11
Wulɑʋ kʋfɑlʋ tɔm
1 Pǝlɛ pǝ wɑɑlɩ ɩlɛ pǝliŋɑ kɑ́ hɛlɩ Sesee*fɑ* kite kʋpǝntɛ tɔɔ. Akpɑɑlɛ kɑ́ lɩɩ ɩ lʋlʋɣʋ lilɑ tɔɔ. ɑ Sesee: Sesee kɛ wulɑʋ Tɑfiiti cɑɑ kɛ́, ɩ lʋlʋɣʋ kɛ pɑ yɑɑkɩ ɩsɩɩ tʋɣʋ kite.
2 Tɑcɑɑ Feesuɣu kɑ́ wɛɛ ɩ tɔɔ kɛ́.
Kɩɩ hɑ-ɩ lǝmɑɣɑsɛɛ nɑ ɩ́ tiikinɑ ɩ yǝlɑɑ.
Nɑ ɩsǝnɑ yʋlʋ kɑ pɩɩlɩ tǝmɑ kʋlɑpɛɛ
nɑ nyǝm tɔ nɑ ɑ lɑpʋ.
Nkʋ kʋ yekinɑ nɑ yʋlʋ nyɩ Ɩsɔ nɑ ɩ́ wɛɛnɑ ɩ sɔɣɔntʋ.
3 Tɑcɑɑ nyɑmnɑʋ ntɛ́ ɩ lɑŋhʋlʋmlɛ.
Ɩ kɑɑ lɑnɑ tɔm nti ɩ nɩɩ kʋnɩɩ tɔɣɔ tǝmlɛ.
4 Ɩ kɑ́ tǝŋ siɣisuɣu nɑ ɩ́ hʋʋnɑ kʋnyɔntʋnɑɑ,
nɑ ɩ́ tǝŋ tɑmpɑnɑ nɑ ɩ́ yɔɣɔtǝnɑ
tɛtʋ tɑɑ wɑhɑlɑ nyǝ́mɑ.
Ɩ kʋyɔɣɔtʋtʋ kɛ ɩ
kɑ́ mɑnɑ tɛtʋ yǝlɑɑ ɩsɩɩ kpɑ́tʋ́ɣʋ́.
Ɩ kɑ́ kʋ ɑsɑɣɑɑ nɑ ɩ nɔɣɔ tɑɑ kʋyɔɣɔtʋtʋ.
5 Tɑmpɑnɑ tǝŋʋɣʋ nɑ kʋpɑntʋ lɑpʋ kɑ́ pǝsɩ
ɩsɩɩ tɑmpɑlɑ nɑ ɩ́ tɔɣɔlɩ.
6 Tɑɑlɛ hɑɣɑ nɑ ɩwǝyɑɣɑ pɑɑ cɑɣɑ tǝntǝmlɛ.
Kpou nɑ pinɑɣɑ pɛlɛɣɛ tǝhǝntǝlɛ kʋlʋmtǝlɛ.
Pǝyɑɣɑ sǝkpelɑɣɑ kɑ́ tiikiɣinɑ-wɛ.
7 Nɑʋ nɑ tɑɑlɛ wontuɣu ŋku pɑ yɑɑ sɩ wusi tɔ pɑɑ kɑɑ
nyɩɩtʋ tǝtɔɣɔlɛ, nɑ pɑ piyɑ nɑ́ɑ́ hǝntɩ tǝntǝmlɛ.
Nyɩɩtʋ kɛ tɔɣɔlɑɣɑ nɑ nɑʋ pɑɑ tɔɣɔ.
8 Pǝyɑɣɑ ɑhʋlʋm kɑ liɣili tʋm pʋ́ʋ́ɣʋ́ tɔɔ.
Pǝyɑɣɑ sǝkpelɑɣɑ nɑ́ɑ́ sʋsɩ kɑ niŋ kɛ ɑkɑlɑ pʋ́ʋ́ɣʋ́ tɑɑ.
9 Tɑcɑɑ pʋɣʋ nɑŋŋ nyǝŋkʋ tɔɔ tʋ
nɔɣɔlʋ kɑɑ lɑ ɩ tɔɣɔntǝlɛ kɛ ɩsɑɣɑtʋ.
Pǝ tɑɣɑ pʋlʋ, yǝlɑɑ kɑ́ nyɩ Ɩsɔ kɛ́ nɑ pǝ́ su
tɛtʋ ɩsɩɩ lʋm wɑɑsʋɣʋ teŋku lumɑŋ tɔɔ tɔ.
