30
Lǝmɑɣɑsɛɛ nnɑ Tɑcɑɑ lɑŋlɛ tɑ hɛɛnɑ tɔ
1 Ḿpʋ́ɣʋ́ Tɑcɑɑ yɔɣɔtɑɑ sɩ:
Mpɑ mɛ ɩ́ kɛ́ wɑɩyo nyǝ́mɑ tɔɣɔlɛ
yǝlɑɑ mpɑ pɑ kʋlǝɣɩ lɛlɑɑ
tɔɔ tɔ.
Ɩ́ tʋɣɩ mǝ kʋlɑpǝlɛ pǝlɛ nɑ pǝ́ tɑ́ lɩɩnɑ mɑ kiŋ.
Ɩ́ pɛɛlǝɣɩ nɔɔsɩ nɑ pǝ́ tɑ kɛ́ mɑ luɣu nyǝntʋ,
nɑ pǝ́ sɔɔsǝɣɩ ɩsɑɣɑtʋ kɛ ɩsɑɣɑtʋ tɔɔ.
2 Ɩ́ tʋ mpɑɑʋ sɩ ɩ́ puki Icipiti,
Ɩ́ tɑ pɔɔsɩ-m nɑtǝlɩ.
Ɩ́ puki sɩ ɩ́ tʋ Icipiti wulɑʋ kɛ kpʋlʋɣʋ.
Ɩ́ polɑɑ sɩ ɩ́ pɛɛkǝɣɩ tǝcɔɔsǝlɛ kɛ Icipiti.
3 Amɑ Icipiti wulɑʋ kpʋlʋɣʋ tʋɣʋ
kɑ́ tʋ-mɛɣɛ fɛɛlɛ.
Ɩ tɛtʋ tɑɑ cɔɔsʋɣʋ kɑ́ liɣiti-mɛɣɛ sɔsɔm.
4 Mǝ ɑkewenɑɑ sɔsɑɑ tɛmɑ tɑtɛ kɛ Sowɑŋ ɩcɑtɛ.
Mǝ sɔpɑɑpǝnɑɑ tɑlɑ Hɑnɛsɩ ɩcɑtɛ.
5 Mǝ tǝnɑ ɩ́ kɑ́ tɔɣɔ fɛɛlɛ kɛ́ nɑ tǝnɑ nyǝ́mɑ mpɛ.
Pɛlɛ pɑ kɑɑ wɑɑsɩ-mɛ, yɑɑ pɑ́ sǝnɑ-mɛ.
Amɑ fɛɛlɛ kɛ ɩ́ kɑ tɔɣɔ nɑ pǝ́ kʋ mǝ nyʋɣʋ.
Icipiti wɑɑsʋɣʋ nyɩɩllɑɑ
6 Tɑcɑɑ kɑlǝɣǝnɑ Nekɛfɩ wontunɑɑ mpɑ pɑ wɛ
lɑŋwɑkǝllɛ nɑ nǝɣǝsɛɛ tɛtʋ tɑɑ tɔ.
Tǝnɑɣɑ tɔɣɔlɑɣɑ ɑlʋnyǝŋkɑ nɑ ɑpɑlʋnyǝŋkɑ lɩɩnɑɑ.
Pɑɑsǝlɛ nɑ tʋm wei ɩ kʋlǝɣɩ hʋntʋ tɔ pɑ tɛtʋ ntɛ́.
Kpɑŋɑsɩ kɛ pɑ sǝɣǝlǝnɑ pɑ wɛnɑʋ.
Nɑ yooyoonɑɑ kɛ pɑ kpɑncooŋ,
nɑ pɑ́ tǝŋǝɣǝnɑ tɛtʋ ntɩ tǝ tɑɑ
nɑ pɑ́ pukinɑ sɩ pɑ hɑɑkɩ piitimnɑɑ mpɑ pɑ kɑɑ wɑɑsɩ-wɛ tɔ.
7 Icipiti wɑɑsʋɣʋ kɛ́ kpɛtɛ kɛ́.
Pǝ tɔɔ kɛ́ mɑ yɑɑkɩ-ɩ sɩ tɔɔ tiilu kɑɑwɑɑsɑɣɑ.
Mpi pɩɩ kɔɔ tɔ pǝ tɔm kpɑɑlʋɣʋ
8 Ḿpʋ́ɣʋ́ Tɑcɑɑ tɔmɑ Ɩsɑyii sɩ:
Pǝnɛntɛ ŋmɑɑ tɔmnɑɑ mpɛɣɛ kpɑɑtɑ tɔɔ,
kɛ́ Yosɑlɛm nyǝ́mɑ ɩsɛntɑɑ.
Nmɑɑ-tǝɣɩ tɑkǝlɑɣɑ tɑɑ nɑ tǝ wɛɛ tɑm tɔɔ.
