27
1-2 Akatotila oyagala Yaubada matauna goli Topeuligaga deli Tosivagasi.
Matauna eipakaigu e gala wala baboda agu yakala,
deli ivigaki ulo momova saina mmayuyugaga.
3 Ogodigu leima baisa tuta Yaubada leisakaigu ulo momova,
4 gala avai tuta balivali bigatala bigigaga,
deli mayegu gala avai tuta bisopa.
5 Gala avai tuta bakamitulaimi yokomi tokamokwita.
Yeigu bakamitulaigu tobwaila wala tatoula kaligagu bakaliga.
6 Gala avai tuta bakapatu,
balilivali wala ulo mitukwaibwaila,
paila nanogu mimilakatila wala.
7 Ibodi availa availa matausina eikagagaigusi
bibodasi mipuki makawala tomitugaga,
deli bubunesi gaga.
8 Avaka ibodi matausina gala inikolaisi Yaubada
bipikwakwaisi tuta matutona Yaubada bikau si momova?
9 Avai tuta mwau bikaloubusi baisa matausina,
ki ibodi Yaubada bilagi si nigada?
10 Ibodi biyosisi mwasawa makwaina,
matauna isisaiki tomota.
Ibodi matausina biyosalausi nigada baisa matauna.
11 Kaina bukutagwalasi bavitulokaimi Yaubada la peula kala siniveka,
deli bakamitububuli avaka Yaubada Topeuligaga
la nanamsa bogwa leinagi.
12 Mitaga ka, kugisasi - bogwa wala eigisaki mitami titoulemi;
e avakaga paila mi bigatona nagowawokuva wala?
13 Baisa makawala Yaubada Topeuligaga bimipuki tomitugaga,
matausina goli togigasisi.
14 Kaina goli litusia tauwau bidubadu,
mitaga komwaidosi wala bipatu mitasi okawakali;
deli litusia bikamkwamsi mitaga gala wala bitubotubwa luposi.
15 Availa matausina kesala tommomova lelia wala bikimati,
e si kukova goli gala wala binigibubwaisi matausina.
16 Kaina goli tomitugaga si mani saina bidugaga
e gala gagabila bitakalau,
deli kasi karekwa saina wala bidugaga;
ikalisau avaka bibodi taitala bisikam
17 mitaga ka, taitala tobwaila igau bisikam miyasina
e taitala tokamokwita bikau si mani.
18 Tomitugaga si bwala makawala kapali kala bwala.
Kaina kala gigisa makawala ula la buliyamata wa bagula.
19 Otutala kala vigimkovila, matausina bimasisisi bikanugolaisi wala deli veiguwa,
mitaga avai tuta bimamatasi bimokaiasi si veiguwa bitamwauki wala kala pikowau.
20 Kabovitukokola biyokupati matausina makawala sakala
e bibogi yagila biuu biyuvisau matausina;
21 bomatu bikoulusa biyuvisau matausina; metoya osi bwala,
22 tutala bivigikonaisi mwada bisikauligilaisi makwaina,
mitaga yagila saina minimani bikipini matausina.
23 Avai tuta bisisakaulasi, yagila makwaina biuu, e butula wala
bibulukukoliga matausina,
makwaina biutuutu wala biluvalova.