77
Nange Dara Tafuse, Dubo Jama Tambari Da Benunuri.
1-2 Na God kena sorara eraena. Ningare dae sedo, sorara use irá gheraena.
Na dara tamburaena da sifo aminda na Bajari kena benunu seraena,
tumba ghousa ava nanda ungo jigheono ikáda erorureari benunu seraena, avata dubo jama jo tambae eraena.
3 Na God koteraena, avata kote jo tambae use jaredo, ghosio seraena.
Nu nanangedo tambaetena ava kote simbuguse irá gheraena, avata na dubo buneraena.
4 Arie Bajari, nine tumba ghousa ava na jo doyaso fase avi jebugae eraena aindae,
na ghamo vevera tafuse, geka sari buneraena.
5 Na reju ava anakora namokena siroredo ghusira ava koteraena,
a kotugo ghaeko ana ainda irari ava erekotena.
6 Na tumbaghae kotari tomanakogo beká ava kotise irá ghraena.
Kote simbugari dae use, nasuka namokena eminge ategi eraena,
7 “Bajari namonde sifo ghousa gukai mutarira ai? Nu jo sekago namondekena ivuga ae arira, tano?
8 Namonde dubo buraira amo, dotira, aĩ? Nunda beka gajari namondekena usira amo, oroko fugetira, aĩ?
9 Avose, God namondedae joka ari dae sisira ava, kotae usira, tanojo?
Avose, namondedae joka edo ghusira ava, nunda janje ekoimi etiri dadabusira, tanojo?”
10 Aminge kotise, na eminge siseni, na roera reimi iri, dubo mema tomanakogo eretafena amo,
God namondekena rea edo ghusira ava oroko jo ae eraira.
11 Bajari, na nine roera babaigo edo ghusesa ava kote tambarena.
Tano dombu eni dombu eni anakora eteso dudukuhusera, ava kotedo gharena.
12 Ni roera rea usesa isambu kotarena. Nine tano dombu eni dombu eni eteso dudukuhusera, ava kotedo gharena.
13 Arie God, roera isambu nine eraesa amo kakaragori, God babaigo a nimongo eni tefori.
14 God, nine tano mendeni mendeni easo siroreraira.
Ninda fakina ava oro mendeni mendenikena ijugeteso isagha usira.
15 Ninda fakinaimi ninda natofo Jacob nengae Joseph ghaeda imemisiri ava sonembeteso jebuguseri.
16 Arie God, evetu genembo oju use ungo ata dadadagheraera aminga ava, uvu ninda dombuda fetirise,
oju edo tiro taraghuseri. Karaje kafuru ghighi ábarago nindae oju use aminguseri.
17 Foroga borija dise, utu gambari utu gambari biria tarighuse, barara fugutusira.
18 Ninda barara gururu gararaghuse kerere karara ghiri a kotugo biria tarighuse
usasa tomanako use, jaraghetiri enda isagha usira.
Amingiri, dumo firi, enda barago daradaraghusira.
19 Ni eva anjeraira ainda jokada tere deinghedo isesi.
A kotugo karaje ghighi aminda sive sembesa sovenikena buvurutusesi. Avata ninda ata kotu mave jo gaeri.
20 Ni sifi kaifa kato aminga ava use, ninda evetu genembo unumbedo isesi,
Moses nengae Aron ghae giti bero nemonde isevu.