1 Zonzisa, a Yave, bobo balembo nzonzisa.

Nuanisa bobo balembo nduanisa,

2 simba nkaku wu fioti ayi wunneni

telama ayi yiza wutsadisa.

3 Bonga dionga difioti ayi dinneni ayi kaka nzila yi bobo balembo ndandakana

kamba muelꞌama :

“Minu ndidi phulusu aku.”

4 Bika batu babo bantombanga luzingu luama

baba dio kombolo ayi bafua tsoni.

Bika bobo bantombanga mabienga mama

bavutuka ku mbusa ayi baba mu divuda ;

5 bika baba banga mavevolo mamvevomono kuidi phemo

va kimosi ayi mbasi yi Yave yi bakuka.

6 Bika nsolo awu wuba tombi ayi ndelo.

Va kimosi ayi mbasi Yave yi balandakana.

7 Bila bathambididi dikondi diawu mu kambu bila ;

mu kambu kadi bila bakabidi dibulu dinneni

mu diambu diama.

8 Bika mbivusulu yi babuila mu kinzimbukila

ayi bika dikondi diodi batamba bawu veka dibabuila ;

bika babua mu dibulu, mu diambu di mbivusulu awu.

9 Buna muelꞌama wela mona khini mu Yave

ayi wela yangalala mu phulusu andi.

10 Buna nitu ama yimvimba yela yamikina :

“nani widi banga ngeyo Yave ?

Ngeyo weti kula nsukami mu mioko mi mutu wunlutidi zingolo ;

nsukami ayi nkua mabienga mu mioko mi mutu wowo wulembo bayibi.”

11 Bambangi bakondolo kiadi zilembo telama ;

zilembo ndiuvula buivu mu mambu ma khambulu kuama zaba.

12 Bamvutudidi mambimbi mu mamboti.

Bayekudi muelꞌama wawu veka.

13 Vayi bu baba mu kimbevo ; minu ndivuata tsaku* 35.13 Vuata tsaku voti vuata kaniki..

Ndikikulula mu kukifuisa nzala mu diambu di lusambulu

Thangu zitsambulu ziama zivutuka kuidi minu mu kambu mvutu.

14 Ndibedi diatanga ku tsi kiadi

banga mu diambu di nkundi ama voti khomba ama.

Ndibedi komvikanga ntu ku tsi mu diambu di kiadi

banga minu ndindila ngudi ama.

15 Minu bu ndibumina thutu,

bakutakana va kimosi mu khini.

Batu bakutakana mu diambu di kunduanisa

minu mu kambu zaba diambu.

Bawu bamfinga mu kambu vonga.

16 Banga batu bobo bankinzikanga ko mambu ma Nzambi,

balembo tsekinina mu bu mbimbi

balembo khuetila meso.

17 A Yave, nate thangu mbi wela kumatadidilanga e ?

Kula luzingu luama mu mbivusu awu ;

kula luzingu luama luthalu mu zikhosi zioso.

18 Ndiela kuvutudila matondo mu lukutukunu lunneni ;

va khatitsika batu bawombo ndiela kuzitisa.

19 Kadi tala ti bamona khini mu diambu diama,

bobo badi bambeni ziama mu kambu bila ;

Kadi tala ti bobo bakundenganga mu kambu bila,

bandiengudila meso mu bumbimbi.

20 Bayolukilanga ndembama ko ;

vayi banyindulanga mambu ma luvunu

mu diambu di vunina bobo banzingilanga mu ndembama mu tsi.

21 Balembo nzibudila miunu

ayi balembo tubi :

“A, a… mu meso meto veka tumueni mawu.”

22 A Yave, ngeyo wumona mambu momo

bika ba dio sui,

kadi kuthatukila, a Yave,

23 kotuka ayi telama mu

zonzika, Nzambi ama ayi Yave ama.

24 Wundungisa boso buididi busonga buaku,

a Yave, Nzambi ama ;

ayi kadi tala ti bamona khini mu diambu diama.

25 Kadi kuba bika bayindula :

“A, a … buawu bobo tutididi.”

Voti babika tuba : “beto tumminini.”

26 Bika babo bammonanga khini mu ziphasi ziama,

bafua tsoni ayi baba dio kombolo

Bika bobo balembo kukiniemisanga bawu veka mu diambu diama

bafua tsoni ayi baba dio kombolo.

27 Bika bobo bamonanga khini mu ndungunu ama

bamonanga khini ayi bayangadala

bika batuba mu zithangu zioso :

“Bika Yave kayayusu, niandi wummonanga khini

mu mamboti ma kisadi kiandi.”

28 Buna ludimi luama luela yolukila busonga buaku ;

ayi minzitusu miaku mu lumbu kimvimba.