Hɑlǝnɑ kʋyɑkʋ kɑntǝkɑɣɑ nyǝŋkʋ.
9 Mpi tɔ, Yosɑlɛm nyǝ́mɑ kɛ́ tɔɔ kʋllɑɑ kɛ́,
pɑ kɛ́ tʋsǝlɑɑ.
Pɑɑ cɑɑkɩ Tɑcɑɑ kiiŋ kɛ nɩɩʋ.
10 Ɩlɛnɑ pɑ́ tɔŋ Ɩsɔ kʋyɔɣɔtʋtʋ tɛlǝsǝlɑɑ sɩ:
Ɩ́ tɑɑ tɛlǝsɩ Ɩsɔ kʋyɔɣɔtʋtʋ.
Nɑ pɑ́ tɔŋ mpɑ pɑ nɑɑkɩ Ɩsɔ Tɔm tɔ sɩ:
Ɩ́ yele tɑmpɑnɑ kɛ nɑʋ nɑ ɩ́ heeliɣi-tʋ.
Ɩ́ looliɣi nɑ ɩ́ heeliɣi-tʋ,
ɩ́ nɑɑkɩ tɔm kʋtʋsʋtʋ.
11 Ɩ́ yele mpɑɑʋ kʋpɑŋkʋ, ɩ́ hɑtǝlǝnɑ mpɑɩyɑ.
Ɩ́ lǝsɩ Ɩsɛɣɛlɩ nyǝ́mɑ Ɩsɔ nɑŋŋ tʋ kɛ tɑ́ hɛkʋ tɑɑ.
Wɑkǝlʋɣʋ ŋku kʋ fɛɩ hiiu tɔ
12 Pǝ tɔɔ kɛ Ɩsɛɣɛlɩ Ɩsɔ nɑŋŋ tʋ yɔɣɔtǝɣɩ sɩ:
Timpi ɩ́ kisiɣi tɔm tǝnɛ nɑ ɩ́ hɑɑkɩ mǝ tǝɣɩ
mʋsʋŋ nɑ ɩsɑɣɑtʋ tɑɑ nɑ ɩ́ tisi mǝ yuŋ tɔ.
13 Pǝ tɔɔ kɛ́ ɩsɑɣɑtʋ tǝnɛ tɩɩ pǝsɩ-mɛ,
ɩsɩɩ pɑ huluɣu koluŋɑ kʋkʋlɑɣɑ tɑɑ kɛ́
lonte nɑ kɑ́ pɛlɩ nɑ kɑ́ hoti tɔm kʋlʋm tɔ.
14 Kɑ yɔkǝɣɩ kɛ́ tǝmʋlʋ,
ɩsɩɩ hǝyɑɣɑ ŋkɑ pɑ yɔkɑɑ tǝnɑŋnɑŋ tɔ.
Pǝ kɑɑ sɔɔ tɑtɑɣɑ sɩ pɑ́ heenɑ kɔkɔ,
yɑɑ pɑ́ cosinɑ lʋm kɛ hite tɑɑ.
Ɩ́ cɑɣɑ tǝpɑmm nɑ ɩ́ tʋ Ɩsɔ kɛ́ nɑɑni
15 Ḿpʋ́ɣʋ́ Ɩsɛɣɛlɩ Ɩsɔ Nɑŋŋ tʋ Tɑcɑɑ yɔɣɔtɑɑ sɩ:
Ye ɩ́ mǝlɑ mɑ kiŋ nɑ ɩ́ cɑɣɑ tǝpɑmm.
Pɩɩ yɑ mǝ nyɔɔŋ.
Ye ɩ́ cɑɣɑ tǝpɑmm nɑ ɩ́ tʋ-m nɑɑni ɩ́ kɑ́ hiki tomɑ.
Amɑ mǝ tɑ́ sɔɔlɩ mpʋ.
16 Ɩ́ tɔmɑ sɩ: Aɑɩ, tɩɩ cɑɣɑ kpɑɣɑnǝŋ nɑ tǝ se.
Tɑmpɑnɑ ɩ́ kɑ́ cɑɣɑ kpɑɣɑnǝŋ nɑ ɩ́ se yɑɑ.
Ɩ́ kɑ́ kpɑɣɑ ɑsewɑ nɑ ɩ́ yɔɣɔtɩ sɩ:
Pʋwɛ, tɑ́ kpɑɣɑnǝŋ seeki yoo.
Amɑ mǝ tɔɣɔnlɑɑ kɑ́ tɛɛ-mɛɣɛ sewɑ.
17 Kolontu kʋlʋm kɑ́ nyɑɑsɩ mǝ tɑɑ yǝlɑɑ iyɑɣɑ (1000) nɑ pɑ́ sele.
Kolontunɑɑ kɑkpɑsɩ kɑ́ nyɑɑsɩ-mɛ nɑ ɩ́ se.
