1-5 Arrcharr ugng artinamiy awand, priests amay edn, scribes edn, abm ukirrngg edn, abm adnjirradnjiy edn ogngonalgngel edn, errgenn amban errbennag. Atarr edn ingun, Jesus odnjemb atarr edn ingun, ilimb err algngarr edn ingun. Ilimb uyamag ikirr edn ingun Pilate-ag. Pilate errgel il ingun Jesus: “Abm inang onggom abm atat Jews ingang ey?” Ilimb Jesus il errgel, “Iyang ay.” Priest atat edn uw anggunyan elgorag edndan amban errbenn edn ingun Jesus. Pilate uw errgel ingun Jesus, “Abm anengand inang uw anganj errg inang? Abm onggod edn inun uw elgorag edndan amban edn inun.” Ilimb uw anganj uw errgel il Jesus.

6-15  Pilate il orol alnggeb alnggel il.

Ilimb abm elgor adel edn ingun Pilate-an, ilimb ampayirr edn ingun, “Abm odnjemb atanam itom, olon ugnggil anndangan inang!” Pilate il abm ononggab eranm il ingun abmag egng erronggom anen ijanm edn errayennd. Abm elgor edn odnjemb arrfinam, abm elelmb arrarrinam. Abm ononggab ukal Barabbas abm arrkenniy odundorag arrirr il. Pilate il ampayirr il ednangan, “Abm ilimb ann uwag ay urrangan? Abm ol ilimb king amay onggom elag ay urrangan, ey?”

Pilate il an uw il aliyan ednangan, abm priests edn ingun Jesus-an el aguriy ambenn. Uyamag uwal edn ingun Pilate-an.

Priest amayerr edn ajajiyanm edn ednangan abm elgor, ilimb abm elgoriy alkarr edn, “onongg itom olon eral inang anndangan, abm ukal Barabbas.”

Pilate il errgel ednangan, “Abm ilimb onggom arrin ambag ay ingun? Abm ukal angg Jesus elben urr ingun?”

Ilimb abm elgor alkarr edn, “Karrey arril ingun! Uk adoriy ak ulfin il adniy!” Pilate il errgel ednangan, “Ilimb errk anen ukirr il?” Ilimb edn onderr iyaranggal alkanm: “Karrey arril ingun! Uk adoriy ak ulfin il adniy!”

16-20 Ilimb abm arrchunnd arnyarnj arrnyinm edn ingun Jesus. Ilimb edn arrchunnd algnganm ingun Jesus, kungar amayag urunnd, kungar Pilate-ang undamag. Ilimb abm arrchun onderr olon udndarr edn. Kawun olbon antarr edn ingun, ar uk ebal amay iyarr edn ingun, uk arrb ilg aykenn ambanam. Ilimb adnim egamennd ugnggirr edn ingun. Ilimb ewerrnyel ambanm edn ingun, “Abm atat inang, King of Jews inang, ey?” Uk olbmbomennd arrinm edn ingun, errayennd ewednjemennd idunm edn ingun, erray edn ingun ognggegamennd errmbenn, orrmodnnd angal ambanm ewerrnyel ambanm edn ingun. Ilimb itodam arrmel edn, kawun erarr ingun undam. Ilimb kawun ognggam itom amb elkan ambarr edn ingin, ilimb adnimag artin ambarr edn ingun, algngarr edn ingun itodam, urunnd uk adoriy errnenn ambanag edn ingun.

21  Simon il abm errk Cyrene-am igunm, errk odndonggam ugngal uw adel il, ilimb errjarr edn ingun. Abm il idnnan udarrw uw iguyenn. (Abm il andangarr ujir ilg ukal ulang Alexander, Rufus.) Abm arrchunnd ajajiyanm edn ingun uk ador ingin algnganag.

22-24 Ilimb Itodam, arrchunnd algngarr edn ingun awar, errk ukal Golgotha, errk abm odnndor elgayerr. Ilimb egng orch ilbmb uwayenn edn ingun myrrh errbaniy, ilimb il anganj errgel. Ilimb uk adoriy urdndan ambarr edn ingun. Agarr ingin uwann uwann errbel edn, ukelof ilg iyalmenn edn, agarr ingun undamag erray err algnganag edn.

