28
Tɛʋ heelim mpi pǝ wɑkǝlǝɣɩ Sɑmɑlii tɔ
1 Sɑmɑlii ɩcɑtɛ tɔm wɛ wɑɩyo kɛ́.
Tǝ wɛ kɛ́ ɩsɩɩ ntenuɣu,
ŋku kʋ wɛ tɛtɛkǝlɛ mʋsʋŋ nyǝntɛ ɩsɔtɑɑ tɔ.
Nkʋɣʋ Ɩfǝlɑyim sʋlʋnyɔɔlɑɑ hɔŋnɑ pɑ tɩ.
Tǝ kɑcɔkɑ wontu wɛɛ kɛ́ ɩsɩɩ hɛtʋɣʋ kʋlontuluɣu kɛ
tɛtɛkǝlɛ mʋsʋŋ nyǝntɛ ɩsɔtɑɑ.
Mpɑ sʋlʋm kʋwɑ tɔ pɑ ɩcɑtɛ ńtɛ́ tǝ tɔm wɛ wɑɩyo kɛ́.
2 Tɑcɑɑ kʋsǝnɑ ntɛɣɛlɛ yʋlʋ toŋ tʋ ɑpɑlʋtʋ ɩsɩɩ tɔmpɛɛ
tɛʋ sɔsɔɔʋ.
Ɩsɩɩ kɑcuculɑɣɑ ŋkɑ kɑ wɑkǝlǝɣɩ tɔ.
Ɩsɩɩ tɛʋ ŋku kʋ suuliɣi lɔɔŋ kɛ lʋm tɔ.
Ɩ kɑ́ lɑnɑ ɩ toŋ nɑ ɩ́ pɛtɩ ɩcɑtɛ kɛ ɑtɛ.
3 Pɑɑ fɛlɩ nɔɔhɛɛ kɛ Ɩfǝlɑyim
sʋlʋnyɔɔlɑɑ ntenuɣu ɩsǝcɑʋ nyǝŋkʋ.
4 Nɑ hɛtʋɣʋ kʋlontuluɣu ŋku ɩ lɑpǝnɑ kɑcɔkɑ nɑ kʋ wɛ
tɛtɛkǝlɛ mʋsʋŋ nyǝntɛ ɩsɔtɑɑ tɔ.
Sɑmɑlii kɑ wɛɛ kɛ ɩsɩɩ yʋlʋ
nɑɑkʋɣʋ Fiki tʋɣʋ pile kɑlɑɑlɑɣɑ,
nɑ ɩ́ kooli nɑ ɩ́ li kpɑkpɑɑ tǝso tɔ.
5 Kʋyɑkʋ ŋkʋ tɔ, Pǝ tǝnɑ pǝ tʋ Tɑcɑɑ kɑ́ wɛɛnɑ ɩsɩɩ ɩ yǝlɑɑ kɑkɑɑsɑɣɑ ntenuɣu kɑcɔkɑ nyǝŋkʋ. 6 Ɩnɩ ɩ kɑ́ tʋnɑ siɣisuɣu lǝmɑɣɑsǝlɛ kɛ mpɑ pɑ cɑɣɑ hʋʋlɛ tɔ. Ɩ kɑ́ tʋ tomɑ kɛ mpɑ pɑ tɔɣɔnǝɣɩ kolontu nɑ pɑ́ tɑnɑ-ɩ ɩcɑtɛ nɔnɔɣɔ tɔ.
Sʋlʋnyɔɔlɑɑ mpɑ pɑ woŋiɣi Ɩsɔ kʋyɔɣɔtʋtʋ tɛlǝsǝlɑɑ tɔ
7 Pǝ kpɛŋnɑ kɔtǝlɑɑ nɑ Ɩsɔ kʋyɔɣɔtʋtʋ tɛlǝsǝlɑɑ tɔtɔ,
sʋlʋm lɑpɑ nɑ pɑ́ cɛŋlǝɣɩ.
Sʋlʋm toŋ nyǝm tolisiɣi-wɛ.
Pɑ cɛŋlǝɣǝnɑ sʋlʋm toŋ nyǝm.