Pɩɩ kɑɑsɩ mǝ tɑɑ weesiŋ nyǝ́mɑ kɛ́
ɩsɩɩ tesikɑ kɛ pʋɣʋ nyʋɣʋ tɑɑ.
Yɑɑ kʋyʋsʋm kɛ pulɑɣɑ tɑɑ.
Nyʋɣʋ yɑpʋ wɑɑtʋ
18 Pǝ tɔɔ kɛ́ Tɑcɑɑ tɑŋɑɑ sɩ ɩ lɑkɩ-mɛɣɛ pɛɛlɛɛ.
Ɩ kɑ́ kʋlɩ nɑ ɩ́ nyǝnɩ mǝ pǝtɔɔtǝlɛ.
Pǝ tɑɣɑ pʋlʋ, Tɑcɑɑ Ɩsɔ kɛ́ siɣisilu kɛ́.
Pɑ tǝnɑ mpɑ pɑ tɛɛlǝɣɩ-ɩ tɔɣɔlɛ nyʋleleŋ nyǝ́mɑ.
19 Siyɔŋ nyǝ́mɑ mpɑ mɛ ɩ́ wɛ Yosɑlɛm tɑɑ tɔ,
ɩ́ kɑɑ tɑsɑ wulɑ.
Mpi tɔ, ye ɩ mɑpɑ kɑpukɑ Tɑcɑɑ kɑ́ lɑ-mɛɣɛ pɛɛlɛɛ.
Ye ɩ tɩɩ nɩɩ mǝ nɔɣɔ ɩ kɑ́ wɑɑsɩ-mɛɣɛ.
20 Tɑcɑɑ kɑ́ hɑ-mɛɣɛ tɔɣɔnɑɣɑ kɛ
mǝ nǝɣǝsɛɛ tɑɑ.
Ɩ kɑ́ hɑ-mɛɣɛ lʋm kɛ wɑhɑlɑ wɑɑtʋ.
Mǝ sɛɣɛsǝlɑɑ kɑɑ tɑsɑ ŋmɛlʋɣʋ.
Ɩ́ kɑ́ nɑnɑ mǝ ɩsǝpǝle kɛ mpɑ pɑ sɛɣɛsǝɣɩ-mɛ tɔ.
21 Ye ɩ́ tǝŋɑ ntɔɣɔŋ yɑɑ mpǝtǝŋ,
pɩɩ yɔɣɔtǝnɑ-mɛ nɑ wɑɑlɩ sɩ:
Mpɑɑʋ ntɔ, ɩ tǝŋ-kʋ.
Ɩ́ tǝŋ mpǝtǝŋ.
22 Ɩ́ kɑ́ nyǝnɩ ɑsilimɑ kɛ liɣitee
nyǝɣǝtʋ nti tǝ wɑɑsɑ mǝ tɩɩŋ kʋlɑlɑɑŋ tɔɔ tɔ,
nɑ wʋlɑ wei ɩ wɑɑsɑ mǝ lɛɛsǝŋ tɔɔ tɔ.
Ɩ́ kɑ́ lɔ-tɩ ɩsɩɩ ɑcɑɑlǝtʋ pʋlʋpʋ,
nɑ ɩ́ tɔ sɩ: Ɩ́ lɩɩ cǝnɛ.
23 Ɩsɔ kɑ́ yele nɑ tɛʋ nɩɩ kʋtutuum
mpi ɩ tʋwɑ tɛtʋ tɑɑ tɔ pǝ tɔɔ,
Tɔɣɔnɑɣɑ ŋkɑ tɛtʋ kɑ́ lʋlɩ tɔ,
kɑɑ wɛɛ teu nɑ kɑ́ hɑɑkɩ ɑlɑɑfǝyɑ.
Ɩlɛnɑ mǝ tɔlɑ cɔɔkɩ nyɩɩtʋ
kʋpɑntʋ tɑɑ kɛ́ wɑɑtʋ ɩnɩ.
24 Nɑɑŋ nɑ kpɑŋɑsɩ nsi sɩ hɑlǝɣɩ tɔ,
sɩɩ tɔɣɔ nyɩɩtʋ nti tǝ tɑɑ pɑ sitɑ tɔm
nɑ pɑ́ fɑlɑ-tɩ tɔ.
25 Lɔɔŋ kɑ́ tʋlɩ pɔ́ɔ́ŋ kʋkʋlʋŋ tɔɔ.
Lʋm kɑ́ kpe pulɑsɩ kʋkʋlɑsɩ tɔɔ
kɛ́ ɑsɑlɑʋ kʋyɑkʋ wule.
Tǝtɑŋlɛ kutuluŋ kɑ́ ti.
Sǝtɑɑ tuutuumɑ kɑ lɩɩ pǝ tɑɑ.