10 Kʋyɑkʋ ŋkʋ Sesee lʋlʋɣʋ tʋ kɑ sǝŋnɑ ɩsɩɩ
ɑntulinyɑ yǝlɑɑ tuutɑ.
Piitimnɑɑ kɑ kɔɔ sɩ ɩ́ tɑsɑ-wɛɣɛ lɑɣɑtʋ,
nɑ Ɩsɔ teeli nɑ timpi tɑɑ ɩ wɛɛ tɔ.
Mpɑ kolontunɑɑ kɑ kuuwɑ tɔ pɑ mǝlʋɣʋ
11 Kʋyɑkʋ ŋkʋ tɔtɔɣɔ Tɑcɑɑ n kɑ́ hʋlɩ nyɑ́ toŋ.
N kɑ́ lǝsɩ nyɑ́ yǝlɑɑ, nɑ ń kɔnɑ nyɑ́ nyǝ́mɑ kɑkɑɑsɑɣɑ.
Mpɑ pɑɑ wɛ Asilii tɛtʋ, nɑ Icipiti ntɔɣɔŋ tɛtʋ,
nɑ Icipiti mpǝtǝŋ tɛtʋ, nɑ Ɩtiyopii tɛtʋ, nɑ Ilɑm tɛtʋ,
nɑ Pɑpiloni tɛtʋ, nɑ Silii tɛtʋ ɩcɑtɛ Hɑmɑtɩ,
nɑ tɛtʋ nti lʋm cɔɔnɑɑ tɔ.
12 N kɑ́ kpɑɑsɩ piitimnɑɑ kɛ tuutɑ.
N kɑ́ kpeɣeli Yutɑ nyǝ́mɑ nɑ Ɩsɛɣɛlɩ nyǝ́mɑ mpɑ
pǝ kuuwɑ nɑ pǝ́ yɑsɩ tɛtʋ tǝnɑ tɑɑ tɔ.
13 Wɑɑtʋ ɩnɩ Ɩfǝlɑyim nyǝ́mɑ ɩsɛsɛɛmlɛ kɑ́ sɑɑlɩ.
Pɩɩ kpiisi Yutɑ nyǝ́mɑ kolontunɑɑ.
Yutɑ nyǝ́mɑ kɑɑ lɩɩ Ɩfǝlɑyim nyǝ́mɑ kɛ pɑtɩɩlɛ.
14 Pɑɑ kpɛntɩ nɑ pɑ́ kpɑ Filiisi nyǝ́mɑ tɔɔ
kɛ́ ilim tǝtʋlɛ
pɔɔŋ tɑɑ. Pɑɑ mǝŋnɑ ilim tǝlɩɩlɛ tɔɔ,
nɑ pɑ́ kuu wʋlɑɣɑ tɛtʋ tɑɑ nyǝ́mɑ wontu.
Pɑɑ tɔɣɔ Ɩtɔm nɑ Mowɑpʋ pǝ tɛtʋ nɑ
pɑ́ ŋmɑkǝlɩ Amoni nyǝ́mɑ nyǝntʋ.
15 Tɑcɑɑ n kɑ́ yele nɑ Icipiti
ilim tǝlɩɩlɛ tɔɔ teŋku ŋkpɑlɑɣɑ lʋm nyɔɔ.
N kɑ teɣeti kɑtɑŋɑ kɛ Ɩfǝlɑtɩ pɔɣɔ,
nɑ ń fɑɣɑ-kɛɣɛ lɔisi nɑɑtosompɔɣɔlɑɣɑ,
nɑ nyɑ́ nɔɣɔ heelim kɔkɔ nyǝm.
Hɑlǝnɑ yǝlɑɑ tɔŋ nɑ pɑ́ tɛsǝɣɩ nɔɔhɛɛ.
16 Ɩlɛnɑ pǝ kɑɑsɩ hɑpǝlɛ kɛ yǝlɑɑ
kɑkɑɑsɑɣɑ ŋkɑ kɑ wɛ Asilii tɔ.
Ɩsɩɩ pɩɩ kɑɑsʋɣʋ Ɩsɛɣɛlɩ
nyǝ́mɑ kɛ pɑ nyǝntɛ kɛ hɑtoo lɔŋ tɑɑ tɔ.
Wɑɑtʋ ɩnǝɣɩ pɑ lɩɩkɑɣɑ Icipiti.