1 Mina Yerusalem, kutokaiasi e kuvigakaisi mi valu bikata makawala goli kalasia.

Ka, Guyau la guyugwayu bogwa wala eivisigilaimi!

2 E dubilikitakita bogwa wala bikuboli avai boda avai boda ovalu watanawa,

mitaga Guyau la lumalama bogwa bivisigilaimi,

e la guyugwayu kala siligaga bogwa goli bisikailimi.

3 E mi lumalama bogwa bibia boda ituwoli ituwoli bimaisi,

deli gweguya bimaisi tutala bigisaimi yokomi makawala bulubuvisiga kalasia biyuwoula.

4 Tosibogwa Yerusalem, kulavaisi mitami bila ambaisa ambaisa

e kugisaisi avaka eikikaloubusi.

Ka, mi tomota bogwa eikikougugulasi paila bimaisi omi valu!

E litumia tauwau bimaisi metoya omiloutalʹo,

e litumia vivila bikopwaisi makawala goli gugwadi.

5 E yokomi bogwala bukugisaisi baisa, e mi mwasawa bivakasauwaimi.

E yokomi biulititavaimi goli deli ninami kala mwamwasila.

E boda ituwoli ituwoli bogwa goli bimiakaimi si guguwa.

E tolesi bolita bimiakaimi avai guguwa avai guguwa.

6 Tomota deli si kameli yuwoveka bogwa wala bimaisi metoya Midiani deli Epa.

E matausina bimaisi metoya mapilana Siba, e bimaiyaisi goula deli bulami maiina simasimina.

E tomota bogwa bikamitulaisi bulogala bwaina paila avaka Guyau eiuvagi!

7 Komwaidona sipila mapilasina Kedara deli Nebaioti

bogwa goli bimiakaimi paila lula,

e bukugabwaisi okabolula kidamwa biyomwasali Guyau.

E Guyau bogwa bikatumkulovi kala guyugwayu la Bwala Kwebumaboma.

8 Tauwau, avaka wogala makaisina eibubeu makawala lowalowa,

kaina makawala bubuna eikaimilavausi osi valu ke?

9 Ka, makaisina wogala Yaubada la tomota eikaimilavausi osi valu,

makaisina leimeimaisi metoya omiloutalʹo valu.

E leimeimaisi deli goli kasi kaidodiga siliba deli goula

kidamwa bitemmalaisi Guyau matauna mina Isireli si Yaubada tobumaboma,

e matauna goli eivigaki komwaidona boda bitemmalaisi la tomota.

10 E Guyau eilivala baisa mina Yerusalem, kawala,

“Ka, matausina mina gilagala bikaliivauwaisi kalila mi valu,

e si gweguya biwotitalaimi.

Metoya ogu gibuluwa goli yeigu lamipukwaimi,

mitaga tuta baisa bogwa bayebwailimi deli banokapisaimi.

11 Mi valu kalapisilela bikikapogega wala yam deli bogi,

e igagabila boda ituwoli si gweguya

bimiakaimi si guguwa. 60.11 YG 21.25-26

12 Mitaga avai boda avai boda mabudosina gala biwotitalaimi

bogwa bakatudidaimi e bitamwauvagasisi wala.

13 “Makaisina kai yayu, kaga deli reiyava,

makaisina kaimatabwaila metoya oudilela Lebanoni goli,

bogwa goli bimaiyaisi paila Yerusalem kala kaliivau,

paila bivigaki ulo Bwala Kwebumaboma bikwaiminabwaita,

deli bivigaki ulo valu kala katububula bibwaina sainela.

14 E kami tolamadada litusia bogwa goli bimakaiami,

e bikavaginasi omitami paila kami kamaiaba.

Deli komwaidona matausina omitibogwa eivigakaimi mina kukolosi

bogwa goli bimaisi itaimamilasi okaikemi.

Matausina bidokaisi yagala mi valu, ‘Guyau la Vilouveka’,

deli, ‘Saiyoni, makwaina mina Isireli si Yaubada Tobumaboma la Vilouveka.’ 60.14 YG 3.9

15 “E yokomi gala tuvaila basilavaimi kaina bavigakaimi mina kukologu,

e gala bavigaki mi valu bivilouwokuva deli biviloububu.

Ka, yeigu bogwa bavigaki mi valu bikwaiveka deli bikwaiminabwaita,

deli bavigaki viluwela kabolagisa tuta gala biwokuva.

16 E ka, makawala goli natana vivila navalulu eiuvinunu latula,

e makawala goli boda ituwoli ituwoli deli gweguya ambaisa ambaisa biyamataimi.

E yokomi bukunikolaisi yeigu goli Guyau lakatumovaimi.

Yeigu mina Isireli mi Yaubada Topeuligaga latanekwaimi.

17 “Yeigu bamiakaimi goula kaimapula barasi,

e siliba deli barasi kaimapusi aiyani deli kai,

deli aiyani kaimapula dakuna.

Kami tokwaraiwaga gala tuvaila bilamidadaimi.

Yeigu bavigaki matausina bikaraiwagasi duwosisia deli vakota.

18 E gala tuvaila availa bikatugisisaimi

kaina avai boda tuvaila bikodidaimisi mi valu.

Ka, yeigu bakolaimi deli bavabodaimi makawala goli kwaitala kali,

e yokomi bukuyakawolaigusi paila uula bogwa lakatumovaimi.

19 “Gala tuvaila kalasia bivigaki mi kaitapa wa yam,

kaina tubukona bivigaki mi kaitapa wa bogi.

Mitaga yeigu wala Guyau mi kaitapa kaikanuvagasi,

e visigala ulo guyugwayu baisa bisimitalaimi. 60.19 YG 21.23; 22.5

20 E yamla mi ninamwau bogwa goli biwokuva.

Ka, yeigu goli Guyau, yeigu mi kaitapa kaikanuvagasi,

e visigala ulo guyugwayu bikanuvagasi e gala makawala kalasia deli tubukona visigasi.

21 E komwaidomi bogwa bukuuvagaisi avaka duwosisia wala,

e yokomi bukuyosikikitaisi valu makwaina tuta gala biwokuva.

E matausina makawala ulo bagula, e yeigula labubuli,

Metoya matausina yeigu bayomitali ulo tovakaigaga baisa tomota komwaidona.

22 E mabudosina mi boda budokikekita bogwa goli bibudovakavekasi,

e matausina si kaisisu saina watanawa

bogwa goli bipeulasi makawala si peula budotala boda budopeuligaga.

Ka, avai tuta bibudoki kala tuta paila baisa,

e yeigu saina nanakwa bavigaki vavagi makwaina bikaloubusi.

Yeigu goli Guyau!”