26 Wɑɑtʋ wei Tɑcɑɑ kɑ́ hɔkɔ ɩ yǝlɑɑ hiŋ nɑ ɩ́ wɑɑ-wɛ tɔ,
ɩsɔtʋ kɑ́ nɑɑkɩ kɛ́ ɩsɩɩ ilim.
Ɩlɛnɑ ilim toŋ nɑ́ɑ́ sɔɔsɩ tɔm nɑɑtosompɔɣɔlɑɣɑ,
ɩsɩɩ kʋyɛɛŋ nɑɑtosompɔɣɔlɑɣɑ nyɑɑlǝm wɛɛ tɔ.
Tɑcɑɑ kɔŋ Asilii nyǝ́mɑ ŋkpɑŋʋɣʋ hɔm
27 Hɑtoo pooluŋ kɛ Tɑcɑɑ nyɑ́ mɑɣɑmɑɣɑ n kɑ́ lɩɩnɑ.
Nyɑ́ pɑ́ɑ́nɑ́ kɛ́ sɔsɔɔnɑ kɛ́.
A wɛɛ kɛ́ ɩsɩɩ ɩsɔŋmʋntʋɣʋ yuŋ nyǝŋkʋ.
Ye n yɔɣɔtǝɣɩ nyɑ́ ntompee tɔɔ wɛ pɑ́ɑ́nɑ́ sɔsɔɔnɑ kɛ́.
Nyɑ́ nsǝmlɛ wɛ ɩsɩɩ kɔkɔ ŋkɑ kɑ nyɑkɩ tɔ.
28 Nyɑ́ feesiŋ wɛ kɛ́ ɩsɩɩ lɔɔʋ sukuɣu nɑ kʋ́ kpɑ kʋtemiŋ,
nɑ kʋ lʋm kpɑ luɣu tɛɛ tɔ.
N cɑɑ n ciɣiti piitimnɑɑ nɑ kʋciɣituɣu kʋwɑkǝlʋɣʋ,
nɑ n tʋ yǝlɑɑ nɔɔsɩ tɑɑ kɛ́ kpɑɣɑnʋkpɑsɩ nsi n kɑ́ tolisinɑ-wɛ tɔ.
29 Amɑ Yosɑlɛm nyǝ́mɑ mɛ ɩ́ kɑ́ yoo yontu ɩsɩɩ pɑ tɔkʋɣʋ ɑcimɑ kɛ ɑhoo tɔ. Ɩ́ kɑ́ wɛɛ lɑŋhʋlʋmlɛ tɑɑ, ɩsɩɩ pɑ hʋlʋɣʋ hǝsɩ nɑ pɑ́ kpɑɑkɩ Tɑcɑɑ pʋɣʋ kɛ Ɩsɛɣɛlɩ kʋkpɑmʋɣʋ tɔɔ tɔ.
30 Tɑcɑɑ n kɑ́ yele nɑ nyɑ́ nɔɣɔ sɔsɑɣɑ nɩɩ.
N kɑ hʋlɩ ɩsǝnɑ n kpɑɑsɑ niŋ sɩ
n mɑkǝnɑ toŋ nɑ nyɑ́ pɑ́ɑ́nɑ́
sɔsɔɔnɑ nnɑ ɑ wɛ ɩsɩɩ kɔkɔ sɔsɑɣɑ,
nɑ tɛʋ heelim, nɑ kʋ tɔmpɛɛ tɔ.
31 Asilii nyǝ́mɑ kɑ́ nɩɩ Tɑcɑɑ nɔɣɔ, ɩlɛnɑ pɑ́ seliɣi.
N kɑ́ mɑ-wɛ nɑ nyɑ́ kpɑ́tʋ́ɣʋ́ sɔsɔɔʋ.
32 Tɑcɑɑ pɑɑ wɑɑtʋ wei kɛ n mɑpɑ-wɛ pɩɩ sɛɣɛsɩ-wɛɣɛ. Ɩlɛnɑ pɑ́ nɩɩ ɑkilimɑnɑɑ nɑ cǝmǝŋ tɑŋ kɛ kpɑkpɑɑ. Tɑcɑɑ n kɑ́ yoonɑ-wɛɣɛ nɑ ń yele niŋ.
33 Hɑtoo lɔŋ kɛ pɑ tɑɣɑnɑ tǝnɑɑsǝlɛ.
Pɑ tɑɣɑnɑ-tɛɣɛ wulɑʋ tɔɔ.
Tǝ limɑɑ kɛ́ nɑ tǝ́ wɑlɑɑ.
Tǝnɑɑsǝlɛ ntɛɣɛlɛ kɔkɔ nɑ tɑɑsɩ tuutuumɑ.
Tɑcɑɑ feesiŋ kɑ́ nyɑɣɑ-ɩ kɛ́ ɩsɩɩ kɔkɔ lɩɩlɛ.