1 Na tastasik, a mang sur mulor nuk pas na tumtubundala, ning la han mitumo e Ijip. La rop la han nahai a diah bakut, pa la rop la kotop a Kubar a Tasi. 2 I arlar larning di baptais la ana diah bakut pa a tasi, pa i apuasa i mang la na tarai ane Moses. 3 La rop la ien takai a utna ka ning a Inguna e God i sarani, 4 pa la gang ana takai a malum ka ning a Inguna e God i sarani, anasa la gang ana hat a Ingun, ning i han taum onla. Pa a hat ning, e Karisito. 5 Ika a galis kol onla, e God bel i gas onla. La mat amon pa na minatinla la borbor ororos ka ting na hanua bel.

6 Pa a ututnala ne i hanot sur ir atumarang dala, sur gong a balandala i mang sur a laulauna, arlar ana balanla i mang suri. 7 Gong mulo lotu tetek a asasongo na godla arlar ana dingla na tarai onla. Larning di ka tumus tari ting na Buk Tabu larne,

11 A ututnala ning, i hanot onla, sur ir atumarang dala. Pa di ka tumus tari sur a asaer tetek dala, ning dala laun ana ararop a pukakiarla. 12 Ning tik i nuki mang i tur rakrakai, ir tumarang, sakana ir punga tar ana toltol laulau. 13 Na arlam ning mulo ka pastek tari, bel mulo ka mulo pasteki, a galis a tarai otleng la pasteki. E God i sira tolsot pas anuna warwara, pa bel ir noren sen mulo sur ta arlam ir hanot tetek mulo, ning ir itna tana rakrakaimulo. Ning ta arlam ir hanot, e God ot ir sang pas ta ngas, sur mulor han masik kusuni pa mulor tolsot pasi.

14 I maining na halalik, gong mulo lotu tetek a asasongo na godla, mulor liu kusun la. 15 A warwara tetek mulo ning mulo ka tastasman. Pa mulo ot mulor warkurai wakak anuka warwara ne. 16 Ning dala gang ana kap ning di ka atong wakak tar onoi tetek e God, dala takai taum o e Karisito, ana sulukna. Pa ning dala hangan ana bret ning dala tibiki, dala takai taum o e Karisito, ana palaona. 17 Takai a bret. Dala galis, ika, dala takai palaondala, anasa dala hangan ana takai ka a bret.

18 Dalar oroi a tarai Israel. Ning la ien a inagoi ning di ka artabar tar onoi tetek e God ting na logo na tuntun artabar, la takai ka taum o e God. 19 Asa a kamkama nuk a warwara? A utna ning di artabar tar onoi tetek a manar ning di koti, bel i to pas ta utna, pa a manar ning di artabar teteki, i otleng bel i to pas ta utna. 20 A atongi tamulo mang a ututnala ning a taraila ning bel la tortorot la artabar onoi, la artabar onoi tetek a motla, pa bel tetek e God. Pa bel a mang sur mulor lasan taum ana motla. 21 Bel mulor tolsot pasi sur mulor gang ana kap anuna Leklek, pa ana kap otleng anuna motla. Pa bel mulor tolsot pasi sur mulor hangan ting na logo na hangan anuna Leklek, pa ting na logo na hangan otleng anuna motla. 22 Mangasa, dala mang sur dalar angangas a Leklek, sur a nuknukna ir laulau tetek dala? Mangasa, a rakrakaindala i itna tana rakrakaina?

23 Sakana tik ir atongi mang, “A ututnala rop i wakak ka sur dalar toli,” ika, bel a ututnala rop ir nangan dala. “A ututnala rop i wakak ka sur dalar toli,” ika, bel a ututnala rop ir arakrakai dala. 24 Gong tik i awakak pasi ot, ir awakak pas a tarai masik.

25 A inagoila rop ning di siuran la ting na rumai a sisiuran, mulor ieni ka. Pa gong mulo kabah ning di ka artabar tar onoi tetek a manar ning di koti o bel, sur gong a nuknukimulo ir tiu mulo mang mulo tol a laulauna. 26 Anasa a Buk Tabu i atongi larne, “A rakrakan hanua pa a ututnala rop ning la kes ia, anuna Leklek.” Buk Song 24:1

27 Ning tik ning bel i tortorot i nunung mulo, sur mulor hangan taum onoi, pa mulo mang sur mulor han, i wakak ka. Pa a ututnala rop ning di tabar mulo onoi, mulor ieni ka, pa gong mulo kabah onoi, sur gong a nuknukimulo ir tiu mulo. 28 Ika, ning tik ir atongi tamulo mang, “A utna ne di ka artabar tar onoi tetek a asasongo na godla,” gong mulo ieni, sur gong mulo alaulau a nuknukna esaning i atai mulo onoi. 29 Bel a warwara ana nuknukimulo. A warwara o esaning i atai mulo pa i nuki mang mulo tol a laulauna.

Ia ka langolango. Sur asa ning a nuknukin tik ir warkurai iau? 30 Ning a atong wakak pas tetek e God ana ngak a utna na hangan, sur asa ning tik ir tiu iau ana utna ning ia ka atong wakak pas onoi? 31 I maining, ning mulo hangan, o mulo gang, o ta ngas a utna otleng mulo toli, mulor toli sur mulor aitna pas e God onoi. 32 Gong mulo tol ta utna ning ir apungan tik anasa ir tol a toltol ning a nuknukna ir tiwi onoi. Tik miting na tarai Juda, o miting na tarai ning bel a tarai Juda, o miting na tarai a lotu ane God. 33 A mang sur ar agasgas a tarai rop ana ututnala rop ning a sira toli. Bel a tol ta utna sur ir awakak iau. A tol a ututnala sur ir awakak al galis a tarai, sur e God ir alaun pas la.