25-27 Ugng etetal ambenniyerr, arrirr edn ingun, uk adoriy arrodarr edn ingun. Ilimb edn ukal iyarr edn adniyerr, “Abm onggom il abm atat Jews-ing.” Abm algam ujir arrirr edn ingunjerr. Ilimb anolongiy errnenn ambarr edn ulangan, ador ilg. Onongg ekomiy, onongg alagiy errnenn ambarr edn ulangan.

29-32 Abm erray awinnd orrog igunm ew egnggilgerr ambanm edn ingun, errgenn edn ingun, “Abm errgenn inang anndangan, kungar amay errmbenn ambanag, ilimb errnenn ambangan inang elwan errabiy, abm ugngal karrey adoram alnggal inang adnim.”

Priest amayerr scribes errbaniy edn idndamag ewerrnyel ambanm edn ingun Jesus. Galanggannd errgenn amban errbenn edn, “Abm innday erray iyarrwiyanm il, ey? Ugngal abmban il ar iyarrwiyan errb? King of Israel uk adoram arag alnggan il adnim, ilimb ambul ingun ewannag awiy, ilimb ambul ingun aliyiyanag ayarral amb errgenn il, abm il abm amay.” Abm ujir itom awiy ul ednangan idndamag anen arrirr, orrnjenm ul ingun abm alkalg.

33-39 Ilimb errk ulbun alnggarr ednangan, ugng adnigam, ugngubag. Ilimb il Jesus uw amanndarr errgel il, “Eloi Eloi lama sabachthani?” Errgenn il, “Ijang Ijang, abm anegal ugnggirr inang adun?” Abm errayennd errnerrnennamiy aliyarr edn ingun, errgennam. Ilimb errgel edn, “Aliyal ambul ingun! Elijah-an alkan il ingun.” Ilimb ononggab idnjirr il, egng og elbmbelbmben afarr il. Elkenn ambarr il olon ar uk aynyaynyerr. Ilimb uk utarnj uwal il ingun adniy. “Ech ar andandar! Elijah onggolenn adengan il, abm alnggan ambanag ingun adnim.”

Ilimb itodam Jesus amanndar alkarr il, orol engkar amay ikirr il, ilimb ulfirr il. Ilimb ibangarr alkarnj il uk curtain egidurr, kungar temple-iy umag. Egalkal egidurr il urunnd.

Abm arrchun boss il el adniy errnenn ingun abm alkalg, ilimb ewal il ingun, orol engkar enolg ikirr il, ulfinam. Ilimb errgel il, “Ayaral amb, idnnan idnnan il, abm onggom arrngg ibangarr alkalng amayang.”

40-41 Abm onporramp ogngg anen igunm edn ingunjurr, errk Galilee itod, egng awiy arrchenm edn ingun, itod uw errnenn edn il adniy ikinm edn ingun, ewann edn. Mary Magdalene, Mary (amangarr abm elngkelnggang ukal James, Joseph ulang) Salome, abm onporramp erray errbaniy igurr edn olon ingunjerr Jerusalem-ag, ilimb ewal edn ingun ulfinam.

42-47 Ilimb il abm alkal arrcharr ambel, “Errk preparation”, ilimb itodam sabbath atuwirr edn. Ilimb Joseph abm Arimathea-m igurr il Pilate-an ampeylnag ingun. Abm il ugnggannudnyay ilimb il angirranginiy igurr il. Abm il abm eg udnam, abm adnjiy councillor il, ibangarr alkalg idann il ingun errk udnam ambanag ingin. Errgel il ingun Pilate-an, “Inang abm umalangg ayin uwag inang adun itom, Jesus?” Ilimb il Pilate orol alnggebalnggel abm alkal il ugngal ulfirr. Ilimb il ingun abm arrchun amay udndarr, ampayirr il ingun, “Abm ayin ulfirr il?”

“Iyang. Ulfirr.”

Ilimb Pilate il abm umalangg uwal il ingun, Joseph-an. Joseph kalak arrfar algnganm il, ilimb il uk adoram alnggan ambarr il ingun adnim. Ilimb uwurrag ambarr edn ingun. Ugunbly errkew amay adndand errmber errk ew anggayerr ugnggirr edn ingun. Ilimb edn adndand amay ugnggirr edn errk ewamennd. Mary Magdalene, onongg il Mary (amangarr Joseph-ang) ewann ul ednangun abm ingun abm alkal ugngginam.