1 ካኣቲ፥ ሴሎሞኔ ዳልጉሞና ዖዶሱሞና ላማታሚ ዋዻ፤ ሌካ ዔጳ ታጶ ዋዻ ማዔያ ፆኦሲም ዒንጎ ቤሲ ሞኦኖ ዓንጎና ኮሼኔ። 4፡1 ኬሲ. ማፃ 27፡1-2። 2 ዬያጉዲ ሃሣ ሴካ ጎኦቦ ዳልጉማ ዓጫፓ ዓጮ ሄላንዳኣና ታጶ ዋዻ፤ ሌካ ዔጳ ዶንጎ ዋዻ ማዔ ሺሪ ዴንዳ ዙላ ጋባዳጉዴያ ዶኦላ ዓንጎ ሼኤሺ ዓልቂሲ ኮሼኔ፤ ዬያኮ ዙሎ ዋርቆዛ ሃይሢታሚ ዋዻ ማዓኔ። 3 ዬያ ዶኦላሢ ካሮኮ ዴማ ፔቴ ፔቴ ዋዻ ማዓያይዳ ዙሎ ሺሬያ ታጶ ጌማይ ማላ ባኣዚ ላምዖ ቤሲ ፓቂንቲ ዎሊ ቤቂ ዓኣኔ፤ ዬይ ጌማታ ዶኦላሢና ዎላ ፔቴ ማሂ ኮሾናያኬ። 4 ዶኦላሢ ሞኦኖ ዓንጋፓ ፔኤኮ ባሊቶ ሴካ ሺርሺሲ ኮሾና ታጶ ላምዖ ጌማቶ ማላ ባኮ ዑፃ ጌሢንቴኔ፤ ዬንሢ ጌማቶ ማሊሲ ኮሾናዞንሢኮ ሃይሦንሢ ኬዶ ዛሎ ባንሢ፥ ሃይሦንሢ ዾኦሎ ዛሎ ባንሢ፥ ዛሎ ሃይሦንሢ ዓባ ኬስካሢ ባንሢ፥ ዓቴ ሃይሦንሢ ሃሣ ዓባ ጌላ ባንፆ ዛጋያኬ። 5 ዬያ ዶኦላሢኮ ዓንዲርሙማ ፔቴ ኬኤላ ዋዻ ማዓያ፥ ካራ ሃሣ ዑሺ ዑሽኮ ዓንጊ ካራ ማላያ፥ ጊንሣ ሱኡፖ ቡኒጉዴያ ዙሌም ሺሬያኬ፤ ዬይ ዶኦላሢ ላሂታሚ ሺያ ዶሎዜ ማዓ ዋኣሢ ዓርቃያኬ። 6 ሄሊሳዖ ዋኣሢ ማስቶ ታጶ ጎንጊ ኮሺሲ፥ ዶንጋሢ ጌኤዦ ማኣሮኮ ዾኦሎ ዛሎ ጎኦባ፤ ዓቴ ዶንጋሢ ሃሣ ጌኤዦ ማኣሮኮ ኬዶ ዛሎና ጎኦባ ጌሤኔ፤ ዬንሢ ጎንጎንሢ ፆኦሲም ሚቺ ዒንጎሮ ሹኪንታ ቆልሞኮ ዓሽኮ ቢያ ማስኮያኬ፤ ዼኤፖ ዶኦላሢዳ ዓኣ ዋኣፆ ቄኤሳ ማስታያኬ። 4፡6 ኬሲ. ማፃ 30፡17-20። 7 ሴሎሞኔ ቤርታ ጊኢጊሺ ሃሾና ማሊፆ ጎይፆ ታጶ ፖዒ ጌሦ ሻርና ዎርቄይዳፓ ኮሺሲ ጌኤዦ ማኣሮኮ ዼኤፖ ቆልዖ ጋራ ዶንጋሢ ኬዶ ዛሊና፥ ዶንጋሢ ዾኦሎ ዛሊና ጌሤኔ። 4፡7 ኬሲ. ማፃ 25፡31-40።

