1 Su Paraseo pe su tisa se odo Lo ta Moses ho‑us Yerusalem hala Galili pe henelukum Yesus. 2 Pe su hendroni su disaipel se ta Yesus hesenesingen lumwe’ su illa huyen pwi, odoke ke hana‑an ke song.

3-4 (Su Paraseo pe su Yuda ti hondrotowe punou ta su il ta su ti ile puko‑on lakopwi. Su we hendreyo‑on song pwi uu kenon ndre su hesingen lumwe’ su. Singi lumwei ti ndre kastam tadan. Song odo suhen ti we hesingen ndre oh, kinum pe su hoyo‑on. Lo ta su il ta su yi ti ipaninyan kastam odo singi kap, pe singi kur, pe singi palet, pe singi lok odo metir.)

5 Ile pe su Paraseo pe su tisa odo Lo hehndremte Yesus ihpa, “Ei, Yesus. Su lewim ti hesenohtot punou ta su papo’ tidu pwi ti ile sa? Su lumwe’ su mo‑on odoke hantakun song pe hana‑an ti ou apa huyen?”

6 Yesus isomwi su ihpa, “Oduu ti ndramat odo tawiwihi sa lau. Profet Aisaiah pihe idetorwe Nolwo‑on Lapan ti idu‑uw taduu. Nolou erti ipe ihpa:

8 Oduu ti edengkakik puko‑on ile sal ndre ndramat iduwei, pe etndre‑au odo Lo ndre Lapan iduwei.”

9 Yesus ipe ile ta su lakopwi yi ihpa, “Oduu ti tuno’ oduu lakopwi odo pondrih sal odo atawe Lo ta Lapan kile mahun, pe atkakik puko‑on kile lo ndre sa ndramat hahnan. 10 Lo ta Lapan ndre Moses iduwei ti ipe ihpa, ‘Oso pahndran tamam horu tinem, pe opo huyen kile ta horu.’ Lo erti ipe yi ihpa, ‘Si kom kipu nolou mo‑on kile pule‑en taman horu tinen ti we hapwi iy kimet.’ 11 Odoke oduu etawe lo handrai ihpa, ‘Uh homou lau kipahran pohon kile moleu ipe iy we kihngahang Lapan kile sane, eri iy lau erti we kindrahngahang taman horu tinen kile hangka‑an pwi.’ 12 Lo taduu kuti ihnan, ile pe iy lau kuti we kindranon kindrehnuwii taman horu tinen pwi. 13 Iy lo ndre oduu edempo kuti inahnan lo ndre ndramat ihnan ti illa puko‑on, pe Lo ndre Lapan iduwei ti illa hangka‑an ke porah. Pe oduu edemposisihen sane sulo‑on yi ihpa ke kutih.”

14 Yesus iyuwen sa lau hala hun Iy yi, pe ipe ile ta su ihpa, “Oduu ndre sulo‑on atawe ndralnga’ oduu kise, pe atahrung kehii. Atawonon nolou ndre Yu ka we kupwe kutih. 15 Sane odo kiu ndre ndramat intakuni hala lom mundren ti handranon hahnan iy kile mo‑on odo madan Lapan pwi. Tapake sane ndre honu‑us lom mundren ndramat hassa moleu ti hanahnan iy illa mo‑on odo madan Lapan. 16 Ou si ndre ndralngam, eri ehrungi nolou kuti kehii.”

17 Yesus isohou ta sa lau oh, inum pe Iy iyeu ile lonu‑um. Pe su disaipel hehndremte Iy, “Mining odo nolou Ou ampa mahkele ti ihpa kehe?”

18 Yesus ipe ihpa, “Oduu ti tawene ta oduu murun. Oduu tuno’ oduu pwi, erih? Homosa ndre ki‑us kiu pe kile lon ndrinen ndramat, eri kindranon kihnan ndramat kinna mo‑on odo madan Lapan pwi, 19 odosa hangka‑an erti inna lon ndrinen ndramat ndre ndrokene pwi. Hangka‑an erti ile ke salan song, inum pe ile salan ndre, inum pe iyeu ise yi ndre moleu.” Yesus ipahran nolou kuti, odosa iy ipe song ndre sulo‑on ti huyen kopwi odo yo‑on.

