1 E Iesu taum ana nuna kakak a asaerla la sot ting na ris a puka tasi Galili, ting na papar anuna tarai Gerasa. 2 Ning i purum kusun a mon, ning a barsan miting na kulam a minatla, ning a mot i solong tari, i han barati. 3 A barsan ning i laun ka ting na kulam a minatla. Bel tik i tolsot sur ir dot akes pasi, a sen otleng bel i toh pasi. 4 Di sira dot naur a kuna pa naur a hana ana senla, ika i sira dat kutus ka a sen kusun naur a kuna, pa i sira sai siksiklik a sen miting na naur a hana. Pa bel tik ir amolmol pasi. 5 Pa i sira kukuk mokos ana hiakamisla pa ana moromla ting na kulam a minatla, pa ting na mangirla otleng, pa i kotkot a palaonala ana hatatla. 6 Ning i oroi bakbak pas e Iesu, i dun teteki pa i kes ana naur a bokon na hana salanigo tana. 7 A barsan ning i kukuk kol mange, “Iesu, a Nat e God a Leklek Kol, asaning ur toli hok? A nunung u ana risana e God sur gong u akadik iau.” 8 I atongi larne, anasa e Iesu ka atai tari mang, “U a mot, purum kusun a barsan ne!” 9 Pa e Iesu i dekeni mange, “Esi na risam?” I kelesi mang, “A risak a liur a mot, anasa mila galis kol.” 10 Pa i nunung rakrakai e Iesu sur gong i sune sen la kusun a pukna ning.

11 A tnan liur a boroi la hangan ting na mangir ning i milau. 12 A motla la nunung rakrakai e Iesu mang, “Ur sune mila tetek a boroila sur milar kas uting onla.” 13 E Iesu i malmaling sen la. La purum kusun a barsan ning, pa la kas tar ana boroila. A boroila la liu purum uting na palis sur utumo na puka tasi, pa la dom rop. A boroila rop i arlar ana naur a rip.

14 La ning la tai alar a boroila, la dun ulak, pa la atatai ana utna ne ting na hanua anunlai pa dingla na hananuala otleng. Pa a tarai la han sur lar oroi asaning i hanot. 15 Ning la hanot tetek e Iesu, la oroi a barsan ning a kabaliur a motla la ka purum tar kusuni. Kaning i kes, ka pipis pas pa ka mananos ulak. Pa la matmataut. 16 La oroi asaning e Iesu i toli, pa la atai a tarai ana utna ning i hanot ana barsan ning a motla la solong tari, pa ana boroila otleng. 17 Lamur la nunung ongongos e Iesu sur ir han kusun anunla papar.

18 Ning e Iesu i kas ana mon, a barsan ning a motla la solong tari, i nunung e Iesu sur diar armuri. 19 Ika e Iesu bel i malmaling, i atai i ka mange, “Ur han uting na num a rumai tetek a maimla, pa ur atai la ana tnan utna ning a Leklek ka tol tari hom, pa ana nuna marmaris tetek u.” 20 Pa i han, pa i warwara amon utumo na papar Dekapolis* Dekapolis a kamkamna mang ning a bonot a tatatnan hanua. ana tnan utna ning e Iesu ka tol tari onoi. Pa a tarai rop la kulkulan.

21 E Iesu i kas ana mon pa i ulak uto na ris a puka tasi. Ning i kes tumokorot, a tnan kunum a tarai la atalilis pasi. 22 Ning a ningnigo tagun a rumai lotu a risana e Jairus, i hanot. Ning i oroi e Iesu, i punga na hanrawai salanigo tana. 23 Pa i nunung kol mange, “A natuk hane, milau ir mat. Lamut, dar han pa ur suah naur a kum saot ono, sur ir langolango ulak pa ir laun.”

24 Ning dia han taum, a kunum a tarai la mur e Iesu, pa la tur alar pasi.

25 Ning a hane tingia i sasam ana tinsaman a suluk. Ka sasam pas ning a bonot pa pisir naur a rau. 26 Ka han pas tetek a galis a doktala sur lar nangani, ika la saran a tnan kankan teteki pa la amus pas anuna mani. I rakrakai kol ma a tinsaman ning ono. 27-28 Ning i longor a warwara o e Iesu, i nuki mang, “Ning ar tuk ka anuna kaen ar langolango ulak.” Pa i han tumo lamur tana na tinine kunum a tarai, pa i tuk anuna saket. 29 Pa a suluk i suah kakat, pa a hane ning i kilang a palaona mang a tinsaman ka rop. 30 Ning e Iesu i kilangi mang a rakrakai i han kusuni, i talingir na tinine kunum a tarai, pa i deke mange, “Esining i tuk anuka kaen?” 31 Anuna kakak a asaer la atai i mang, “U oroi ot a kunum a tarai ne la tur talilis pas u, sur asa ning u kabah mang, ‘Esining i tuk iau?’ ” 32 Ika e Iesu i tatatai taltal sur esining i tuk tari. 33 A hane ning i matmataut, pa i koloron, anasa i tasman a utna ning i hanot ono. I han tetek e Iesu, i punga salanigo tana, pa i atong puasa a utna ning ka tol tari. 34 Pa e Iesu i atai i mange, “Natuklik, anuma tortorot ka alangolango pas u. Ur han taum ana bal molmol, anuma tinsaman ka rop.”

35 Kaning ot e Iesu i warwara, dingla na tarai la hanot miting na rumai ane Jairus, pa la atai i mang, “Sur asa ning u amolot a Tena Asaer? E natum hane ka mat.”

36 E Iesu i longor warwara ning, i atai ka e Jairus mang, “Gong u matmataut. Ur tortorot ka.” 37 Bel i malmaling pas tik sur ir muri, ika i ben pas e Pita, e Jems ditas ma e Jon. 38 Pa ning la hanot ting na rumai ane Jairus, e Iesu i longor a totbor, pa aregaia na domos. 39 I kas pa i atai la mange, “A totbor pa tintinangis na sa ining? A kaklik ning bel i mat, kaning i borbor duman ka.” 40 La malani ka. I sune purum sen la rop, i ben pas a tamana kaklik pa e tana, pa ditol otleng ning ditol han taum ono, pa la kas tetek a kaklik. 41 E Iesu i tong pas a kuna kaklik hane ning, pa i atai i mange, “Talita koum!” A kamkama warwara ne, “Hanelik, a atai u, ur kamtur.” 42 Aiapka i kamtur pa i han taltal. A hanelik ning ka takai a bonot pa pisir naur a rau anunai. Pa la kulkulan kol. 43 E Iesu i sairas rakrakai tar la sur gong la warwara ana utna ne. Pa i atai la sur lar tabar a hanelik ning.