1 Dimba lusambulu luama, a Nzambi ;

ayi kadi zimbakana mambu mama.

2 Wunguila ayi wuphani mvutu ;

mayindu mama malembo mbonisa phasi ayi ndilembo sambi ;

3 mu diambu di mbembo yi mbeni ;

mu diambu di yamusu ku mutu wumbimbi

bila minu beti yekikilanga ziphasi

bila balembo mfingi mu nganzi awu.

4 Ntimꞌama widi mu maniongo mu minu ;

ayi boma bu lufua lu mbuididi.

5 Tsisi ayi lukhuku bieka mu minu

ayi boma bu ngolo bumbuididi.

6 Buna ndituba : “Enati ndiba ayi mavavi ma dibembi

nganu ndieka tumbu dumuka

ayi ba mu luvundulu.

7 Nganu, ndiela tinina ku thama,

ayi vuanda ku dikanga.

8 Ndiela tina nsualu mu tomba suamunu

ku buangu kikambulu phemo yingolo

ayi vuka kingolo.”

9 Kotisa batu bambimbi mu divuda, A Yawe

ayi vunzikisa mambu mawu bantuba.

Bila ndilembo moni makhemi

ayi ziphaka mu divula.

10 Muini ayi builu,

makhemi ayi ziphaka bizungidila bibaka bi divula ;

diela dimbimbi ayi kambu dukisa zitsila bieka mu khati divula.

11 Mbivusu kiawu kisalu kieka mu khati divula ;

khuamusu ayi luvunu bikadi botuka mu zinzila zi divula.

12 Enati mbeni wumfingidi

nganu ndikimba moyo ;

enati mutu wukundendanga niandi weti

kukiniemisa va ntualꞌama

nganu ndisuama kuama va ntualꞌama.

13 Vayi ngeyo, mutu banga minu

wundiatanga yama va kimosi ;

nkundi ama wu kuikama ;

14 mutu wowo wubedi kalanga yama mu khini ;

wubedi kibanga va kimosi

ayi nkangu wu batu ku Nzo Nzambi !

15 Bika lufua lu bibuila bambeni ziama mu kinzimbukila

ayi bika bakuluka bamoyo ku tsi bafua !

Bila mambimbi mabakudi buangu va khatitsikꞌawa,

16 Mbadi minu, ndintela Nzambi,

ayi Yave wuphukisidi.

17 Yiba nsuka, midi ayi masika,

Ndieti yamikina mu ziphasi ;

ayi weti wa mbembo ama.

18 Wukukhulanga wumbimba, mu kambu sumbula

mu mvita yi banduanisa

ka diambu ko bawombo banduanisa.

19 Nzambi wunyadila va kundu kiandi ki luyalu mu zithangu zioso

wela kuba wa ayi wela kuba monisa phasi ;

batu bobo balendi balula zinzila ziawu ko

ayi bakinzikanga Nzambi ko.

20 Mutu wundiatanga yama wulembo

nuanisa bakundi bandi

wubundula Nguizani andi.

21 Mambu mandi ndelo madi

banga dibela* 55.21 Dibela : didi mafuta beti vindanga mu mapha.

muaki mvita yidi mu ntimꞌandi ;

Mambu mandi madi malebila viokila mafuta

muaki madi banga bisabala bikubimini mu vonda.

22 Yekula bizitu biaku kuidi Yave,

niandi wela kukindisa ; kalendi tala ko

ti mutu wusonga kabua.

23 Vayi ngeyo Nzambi, wela buisa batu bambimbi ;

mintengudi mi menga ayi bankua livunu

bela dukisa ko ndambu yi bilumbu biawu ;

vayi minu diana diama didi mu ngeyo.