1 Щи хӑтԓәтән и пўш, хун Ԓўв хŏйатәт Турәм Хотән утәԓтәс пӑ Йӑм айкеԓ эԓты сыйәӈа пŏтәртәс, Турма йир верты хŏйатәт ŏх икет пӑ Закона утәԓтәты икет, уна уԓты икет пиԓән Ԓўв хŏщайәԓа вана хӑтсәт

2 пӑ Ԓўвеԓа йастәсәт: "Йаста мўӈева, хŏй партатты щирән Нӑӈ тӑм вер верԓән, ӑнты ки пӑ хŏйән Нӑӈ щи йурән мӑсайән?"

3 Ԓўв ԓывиԓаԓа йŏхԓы йастәс: "Ма па нын эԓтан и вер эԓты ищмәԓәм, Мӑнэма йастаты:

4 Иоанн йиӈка ԓŏӈәԓтыйәпса турәм эԓты ус мўй пӑ хŏйатәт эԓты?"

5 Ԓыв пӑ ԓыв кўтԓаԓән ŏшйащман, пŏтәртсәт: "Йастәԓув ки: 'Турәм эԓты', Ԓўв пӑ йастәԓ: 'Мўйа пӑ ԓўвеԓа ӑт эвәԓсәты?'

6 Йастәԓув ки: 'Хŏйатәт эԓты', хŏйатәтән кевән щӑх сэкԓайув, ԓыв эвәԓԓәт, Иоанн щит Турәм йасәӈ туты хŏйат".

7 Щиты йŏхԓы йастәсәт: "Ӑт уйәтԓэв хŏԓща ус".

8 Иисус йŏхԓы йастәс: "Ма па нынана ӑт йастәԓәм, хŏй партатты щирән щит верԓәм".

9 Щӑԓта Иисус мир пеԓа тӑмәщ утәԓтәты пŏтәр пŏтәртты питәс: "И хŏйат мўв хӑрән виноград йўхәт опсәс пӑ артнайа виноград ԓэвпәс энмәԓтты хŏйатәта мӑсԓы, щӑԓта йӑм хўв кеша хŏԓт мӑнәс.

10 Хун пŏра йŏхтәс, ԓўв митхуйәԓ виноград энмәԓтәм хŏйатәт хŏща китсәԓы, ԓуԓән ԓыв митхуйәԓа виноград йўхәӈ тӑхайәԓ эԓты ԓэвпәс ат мӑсәт; туп виноград энмәԓтты хŏйатәт митху сэксэԓ пӑ таԓты йŏхи китсэԓ.

11 Щӑԓта па митху китәс; туп щи митху па, сэкман, ԋэрман, йŏхԓы таԓты китсэԓ.

12 Хŏԓна па хуԓметәԓ китсәԓы; туп ԓыв щит па, мушмәԓтман, воштәсэԓ.

13 Щиӈәԋща виноград йўхәӈ тӑха куща йастәс: "А мўй мӑнэм верты?" Сӑма мосты ма пŏхем китԓэм; мосәӈ пӑ ԓўвеԓ шийаԓәтэԓ кемән, йэԓәмԓайәт".

14 Туп виноград энмәԓтты хŏйатәт ԓўвеԓ шийаԓәмеԓ кемән, ԓыв кўтэԓән ŏшйащԓәт, пŏтәртԓәт: "Тӑми ащеԓ ŏх вŏԓ; мӑнԓув, веԓԓэв ԓўвеԓ, пӑ ащеԓән хӑйты тащәԓ-вещәԓ мўӈева питәԓ".

15 Щӑԓта, виноград йўхәӈ тӑха эԓты ԓўвеԓ ким тўвман, пӑратсэԓ. Хŏты пӑ ԓывиԓаԓ виноград йўхәӈ тӑха куща верԓәԓы?

16 Ԓўв йŏхәтәԓ пӑ пӑратԓәԓы щи йохԓаԓ, виноград йўхәӈ тӑхайәԓ пӑ па хŏйатәта мӑԓԓы". Щит хуԓәм мŏхет пӑ йастәсәт: "Ӑт ат питәԓ!"

17 Туп Иисус, ԓыв пеԓайэԓ ӑӈкәртман, йастәс: "Тӑм хӑншәм йасәӈ мўй щит: "Кев хот омәсты хŏйатәтән мŏԓтсатәм кев шуп, щит щуӈ хŏща мет мосты кева йис"?

18 Кашәӈ ŏт, хŏй щи кев эԓты рӑкәнәԓ, ай наприйэ шўкаԓәԓ, хŏй эԓты щи кев рӑкәнәԓ, щит пŏԉха йиԓ".

19 Щи пўԉаӈ Турма йир верты хŏйатәт ŏх икет пӑ Закона утәԓтәты икет Ԓўвеԓ кӑтәԓтты ўтщисэԓ, туп хŏйатәт эԓты пӑԓԓысәт, ԓыв ŏша пайәтсэԓ, щи утәԓтәты пŏтәр ԓыв эԓтэԓ пŏтәртәс.

20 Щӑԓта ԓыв, Иисус эԓт ватман тӑйман, ŏщмарәӈ хŏйатәтән китса, йӑм хŏрпийа ԓэщатыман, мӑтты йасәӈ хŏща ԓуԓән Ԓўвеԓ ат мŏщатсэԓ, рим йохәтән пŏнәм сўт верты кущайа мӑты урәӈән.

21 Щӑԓта ԓыв Иисус иԋщәссэԓ: "Утәԓтәты Ху! Мўӈ уйәтԓэв, Нӑӈ вещката пŏтәртԓән пӑ утәԓтәԓән, хŏйат веш пеԓа ӑт ватԓән, туп йӑна Турәм йуш хўват мӑнты щира утәԓтәԓән;

22 мўӈева кесарьа налог мӑты рӑхәԓ мўй ӑнта?"

