1 Aparamu unhaleelaka mwakha mmoca wiira apiihere iminya (99) ceyarelo, ahomphwanyinya ni Mwaneene Nluku ni ahomwiirela:

3 Aparamu ahooromela vathi ni Nluku ahomwiirela: 4 Uviriyane. Nna phi nleehano naka we ni mi. We unhala ukhala athumwanaya ilapo cinci. 5 Khunhala wiihaninya tho Aparamu. Ncina naa ninhala ukhala Aparahamu, kontha mi kihoohela ukhala athumwanaya ilapo cinci.

6 Kinaahala uwunnuwiha venci ni nhina mwawe kinapanka maloko menci mwawe ammokhuma mamwene. 7 Kimmopanka nleehano naka mi ni we ni ucuulu aa uttuli waya mmalokoni mwaya, wiira kikhale Nluku aa ni Nluku a alokwaa, nimmokhala nleehano noohimala. 8 Ilapo yothene yo Kanaa, uryaa nletto, kimmowuvaha toko yawaa mpaka khalayi; we ni ucuulu aa ni mi kinhala ukhala Nluku aya.

9 Vaavale Nluku ahomwiirela tho Aparahamu: Usunke nleehano naka, ukhuma we mpaka ucuulu aa wothene unhalaa ukhalana. 10 Nna phi nleehano naka kimpankaka we nu ucuulu aa, ninlamuliya usunkiya, alopwana othene nhina wa nyu, anlamuliya wuula icantto. 11 Nnolamuliya upanka ila icantto ela toko ikanyero yo nleehano naka mi ni we. 12 Ukhuma nloko naa urwaka uhoolo, mwana mwanlopwana rina mahuku nanne, nolamuliya wuula icantto, akhale ooyariya wapuwani waa hata nayo oothuminya toko ipottha pooti ohikhala alokwaa. 13 Akhale ooyariya wapuwani waa, atthuna oothuminya ni nsuruku, anlamuliya wuulihiya icantto wiira nleehano naka nooheliya ikanyero mwirutthuni mwinyu nikhale nleehano noohimala. 14 Ntthu phi ntthu mwanlopwana oohuula icantto, nolamuliya ukumihinya iriyari wo uneethi aka, hohanyuriha nleehano naka.

15 Nluku ahomwiirela tho Aparahamu: Ukhuma nenna vaa mpaka wahoolo, amwaaraa khanhala wiihaninya tho Sarayi. Ncina naya ninhala ukhala Asaara. 16 Mi kinawareeriha ni nhina wa yaayo kinnowuvaha mwana. Khweeli, mi kinawareeriha ni mwa yaayo ammokhuma maloko, mamwene ni ilapo ca atthu.

17 Vano, Aparahamu ahooromela vathi, ahothyaa ni aheera: Wanawooryaa nlopwana o myakha iminya (100) ceyarelo unnyara mwana? Wanawooryaa Asaara uyara toko warinaya myakha miloko mithanu na micesei (90)? 18 Aparahamu ahomwiirela Nluku: Unhiye Sumayili akhale nkumi wamiithoni waa. 19 Vano Nluku ahomwaakhula: Khweeli Asaara amwaaraa, unannyarana mwana ni we unnomwiihana Isaki. Ni yooyo kimmopankana nleehano noohimala wamoca nu ucuulu awe wothene. 20 Mwaha wa Sumayili, kiheewa. Uviriyane. Kinonreeriha, kinnonvaha atthu enci ni kimmowuncerera ucuulu awe. Uyo nohala ukhala athumwanaya mamwene khumi na meeli ni nhina wo yooyo immokhuma ilapo yuulupale. 21 Nanso nleehano naka, mi kinhala upanka ni Isaki, mwana nohala unnyara Asaara mwahiyu yoola ukati ula. 22 Wamanlyawe wuulumaca na Aparahamu, Nluku ahothama nuuwela.

23 Nenno nihuku nno, Aparahamu ahonkusa Sumayili ni othene yayarenle wapuwani wawe na ale yathuminye, alopwana othene owapuwani wawe ahooliha icantto toko Nluku canlamulenlyawe.

24 Ukati woolihiyaya, Aparahamu wahalela mwakha mmoca wiira apiihere iminya (99) ceyarelo 25 ni mwanaya aarina myakha khumi na miraru. 26 Aparahamu ni Sumayili yoonle icantto nenno nihuku nno. 27 Wamoca na Aparahamu, yahoolihiya icantto atthu othene owapuwani wawe, ooyareela vava na ale oothuminya uttayi.