18
Kote Babel lernala hunukum
1 Horu ne ya'u po'on hohopon a'am raram namehin ida kopur nano a'am raram. An mai ne, nodi molollo man rehrehi lewlewen la Nin siksik lerlere na'aropedi noho wawan. 2 An wakau naruri na'ahenia,
“Babel nadiporedi me'e! Kote lape onne nadiporedi me'e! Ri mahaku kan min lolo onne me'e, la lere eni nediyomon ahuwain noro hayakyak-hayakyak man ailanna mamani suwsuwar lolo onne. Manu liwliwar man hi'i mahalarlarna ri suwsuwar lolo onne haenhi. 3 Kote Babel onne nadiporedi ono nin ri ken patal ri nano hair-hair na'akeme holi yak leke yak la hoikani aukerhe, naise maekyak ma nala nonomun mo'oni leke romun manha de hailai noro ai. Rai-rai lolo noho wawan lernohi rir hini'i wenewhe haenhi, la ri na'akeme ma na'iwali noro ma na'olu hahaa lolo noho wawan na'akeme karu ono ri man minle Babel raram nodi weli hahaa man wella ai wawan mamani.”
4 Onne horu ya'u derne Lir namehin ida nano a'am raram na'aheni,
“Eih, mi man lernohi Ya'u! Mamharedi kota onne here,
kalo'o lernohi ne'en raramne rira dohohala,
la lernala hunukum man werek ma nano'onyak hi,
5 ono hirira dohohala nammori rehi rahupu kulunne rakanedi a'am raram me'e.
Enla Makromod Lalap horhorok rir yakyak salsala onne na'akeme,
de na'akene nala hunukum hi me'e.
6 Ende na'amoli An herre walhedi kota onne namnenehe kota onne hi'i wewhedi ri namehin me'e.
Na'amoli An herre walha kota onne nin hini'i man ailanna onne rewro'o,
la na'akenedi nonomun man meru nala kota onne ma naruri rewro'o narehi ai nala ri namehin.
7 Babel ne'en raram onnenihe mori naise maeke ma na'akeki kemen herlei wake'e,
la hi'i wewhe inhawa-inhawa man ai raram nodi aimehi.
Enpenia hi'iyedi apinha la sus hi me'e,
ono hir holi kukulu lalap ra'aheni, ‘Ai modi molollo naise rai maeke,
ai ka mamwalum, la kam lernala sus mak oire.’
8 Ende lolo lerida raram mehe kota Babel ne'en raram onne lernala apinpinha wo'operperi.
Ende Makromod Lalap nala kini'ir, sus mak oire, noro roulare hi,
noro idewe aiye ma na'an kota onne,
ono Ai man ho'ok kail hi nodi molollo ma narehi ma nalewen.”
9 Rai lolo noho wawan na'akeme man lernohiyedi kota Babel, de holi diwar dawar la lernohi rir suk aimehi, rakan lere onne hi rahere la akin woir ono hir po'on aimahu nano aiye ma na'an kota onne. 10 Hi ramka'uk hunukum onne, de ramririyedi ko'ko'u, rahere ra'aheni,
“Idei! Kote Babel man lapa onne! Mayo'o wake'e! Lolo jam ida mehe an lernaledi hunukum!”
11 Ri ma na'olu hahaa na'akeme sus mak oir rehi la ra'adididi, ono hir po'on kota lapa Babel onne nadiporedi. Hir sus ono kota ne'en raramne kar weli rira hahaa warna-warna me'e, naise: 12 mahe, pere, waku man wella ai wawan, mutiyare, nainair man ma'aruru rodi tapi man wella ai wawan hihi'ie, tapi memere, noro tapi au'au. Hirira hahaa rodi au wala'ula'u hihi'ie, hahaa rodi leli ihi hihi'ie, au man wella ai wawan, pesi, pirmere, noro waku marmer. 13 Au ulik ma namina noro rampa-rampa namehin aile, ha man wola'ula'u, naise kemenyan noro mur. Rir anggur noro wuru, gandum noro oke aile. Hirira sapi noro pipdume, kude noro kerete, la hi ra'olu ri ma namwali hophopon, (namlolo, hi ra'olu rimorimori haenhi). 14 Ma na'olu hahaa enihe, hi akin woiredi ono Babel nadiporedi me'e de rahere ra'aheni,
“Hahaa man ma'aruru mi raram nodi onne na'akeme, kame'el.
