13
1-2 Ka, vavagi kwaitala kwaitala kulilivalasi, bogwa wala laligibogwi makwaisina.
Komwaidona anikoli wala iwokuva;
ulo nikoli saina siniveka makawala yokomi mi ninikoli.
Yokomi gala wala kukwalisauwaigusi.
3 Yeigu kamataiyu Yaubada ma kominimani, gala yokomi.
Yeigu magigu bakamituli avaka ulo nanamsa deli matauna.
4 Yokomiga sopa wala ivakasauwaimi;
yokomi makawala matausina toyuvisa gala ibodi biyomovisi availa tokatoula.
5 Kulamamsi, e tomota bidokaisi wala isim mi kabitam!
6 Ka, kuninakaigilasi, e bakamituliga avaka ulo nanamsa.
7 Avaka paila kusisasopasi?
Ki kudokaisi Yaubada bikabwaili avaka mi sopa?
8 Ki, kaina lokuvigikonaisi mwada bukukolaisi matauna?
Kudokaisi ibodaimi bukupilasaisi matauna otutala yakala?
9 Ka, kidamwa Yaubada bimitakavataimi, ki kudokaisi bibani avai vavagi bwaina?
Ki kudokaisi gagabila bukuvigakaisi Yaubada tonagowa, makawala lokuvigakaisi baisa tomota?
10 Ilagoli bukukiumsi avaka mi nanamsa,
mitaga Yaubada ibodi wala bikamitilakaimi,
11 e kokola wala bivakasauwaimi metoya ola peula.
12 Bigivakala kwaitala kwaitala lokulilivalasi gala wala dimlesi,
makawala wala tubumyou gala wala dimlela;
e mi kominimani itamsomsilasi makawala wala kulimoya bitamsomsila.
13 Ka, ibodi bukukwapatusi, e sitanaga balivala,
e bitagisi ammakawala da bigatona kala kamokwita.
14 Yeigu ibodi wala bavisilagi ulo momova.
15 Yeigu ulo pikwaku bogwa leiwokuva, e ammakawala kidamwa Yaubada bikatumataigu?
Yeigu baisa tuta bakamituli avaka nanogu baisa matauna.
16 E kaina goli ulo tuvaluwa wala bikolaigu,
paila tomitugaga gala wala ibodi bimakaiasi Yaubada.
17 Mapaila ibodi bukunakaigalaisi bibwaina avaka ulo kamitabubula.
18 Yeigu bogwa bakamituli avaka nanogu,
paila bogwa lanikoli yeigu lakamokwita.
19 Ki Yaubada, yoku mwada bukutabinakaigu ke?
Kidamwa bukuvagi makawala, yeigu bogwa wala bamanum e bakaliga.
20 Ka, ibodi wala banigada paila kwaiyu vavagi.
Magigu bukukwabwaili makwaisina e yeigu gala tuvaila batotubulokaim.
21 Wa, desi, taga kumipukwaigu, deli gala bukuvitukukolaigu.
22 Mwa ulo Yaubada, kulivala bikugwa, e yeigu bamapu m biga,
kaina balivalabogwa, e bukumapuga ulo biga.
23 Ki, avaka ulo mitugaga? Kaina avai sula bogwa lavagi?
Kaina avai vavagi lavagi e lokutabinakaigu ke?
24 Avaka paila kutotubulokaigu?
Avaka paila kuvigakaigu kam tilaula?
25 Ki yoku mwada lokuvigikoni bukuvitukukolaigu?
Ka, yeigu gala wala dimlegu,
makawala yatala wala yekwesi.
Ka, yoku kuuvisilagi yatala yogilumwamwaisa wala.
26 Avaka lauvagi igau otubovaugu e leima lagaila,
yoku m tabinona paila makwaisina saina yayana baisa yeigu.
27 Yoku kuyuwoli kaikegu.
e ulo kailoula kumitakavati wala iwokuva,
deli goli kumitakavati bakwaigu. 13.27 Yob 33.11
28 E kala vigimkovila, yoku kuvigakaigu batamsomsila makawala kaimilapwasa,
kaina makawala yatala karekwa liwoliusa eitamtumtu.