ଜୀସୁ କ୍ରୀସ୍ତତି ଜୀୱୁ ଅ଼ଡ଼େ ଈ ଦାର୍‌ତିତା ମାଚି ତାନି କାତା ମାର୍କ ରା଼ଚାମାନି ନେହିଁ କାବ୍ରୁ; ପୁଃନି ମେ଼ରାତି ସା଼ରିଗଟା ନେହିଁ କାବ୍ରୁ ପତିୟାଁ ବିତ୍ରାଟି ଈଦି ଆ଼ହିମାନେ ର଼ ପତି । ଏ଼ ବାରେ ନେହିଁ କାବ୍ରୁ ଇନେରି । ଏ଼ ପତିୟାଁ ଜୀସୁ କ୍ରୀସ୍ତ ହା଼ତି ଡା଼ୟୁ ମାତିୟୁ, ମାର୍କ, ଲୂକ ଅ଼ଡ଼େ ଜହନ ରା଼ଚାମାଚେରି । ମାର୍କ ରା଼ଚାମାନି ନେହିଁ କାବ୍ରୁ ସା଼ରିଗଟା ନେହିଁ କାବ୍ରୁ ବିତ୍ରାଟି ବାରେତି କିହାଁ ସ଼ଟୁ କାବ୍ରୁ । ଈ ନେହିଁ କାବ୍ରୁ ବାରେ କିହାଁ ନ଼କେଏ ଇଚିହିଁ ଜୀସୁ ଜାର୍ନାଆ଼ତି ଡା଼ୟୁ ୬୫-୭୦ ବାର୍ସା ବିତ୍ରା ରା଼ସ୍‌କି ଆ଼ହାମାନେ ଇଞ୍ଜିଁ ବାଇବଲ ପୁଚି ବୁଦିଗାଟାରି ଏଲେଇଞ୍ଜିମାନେରି । ର଼ମ୍‌ ଗା଼ଡ଼ାତା ମାଚି କ୍ରୀସ୍ତାନା ଲ଼କୁଣି ରା଼ହାଁ କିହାଲିତାକି ଈ ପତି ର଼ମ୍‌ ଗା଼ଡ଼ାତା ରା଼ଚାମାଚେସି ।

ମାର୍କ ଅ଼ର ଦ଼ରୁ ଜହନ ମାର୍କ, ଏ଼ୱାସି ପା଼ୱୁଲ ଅ଼ଡ଼େ ବର୍ନବା ତ଼ଣେ ମାଚେସି । ସାମା ଏ଼ୱାସି ସେ଼ବା କାମାତାକି ହାଲାଆଲିଏ ଏ଼ୱାଣି ମ଼ନ ଊଣା ଆ଼ହାମାଚେ କାମା ୧୩:୧୩ । ମାର୍କ ଅ଼ଡ଼େ ୱେଣ୍ଡେ ବର୍ନବା ତଲେ ସେ଼ବା କାମାତା ହାଚେସି କାମା ୧୫:୩୭-୩୯ । ମାର୍କ ପିତରତି ନେହିଁ ଜାଟୁ ମାଚେସି ୧ପିତ ୫:୧୩ । ମାର୍କ ଜୀସୁ କ୍ରୀସ୍ତତି ଜୀୱୁତି କାତା କି ସେ଼ବା କାମାତି ମେସା ହିଲାଆତେସି, ବୁଦିଗାଟାରି ନାମିମାନେରି ମାର୍କ ରା଼ଚାମାନି ନେହିଁ କାବ୍ରୁତା ପିତରତି କାତା ହା଼ରେକା ରା଼ଚାମାନେସି । ମାର୍କ ସୀସୁୟାଁତି କାମା ଇଞ୍ଜାଁ ଜୀସୁ ରା଼ନି ଦିନାତି କାତା ଜା଼ପ୍‌ନାଣି ରା଼ଚାମାନେସି ।