8 ዬያጉዲ ሃሣ ታጶ ዼጌ ሎኦዤ ዖይታ ኮሺሲ ጌኤዦ ማኣሮኮ ዼኤፖ ቆልዖ ጋራ ዶንጋሢ ሻውሎ ዛላ፥ ዓቴ ዶንጋሢ ሚዛቆ ዛላ ጌሤኔ፤ ዬያ ሌሊቱዋንቴ ቃሲ ፄኤታ ጉንጉሎዋ ዎርቄይዳፓ ኮሺሴኔ። 4፡8 ኬሲ. ማፃ 25፡23-30።

9 ሴሎሞኔ ቄኤሶኮ ማዾም ማዓንዳ ጌኤዦ ማኣሮኮ ጋሮ ዛሎና ዓሲ ቡካ ጶኦካ፤ ዬያጉዲ ሃሣ ዼኤፒ ጶኦካኣ ኮሺሴኔ፤ ዬንሢ ላምዖ ጶኦኮንሢኮ ባኣካ ዓኣ ካራ ሞኦኖ ዓንጎና ጳርቂንቴያኬ። 10 ዼኤፖ ዶኦላሢ ዒማና ጌኤዦ ማኣሮኮ ዾኦሎ ዛላ ዓባ ኬስካ ባንፆና ጌሢንቴኔ። 11-16 ሁራሜ ቃሲ ሃሣ ዖቲ፥ ታሚ ካኣሾ ኩንዔንታ ዔቶ ሳኣኖንታ ኮሼኔ፤ ዬያይዲ ሁራሜ ካኣቲ ሴሎሞኔም ኮሻኒ ጫኣቄ ጎይፆ ጌኤዦ ማኣሮ ማዾም ማዓ ሜሆ ቢያ ኮሺ ጋፒሴኔ፤ ዬይ ዒ ኮሼ ባካ ሃካፓ ዴማ ፔቴ ፔቴ ፓይዲንታዞንሢኬ፦

17 ካኣቲ፥ ሴሎሞኔ ዬያ ሜሆ ቢያ ኮሺሴሢ ዮርዳኖሴ ዶኦጫ፥ ሱኮቴና ፄሬዳ ጌይንታ ቤዞ ባኣካ ዓኣ ሞኦኖ ዓንጎ ሼኤሾ ቤዛኬ፤ 18 ዬያይዲ ኮሺንቴ ባካ ኮሺ ሚርጌታሢሮ ዬያ ባኮ ኮሺሳኒ ዔኪንቴ ሞኦኖ ዓንጎኮ ዴኤሡማ ዎሊ ዑፃ ዋኣዺታቶዋ ዖኦኒያ ዔራኒ ዳንዳዒባኣሴ። 19 ዬያጉዲ ሃሣ ካኣቲ፥ ሴሎሞኔ ጌኤዦ ማኣሮ ማዾም ማዓንዳ ባኣዚ ዎርቄና ኮሺሴኔ፤ ዬይ ባካ፦ ናንጊና ናንጋ ጎዳም ዒንጎ ባኮ ዒንጎ ቤዞንታ ፆኦሲም ዒንጊሢ ማዒ ሺኢሺንታ ካሦ ጌሦ ዼጌ ሎኦዦ ዖይቶ፥ 20 ጌኤሺ ዎርቄፓ ኮሺንቴ ፖዖ ጌሦ ሻርኖንታ ቤርታ ማሊንቴ ጎይፆና ጌኤዦ ማኣሮኮ ቤርቶ ዛላ ፖዓ ፖዖ፥ 21 ቡኖ ማሊሶና ፓልማሢንታ ፖዖንታ፤ ዬያጉዲ ሃሣ ዲቢንፆ ቆንቾሢንታ፥ 22 ጌኤሺ ዎርቄይዳፓ ኮሺንቴ ፖዖ ፖዒሶሢንታ ዎዾሢ፤ ጉንጉላሢ፥ ጩቦ ጩቢሾሢንታ ታሞ ካኣሾ ኩንዖንታ፤ ዬይ ባካ ቢያ ጌኤሺ ዎርቄይዳፓ ኮሺንቴያኬ፤ ጌኤዦ ማኣሮኮ ዙሎ ካሮንታ ዑሣ ዓኣዼ ጌኤዦ ማኣሮኮ ካሮንታ ዎርቄና ጳርቂ ኮሾናያኬ።