20-23 Pe Yesus ipe lakopwi yi ihpa, “Sane ndre honu‑us lon ndrinen ndramat hassa kiu ti hanahnan ndramat illa mo‑on odo madan Lapan. Lon ndrinen ndramat ti intawe tawene mo‑osa pe pahna. Lon ndrinei ti intawe tawene odo up ndramat kimet, ndramat impo kowos ile tam pedih pe kamal mbrulndrat, pe ndre‑em putmo‑oi. Lon ndrinei ti intawe taheweh, ndringis sane ta lau homou yi, mah‑ah pwi odo punou mo‑on, ndramat hassap sa, taninen ndramat homou yi pe sane sulo‑on mo‑osa yi. Iy sane kuti honu‑us lon ndrinen ndramat pe henahnan ndramat illa mo‑on odo madan Lapan.”

24 Inum pe Yesus pe su disaipel Tadan ha‑au odo Galili, pe hala lok sehir ise tolau ea. Su helihir koson siti odo Tair. Tair ti ise koson ndras mandra‑an Mediterenia. Yesus ipe sa lau hohtuno sa pe heltuwe Iy kolwii. Iy ile lon um sim, odoke Iy itong ta sa lau tahit. 25 Pedih homou ihtunon ihpa ndre Yesus ti insa. Iy nedun pihin ti sinel imin pule‑en pe inahnan iy ile sik. Iy iporitai kopwi ile hu Yesus pe pandrulku‑un ile poi idu kendrun ndriken. 26 Pedih kuti iy odo Yuda pwi. Iy ti odo Fonisia, ise lok mandra‑an Siria.† Siria. Lok mandra‑an ise ngerin Ndras Mediterenia pe provins sih ta Rom. Idu mahkele ti sa kah hoyuw lok erti ile Lebenon. Kantri Siria odo mahkele ti ndre lok hene yi. Iy idu purmadan Yesus pe ihndremte puko‑on ipe Yesus ki‑es sinel odo mundren nedun pihin. 27 Odoke Yesus ipe ihpa, “Tidu titawe song ana’ su nonkom ti kile ta mweh kolwii. Su nonkom ti hoyo‑on oh uu ndre kenon su.”

28 Odoke pedih kuti ipe ihpa, “Ou ampa ti imel, lau il, odoke mweh ndre iso pahndran tepol ti ina‑an tikin lehe’ su nonkom yi.”

29 Yesus ipe ile tadan ihpa, “Ou apa ihpa kirtih? Eri ka emin eleng pe ala yi ndre ndrongon nedum. Sinel indra‑au odo pule‑en.”

30 Pedih ti ile yi ndre omwen pe iltuwe nedun pihin ti inemetir iyin lok. Sinel indra‑au odo pule‑en ndre ndrokene.

31 Yesus ipe kise yi ndre Galili, ile pe Iy itlang odo mukehe Tair pe ile tolau ea, pe ihir Saidon. Inum pe Iy isondrih ndrokoron lok uu pe ilihir Dekapolis.‡ Dekapolis. Lok sehir taon ndre sungoh hoso eriy, ile woron kup rai odo Ndras Galili. 32 Pe sa lau hekuni orngon homou ile hu Yesus. Orngon kuti isentahrung lok pwi pe inolou idu ke lon kolon. Sa lau hosohou karundrum ile ta Yesus, hapa Yesus kiduwe lumwen kile pule‑en. 33 Ile pe Yesus ikuni orngon kuti ile mahun odo ta sa lau ndre sulo‑on. Iy iduwe kopwen lumwen hala lon ndralngan orngon kutih. Inum pe Yesus imburnguh ile kopwen lumwen oh pe iduwe ile kalilmen orngon kutih. 34 Pe iy indre‑et ile eleng ile heven, ihti ngohon puko‑on, pe ipe ile tan orngon kuti ihpa, “Efata!” (Iy erti ihpa, “Erwei!”) 35 Eri pe orngon ti ihrung lok lakopwi. Hangka‑an ndre inehndrepti kalilmen ti iyeu, pe iy isohou ile huyen.

36 Pe Yesus isinip ana’ sa lau we hendreninen pwi. Iy isinip ana’ su odoke su heninen lakopwi. 37 Sa lau ndre sulo‑on hehretek pe hemesi‑iy. Sa hapa ihpa, “Orkom, Iy impo sane ndre sulo‑on ti huyen kopwi. Sa lau ndre poho’ sa pwi ti Iy inahnan sa henosohou yi, pe sa ndre ndralnga’ sa pwi ti hentahrung yi.”