no Ampuanan dio to sikan no lunsud su ka Magboboot no ian ka Lagboy no Igbuyag woy Mamabogbog to tibo, woy ka Nati no Karniru, ian ka ampuanan dan. 23 No konad on og-awoson ka allow woy ka bulan su ka layag no ogligkat to Magboboot, ian ka ogpakabat-ow to sikan no lunsud. No ka oghingaranan no Nati no Karniru, ian on ka ogkohimu no ilawan dio.‡ Ogkabasa to Isaias 60:19. 24 Ka mgo Koot-otawan to mgo ugpaan to soini no kalibutan, ogkabat-awan to layag to sikan no lunsud. No ka mgo igbuyag to mgo ugpaan to soini no kalibutan, og-alapon dan ka mgo mahal no kalaglagan dan dio to sikan no lunsud.§ Ogkabasa to Isaias 60:3. 25 Ka mgo gumawan to sikan no lunsud, ungod ogkapulasan no konad ian oglokoban, su warad on marusilom dio.* Ogkabasa to Isaias 60:11. 26 No duon karoyawi woy igkaratui no ogkaalap on dio to sikan no lunsud no ogligkat dio to agad hondoi no ugpaan kai to tano. 27 Di waro ogpakasolod to sikan no lunsud ka agad nokoy no ogpakaligsom. Waro agad hontow no oghimu to igkasipod ta woy ko og-uubat su ian do ogpakasolod ka mgo otow no ingkasulat ka ngaran dan dio to sikan no sulatanan to Nati no Karniru to ngaran to mgo otow no ogbogayan to kouyagan no waro katamanan.