Sʋlʋm lipɑ-wɛ, sʋlʋm toŋ nyǝm tolisɑ-wɛ.
Pɑ tɛlǝsǝɣɩ Ɩsɔ kʋyɔɣɔtʋtʋ nɑ pɑ́ cɛŋlǝɣɩ.
Pɑ yɔɣɔtǝɣɩ tɔm nɑ pɑ́ sɩɩkɩ nɑ pɑ́ leŋliɣi.
8 Tɔtʋ wɑɑsǝnɑ pɑ tɑɑpǝlǝnɑɑ tǝnɑ tɔɔ.
Kʋsɔɣɔtʋ kɛ pɑɑ timpi, tǝpɑntɛ fɛɩ.
9 Nɑ pɑ́ yɔɣɔtǝɣɩ sɩ:
Aweɣe Ɩsɑyii sɛɣɛsǝɣɩ nyǝmtʋ?
Aweɣe ɩnɩ ɩ hʋlǝɣɩ tɔm sɩ ɩ́ nyɩ?
Piyɑ mpɑ pɑ cɛpɑ hǝlɑ kɛ nɔɔnɔɔ tɔ
yɑɑ pǝkɔɔlɑsɩ?
10 Mpi tɔ, kʋsǝsɩɩtʋ ntǝɣǝlɛ kʋsǝsɩɩtʋ*fɑ*.
Kʋtʋtʋtʋ ntǝɣǝlɛ kʋtʋtʋtʋ.
Sɑŋɑ sɩ tǝnɛ, cele sɩ tǝnɛ. ɑ Ɩsɛɣɛlɩ nyǝ́mɑ mɑɣɑsɑɣɑ Ɩsɑyii yɔɣɔtɑɣɑ kɛ nɑ pɑ woŋiɣi-ɩ.
11 Tɔʋ, yǝlɑɑ mpɑ pɑ kʋyɔɣɔtʋtʋ ɩɩ nɩɩkɩ tɔ,
nɑ mpɑ pɑ yɔɣɔtǝɣɩ nsǝmɑ kpɑɩ nyǝnɑ tɔ,
pɑ tɔm kɛ Tɑcɑɑ kɑ́ yɔɣɔtǝnɑ yǝlɑɑ pɑnɛ.
12 Ɩ kɑ tɔmɑɣɑ sɩ:
Tǝhɛɛsǝlɛ ntɔ,
ɩ́ yele mpɑ pɑ kɑwɑ tɔ nɑ pɑ́ hɛɛsɩ.
Lonte nte tǝ wɛ tǝpɑmm tɔɣɔlɔ.
Amɑ pɑ kisɑ nɩɩʋ.
13 Nɑ pɑ́ tɔ sɩ:
Kʋsǝsɩɩtʋ ntǝɣǝlɛ kʋsǝsɩɩtʋ.
Kʋtʋtʋtʋ ntǝɣǝlɛ kʋtʋtʋtʋ.
Sɑŋɑ sɩ tǝnɛ nɑ cele sɩ tǝnɛ.
Pǝ wɛ ḿpʋ́ɣʋ́ sɩ ye pɑ tɔŋ ɩlɛ,
pǝ co-wɛ nɑ pɑ́ hoti ɑlele nɑ pǝ́ pɛlɩ-wɛ,
nɑ kɑtɔkɑ kpɑ-wɛ nɑ pǝ́ tɛɛnɑ-wɛ.
Kite tɛɛ pǝlɛ
14 Pǝ tɔɔ tɔ, woŋlɑɑ mɛ,
ɩ́ nɩɩ Tɑcɑɑ kʋyɔɣɔtʋtʋ.
Yǝlɑɑ nyʋɣʋ nyǝ́mɑ mpɑ mɛ ɩ́ tɔkɩ kɑwulɑɣɑ kɛ Yosɑlɛm tɑɑ tɔ.
15 Ɩ́ nɩɩ, nti mǝ mɑɣɑmɑɣɑ ɩ́ yɔɣɔtǝɣɩ tɔɣɔlɛ sɩ:
Tɑ́ nɑ sǝm tǝ pɛɛlɑ nɔɣɔ.
