36
1-2 Mwa, kumanum wala e kunakaigalaigu
avaka lalilivali, baisa Yaubada la biga.
3 Ka, yeigu ulo nikoli saina beiyaya.
E balivali avaka lanikoli,
kidamwa bayomitali agu Tobubuli Yaubada la karaiwaga duwosisia goli.
4 Ulo bigatona komwaidona lalivali gala kwaitala sopa.
Ka, omatam taitala isisu deli kubigatonasi
matauna tokabitam mokwita, mayeigula goli.
5 Mokwita Yaubada saina topeula.
Matauna gala bikagagi availa,
deli vavagi komwaidona ikateta wala.
6 Matauna gala itagwala tomitugaga bisisuaisi tommomova tuta kaduwonaku,
matauna tuta komwaidona deli la karaiwaga duwosisia iiyamati tonamakava.
7 Matauna ikoli tomitukwaibwaila.
Matauna itugwali bikaraiwagasi makawala gweguya,
e ivigaki tomota bikamiabaisi matausina gweguya tuta gala biwokuva.
8 E mitaga kidamwa tilaula biyuwolaisi matausina metoya yuwoyoula
eibubulokaisi tanumnumta e bilumkolaisi mmayuyu
paila avaka bogwa leivagaisi,
9 Yaubada iyomitali baisa matausina si mitugaga
deli ammakawala ninasi kala kaiveka.
10 Matauna idiku taigasi paila binakaigalaisi la katuloluta
e bisivilasi metoya osi mitugaga.
11 E kidamwa bikabikuwolaisi Yaubada,
e biwotitalaisi matauna,
matausina biluva uwosi deli si mwasawa.
12 Mitaga kidamwa gala, e si kaliga kabotakainowa wala,
matausina bisilavaisi si valu tommomova
e bisaitaulasi wala wa Tuma.
13 Availa availa matausina gala inikolaisi Yaubada
tuta komwaidona bigibuluwasi wala,
e deli goli tutala bibodasi kasi mipuki,
matausina gala wala ininigadasi baisa Yaubada paila pilasi.
14 Matausina igau wala totubovau ikaligasi,
e si kaliga uulela si momova saina kabommosila.
15 Mitaga Yaubada iyokili tomota mitasi metoya osi kabommayuyu,
e iuvigaki kabomwau bimitalala mitasi.
16 Yaubada eivisunupuloiyaim metoya okabomwau,
e ivigakaim iluva wowom;
deli m kubudoga ivakasau kaula.
17 Mitaga baisa tuta lokuboda kam mipuki
avaka bibudoki bukulumkoli.
18 Kuyamata gala availa bisoma lopom metoya avai guguwa mwada biwabwaim,
kaina bikau nanom metoya bidubadu veiguwa e bitavili nanom.
19 Paila makwaisina gala wala kwaitala pilasi
bisakaimsi avai tuta bukudou paila pilasi;
baisa tuta bukuyomadi m peula komwaidona
mitaga gala bukubani pilasi.
20 Gala bukupikwaku paila mwada nani bibogi
paila baisa tutala boda komwaidona bitamwausi.
21 Kuyamata gala bikau nanom mitugaga;
paila kam mmayuyu lokulumkoli leimakaiam
paila uula baisa bisilibodaim metoya mitugaga.
22 Kululuwai ammakawala Yaubada la peula saina vakaigaga;
matauna tovituloki kasi todabala.
23 Gala availa ibodi biluki Yaubada avaka bivagi;
kaina bitabinaki matauna bimitugaga.
24 Tomota tuta komwaidona iyakawolaisi matauna metoya avaka avaka iuvagaisi;
mapaila yoku ibodaim bukuyakawoli matauna.
25 Tomota komwaidona bogwa eigisaki mitasi
metoya avaka bogwa leivagi;
mitaga gala wala availa itapuloki nanola
metoya vavagi makwaisina.
26 Gala ibodi bitanikolaisi mokwita ammakawala la karaiwaga kala peula,
kaina bitakalau kwaivila kala taitu.
27 Yaubada titoulela ikau sopila watanawa
e ikivila ivigaki kuna.
28 Matauna ikibolu kuna metoya olowalowa,
paila kasi kuna mina watanawa komwaidona.
29 Gala availa inikoli ammakawala lowalowa si kaisakaula,
kaina ammakawala pilapala la katubabila wa labuma,
baisa goli Yaubada la valu.
30 Matauna ivigaki kavikavila bivisigili labuma komwaidona,
mitaga bolita tukutakula dudubila wala isisu.
31 Baisa makawala eivigaki paila eikamovi la tomota;
e isisaiki kʹasi saina migamaga.
32 Matauna ikikuloti kavikavila oyamala,
e oluvi ikaraiwogi bikavila paila kabotuvitusila makwaina.
33 Pilapala biwai baisa kabotuvitusila yagila bikoulusa
e makawala goli bulumakau bogwa wala binikolibogwi makateki bikoulusa.