Hahaa ma namwali minim linikir kanaru
noro hahaa rodi ra'akeki mi kemenhe molu mouwedi me'e.”
15 Ri ma na'oluwedi hahaa namansa lolo kota onne de karuwedi me'ene, ramriri ko'u ono ramka'uk aiye na'an hi haenhi. Hi rahere la sus mak oir mamani, 16 la ra'aheni,
“Idei! Idei! Kote lap eni nadiporedi me'eee!
Nonolu ai onne naise rai maeke man nair nainair man ma'aruru rodi tapi man wella ai wawan hihi'ie,
la nair nainair rodi tapi memere, tapi au'au hihi'ie,
la nodi mahe noro pere, waku man wella ai wawan, noro mutiyara ra'akeki kemen,
17 maa jam ida mehe nina linikir kanaru na'akeme onne, molu mouwedi!”
Ri ma nanoin kelen aran noro rira hehewek nanair lolo lour nine, ma namwali uluwakun kapal, man howok kapal, me man ha'anohi kapal, na'akeme ramriri ko'u. 18 Hir po'on aiye ma na'an kota onneni mahun ne, wakau ra'aheni, “Eih! Lolo noho wawan kota rahu ka naise kota lape onneni!” 19 Hir wahair apu uluwakun, sus mak oir mamani, la ra'adidi ra'aheni, “Idei! Idei! Kote lalapa onne mayo'o'edi me'eee! Nonolu man manarna kapal na'akeme karu horu nano ihin ennen rahue! Maa jamida mehe ha rahu na'akeme moluloinedi!”
20 Ya'u derne Lir nano a'am raram wali'ur na'aheni,
“Manin a'am raram na'ahoru, mi akim nahuwa'anedi here,
ono Makromod Lalap na'apo'oredi kota Babel me'e.
Ende mi ma namwali Nin ri, roro hophopon ma nodi Lir Wawa'an eni, roro idewe nabi-nabi man loikaru Makromod Lalap Lirna Wawan enihe, mi akim nahuwa'anedi here,
ono Makromod Lalap naledi hunukum kota Babel herre walhedi rira hini'i wenewhe man yak ki mi me'e.”
21 Onne horu, hophopon a'am raram man lewlewen ida kikan waku lapida wakal laa kahi raram na'aheni,
“Kote lap Babel onne,
Makromod Lalap nodi rurilai na'akeperedi
naise waku onne wakaledi laa kahi raram de kak do'on me'e.
22 Ri ma nauroin na'aromo kecapi, ma nahinara, ma nou poloit, la ma nou kowuri
kaale lolo kota onne me'e.
Ri ma nauroin howok lewlewen ida naise nayapi nakar kaale lolo onne,
la maeke ma nodi waku kuku kele'uk kame'el.
23 Ri kan lokon wadu mori lolo kota Babel me'e.
Ri kan hi'i yapi hohoo me'e.
Makromod Lalap hukum kota Babel naise onneni
ono nin ri ma na'olu hahaa enihe hi naran pe'eredi lolo noho wawan.
Hi rodi rir woroin hi'i u'ur leher kokwudi ri mormori na'akeme lolo noho wawan.
24 Babel nin ri penia resnedi Makromod Lalap Nin ri roro man loikaru Makromod Lirna Wawan enihe.
Namlolo! Hi mehe resnedi ri na'akeme lolo noho wawan man resnedi nonolu eni.”