Tɑ́ nɑ ɑtɛtǝlɛ tǝ yɔɣɔtɑɑ nɑ tǝ́ sɩɩ.
Pɑɑ wɑhɑlɑ sɔsɔ kɔmnɑ ɩ kɑɑ tɑlɑ-tʋ.
Mpi tɔ, kɑloolɑɣɑ ntɛ́ tɑ́ tǝcɔɔsǝlɛ.
Pɔpɔtʋ kɛ tɑ́ tǝŋmɛllɛ.
16 Pǝ tɔɔ kɛ́ Tɑcɑɑ Ɩsɔ yɔɣɔtǝɣɩ sɩ:
Ɩɩ nɑɑkɩ, mɑ sɩɩkɩ kite tɛɛ pǝlɛ kɛ Siyɔŋ tɑɑ.
Nkuluŋɑ tɑɑ pǝlɛ*fɑ* nte pɑ tɑɣɑnɑɑ tɔɣɔ.
Tǝ kɛ́ liɣitee pǝlɛ nte tǝ cɑɣɑ teu tɔ.
Ye wei ɩ́ tisɑ tǝ tɔɔ kɛ́ yuŋ
ɩ wɛɛkǝnɑ tomɑ kɛ ɩsɩɩ ntɛ. ɑ Nkuliŋɑ tɑɑ pǝlɛ: Pɛlɛ pɑ tɛ pɑ tʋɣɩ pɛɛ nɑɑlǝɣɩ kutuluɣu ŋkuluŋɑsɩ tɑɑ kɛ́ sɩ kʋ lɑ toŋ.
17 Tɑmpɑnɑ tǝŋʋɣʋ kɛ mɑ lɑkǝnɑ nɑ pǝ́ siɣisi tǝcɑ.
Mɑɑ lɑnɑ siɣisuɣu nɑ pǝ́ wɛɛ teitei.
Amɑ tɔmpɛɛ tɛʋ kɑ́ kuu mǝ kɑloolɑɣɑ tǝcɔɔsǝlɛ.
Lʋm kɑ́ su nɑ pǝ́ tɔɣɔ mǝ pɔpɔtʋ tǝŋmɛllɛ.
18 Mǝ nɑ sǝm mǝ nɔɣɔ pɛɛlʋɣʋ kɑ́ wɑkǝlɩ.
Mǝ nɑ ɑtɛtǝlɛ mǝ kʋyɔɣɔtʋtʋ
nɑ mǝ kʋsǝsɩɩtʋ kɑɑ tɑɑŋɩ.
Kʋyɑkʋ ŋku wɑhɑlɑ sɔsɔ kɑ́ kɔɔ tɔ,
ɩ kɑ́ pɑɑ-mɛɣɛ nɔɔhɛɛ.
19 Pɑɑ wɑɑtʋ wei kɛ́ wɑhɑlɑ ɩnɩ ɩ kɑ kɔɔ ɩ kpɑɑkɩ-mɛɣɛ. Mpi tɔ, tɑnɑŋ nɑ ilim tɑɑ nɑ tɑɑnɑɣɑ kɛ wɑhɑlɑ kɑ́ kɔŋ. Wɑhɑlɑ kɔkɔtɛ tike kɑ́ tʋ-mɛɣɛ sɔɣɔntʋ sɔsɔɔntʋ.
20 Wɑhɑlɑ kɑ́ wɛɛ kɛ́ ɩsɩɩ yʋlʋ
kʋhǝntʋɣʋ wɛɛkʋɣʋ tǝtopi pɩɩ tɑkɩ-ɩ,
yɑɑ ɩ kʋtɑkʋɣʋ wɛɛkʋɣʋ tǝpɛɛ pɩɩ tɑkǝɣɩ tɔ.
21 Tɑcɑɑ kɑ́ sǝŋ ɩ nɑɑsɩ tɑɑ kɛ́ ɩsɩɩ
ɩ kɑ lɑpʋ Pelɑsim pʋɣʋ tɑɑ tɔ.
Ɩ nɑntʋ kɑ́ sele
kɛ́ ɩsɩɩ Kɑpɑwɔŋ tɛtɛkǝlɛ tɑɑ.