23 Ԓўв пӑ, ԓыв ŏщмарэԓ мŏштәман, ԓывиԓаԓа йастәс: "Мўйа Мӑнэм хўщԓәԓән?

24 Мӑнэм динарий ŏх этәԓтаты: хŏй хŏр пӑ нэм щита?" Ԓыв йастәсәт: "Кесарь ŏтәт".

25 Иисус ԓывиԓаԓа йастәс: "Кесарь ŏтәт кесарьа мийаԓән, Турәм ŏтәт па Турма мийаԓән".

26 Ԓыв мир йэԓпийән Ԓўвеԓ йŏвра йасәӈ урәӈән мŏщатты ӑт верәтсэԓ, пӑ, Ԓўв йŏхԓы йастәм йасәӈԓаԓ эԓты пакнысыман, шитама йисәт.

27 Щиӈәԋща кӑмәтса Саддукей йŏхтәс, нŏх ԓыԓәӈԓәты вер хŏԓт хуләтты ŏтәт эԓты, пӑ Ԓўвеԓ иԋщәссәԓ:

28 "Утәԓтәты Ху! Моисей мўӈева тӑмәщ йасәӈ хӑншәс: мӑтты, хŏй ими тӑйәм йайәԓ пӑрәԓ ки, пӑ пӑртаԓән ԋаврем ӑт тӑйәԓ, апщеԓа ԓўв имеԓ ўты мосәԓ пӑ йайәԓ ŏх вŏԓ йэԓԓы туты мосәԓ.

29 Ԓапәт йай усәт, оԓәӈ йай, ими тўвман, ԋаврэмԓы пӑрәс;

30 щи нэ оԓәӈ апщеԓән ўса, щӑԓта щитэн ԋаврэмԓы пӑрәс;

31 кимет апщеԓән ўса, и щиты хŏԓ ԓапәт ху, пӑ, ԋаврэм ӑт хӑйман, пӑрсәт;

32 мŏхиԓаԓ йўпийән щи нэ па пӑрәс;

33 йа щӑԓта, нŏх ԓыԓәӈԓәтыйән мӑты ŏтәԓ имийа ԓўв питәԓ, ԓапәт йай хŏԓ ԓўвеԓ нэӈа ўйԓысэԓ?"

34 Иисус ԓывиԓаԓа йŏхԓы йастәс: "Тӑм йис хŏйатәт ими туԓәт па ху сайа мӑнԓәт;

35 Щитәт пӑ, хŏй йиты турәмән уԓты щира пайәтса пӑ пӑрәм эԓты нŏх ԓыԓӈатԓа, нэ туты ӑт питԓәт, ху сайа мӑнты ӑт питԓәт,

36 пӑрты пӑ ӑт верәтԓәт, ԓыв ангеләт хŏрпийа йиԓәт пӑ ԓыв Турәм ԋаврэмәт, Турәмән ԓыв нŏх ԓыԓӈатсайәт.

37 Щи пӑрәм ŏтәт нŏх ԓыԓәӈԓәты вер, Моисейән хŏԓна пеԓантыты варәс пŏхәлән тыйиԓыйәм пищ пŏрайән этәԓтәса, хун Турәм Куща Авраам Турма, Исаак Турма пӑ Иаков Турма нэмәтса.

38 Турәм хŏты ӑнта пӑрәм ŏтәт Турәм, ԓыԓәӈ ŏтәт Турәм, Ԓўвеԓән хŏԓыйэ ԓыԓӈәт".

39 Щи йастәм ŏтәԓ пеԓа тухәԓ Закона утәԓтәты икет йастәсәт: "Утәԓтәты Ху! Нӑӈ йӑма йастәсән".

40 Па мŏԓты оԓәӈ эԓты Ԓўвеԓ иԋщәсты ԓыв ӑт пӑ верәтсәт.

41 Ԓўв пӑ ԓывиԓаԓ эԓты иԋщәсәс: "Хŏты йастәԓәт, Христос щит Давид Пŏх?

42 Давид пӑ Псалмәт* 20:42 Псалмәт - Библияйән уԓты Йэмәӈ араӈ нэпек; нэмпи нэпекән пŏтәртәԓ: "Турәм Куща ма Турәм Кущайэма йастәс: Ма пўӈԓэма йӑм пеләк сӑхат опса,

43 щи унты, хун Ма Нӑӈена нўр верты ŏтԓан кўрԓан иԓпийа иԓ ат пŏнԓәԓам".

44 Йӑ ин, Давид Ԓўвеԓ Турәм Кущайа айәԓԓәԓы; Хŏты сӑхат Христос ԓўвеԓа Пŏха уԓты верәтәԓ?"

45 Щи пŏрайән, хун мир аратәԓән Ԓўвеԓ хуԓәтмаԓән, Ԓўв утәԓтәты йохԓаԓа йастәс:

46 "Закона утәԓтәты йох эԓты хурыйаты, ԓыв хўв сŏхән йӑхты сӑмәӈәт пӑ хŏйатәт ӑктәщиты тӑхайәтән ԓывиԓаԓ мосәԓ иса ўщайән верты, щит пеԓа ԓыв сӑмәӈәт, Турәм йасӈа утәԓтәты хотәтән пӑ поры пӑсан сурыйән ԓыв мет ԓӑтәӈ тӑхайән омәсты сӑмәӈәт,

47 Ԓыв икиԓы хӑщәм имет хот тэԓ вŏԋщала пайәтԓәт пӑ хŏйата вантәԓтәман хўв пойәкщәԓәт; ԓыв мет тарәм сўт ватԓәт!"