Ɩ kɑ́ lɑ tǝmlɛ nte pɑ tɑ nyɩ tɔ.
Ɩ kɑ́ yoosi ɩ kʋlɑpǝlɛ nte tǝ kɛ́ sɔsɔɔlɛ tɔ.
22 Pǝnɛntɑɑ ɩ́ tɑɑ sʋʋ lɛlɑɑ woŋɑ tɑɑ. Pǝ́ tɑɑ kɔɔ nɑ mǝ kʋhɔkʋm tɑɣɑnɩ nyɔɔsʋɣʋ. Mpi tɔ, pɑ tɛmɑ sɩɩʋ sɩ pɑɑ wɑkǝlɩ tɛtʋ tǝnɑ. Pǝ tǝnɑ pǝ tʋ Tɑcɑɑ Ɩsɔ kiŋ kɛ mɑ nɩɩnɑ-tɩ.
Ɩsɔ lǝmɑɣɑsɛɛ nɑ hɑ́tʋ́ nyǝnɑ
23 Ɩ́ ke ŋkpɑŋŋ,
Ɩ́ nɩɩ mɑ nɔɣɔ.
Ɩ́ cɑɣɑ tǝtiɣitiɣi,
Ɩ́ nɩɩ mɑ tɔm.
24 Hɑ́tʋ́ wei ɩ lukiɣinɑ ɩ tɑɑlɛ kɛ kʋtɑmsɑ sɩ ɩ tuuki?
Ɩ kɑɑ kpɑɣɑ ɩ wɑɑtʋnɑɑ
nɑ ɩ pɑɑsǝnɑ kpɛɛsɩ hɛɛʋ nɑ ɑwɑsɑ.
25 Ɩ tɛŋ hɑlǝm tɑɣɑnʋɣʋ tɔ tuusi pee kɛ ɩ ŋmɩɩsǝɣɩ.
Ɩlɛnɑ ɩ́ tuu tɔɣɔnɑɣɑ pee kɛ ɩpɔɔŋ tɔɔ.
Ɩ tuuki tɔɣɔnɑɣɑ pee kɛ lonɑ kʋpɑnɑ nɑ toosi tɔɔ.
26 Hɑ́tʋ́ Ɩsɔ sɛɣɛsǝnɑ-ɩ
kʋsǝsɩɩtʋ ntɩ sɩ ɩ́ tǝŋ.
Ɩsɔ hʋlǝnɑ-ɩ tɩ.
27 Pɑɑ mɑkɩ tuusi nsi pɑ yɑɑ sɩ
Nikɛɛlɩ tɔ sɩ pee nɑ nɑɑŋ.
Pǝ́cɔ́ pǝ fɛɩ sɩ kɛɛkɛ pɔpɔtɛ
ɩ́ tɔ tuusi nsi pɑ yɑɑ sɩ
Kumɛŋ tɔ sɩ pee tɔɔ.
Amɑ kpɑ́tʋ́ɣʋ́ kɛ pɑ mɑkǝnɑ-yɛ.
Kpɑtiyɑ kɛ pɑ mɑkǝnɑ tuusi pee.
28 Pɑ nɑŋǝɣɩ tɔɣɔnɑɣɑ pee nyǝŋkɑ
nɑ pɑ́ lɑ kʋtɔɣɔʋ yɑɑ,
ɩlɛ pǝ tɑɣɑ tɑm tɔɔ kɛ́ pɑ nɑŋǝɣɩ.
Pɑ tusiɣi kɛɛkɛ pɔpɔlɛɛ kɛ́ nɑ pǝ kpɑɣɑnǝŋ.
Ɩlɛ kpɑɣɑnǝŋ ɩɩ yɔkǝɣɩ tɔɣɔnɑɣɑ pee nɑ ɩ ɑcʋwɑ.
29 Pǝ tǝnɑ pǝ tʋ Tɑcɑɑ kiŋ kɛ yɑɑsi ɩnɛ ɩ lɩɩnɑɑ tɔtɔ.
Ɩsɔ lɑɣɑtʋ tɑsʋɣʋ kɛ kʋpɑntʋ kɛ́, nɑ tǝ́ tɔɔwɑ.