1 Tigua mandagi holenenaga habo nalolene bi uruni lai halu Lisiasa ibu kini hearia dai bialu Yuda ti tininaga mabuha biabe bialu hagadaru bima dai bini. 2 Anigo agali haguane maru kinihanda dindi hobane mbira mbira wiaru handaya ho haga bilo dabo helene bu hearume Yuda wali agali baya hangu helo hame naleore hene. Agali uruninaga mini Timodibi Aboloniusu ibu Geneusu igini henegobi Hieronimusubi Demobonobi uruni hene. Ani howa Nigano ibu ami agali maru dindi mini Saibarasa iba solowara dege dombene wiagoha haga hearu haru haga howa ibuguabi nde Yuda wali agali bayale helo hame nale dege hene.

3 Ayu Yoba tanoha wali agali bu hearume mana ko mbira bialu henegonaga te laro. Tigua Yuda wali agali tinaga tanoha haga bu hearuhondo tinaga iba talu ngagoria biralu ibaha ma lene. Walibi waneigini hearubi ma dege laga bini. Tigua mini ko wua howa ma lagadagua ndo tiga tiga howa ma laradagua bini. 4 Ainde Yuda wali agali tigua Yoba wali agali baba nenege holene bayaleda lo manda bialu tigua ma layagola ta nabi pu dege bini. Tigua mbirale mbira bulubada lowa gi nahe dege pene. Ani puwa iba solowara haunini puwa Yoba wali agali biarume iba talu mo ande lowa Yuda wali agali handari kira (200) bibahende iba nalu homai helene.

5 Ai Yudasa ibu hale halu hearia Yoba wali agalime ibu damene Yuda wali agali anidagua ibaha homai helaya layane hale howa ibunaga ami agali mo mogo bini. 6 Ani buwa ibugua Ngode Datagaliwabe manani ngadagua tigatiga mo tale biaga kagohondo bi ala lalu mani wali agali ko ibunaga Yuda wali agali bo wahaga hayadaru bole pene. Mbiraga puwa iba angeni iba sibi bu wiaru delai halu iba togo wiarubi delalu wali agali biradoho berearu bo wahai halu bini. 7 Ani bialu howa Yudasa ibu handalu hearia tanoha wai pabe panga payatagi heago handalu ti dai bini. Ibugua mani halu mende dai bialu wali agali ogoniha haga bu hearu bo wahai hama dai bule manda bialu pene.

8 Yudasa ibu lone dege hale halu hearia Yabane tanoha wali agali bu hearu tiguabi Yuda wali agali ani dege bo wahai hole ka layane hale hene. 9 Ani layago hale howa horo mbirangi mbiraga heyalu wai bule pene. Puwa ibugua tinaga iba togobi iba sibi bu wiarubi bo heda hai hene. Ani bo heda hayagonaga ira hagua timbuni dayago Yuda wali agali Yarusaleme tanoha hearume handa amu halu panaga handai hene.

10 Ani bialu Yudasa halu ibunaga ami agali biarume Yabane tano wahalu Timodila wai bule pene. Harigani pole wene pialu hemiria hameigini tara Arebiali ami tidiyu howa wai bini. Arebia uruni ti tomo nolene taya ibaga bu hai haga hene. Agali uruni ti ami agali daosini duria (5,000) howa handari duria (500) nogo hosini biruwa wai biaga hene. 11 Ani heago baba Yudasa halu ibunaga ami agali biaru baba wai buwa Ngode Datagaliwabehanda ti biamogo biyagola ti wayali hene. Ani biyaola Arebia ami agali biaru Yudasahondo hale halu, Ai wai wahalu gi tigani bialu tígua nogo bulumaga sibiru talebu mialu biabe maru bulene ngarubi buleberema, lene. 12 Ani layagola Arebiali uruni tigua Yuda wali agali biamogo bialu tigua biabe dewaore bulebira lo manda bialu Yudasahanda karulape lene. Ani lowa tigua gi tigani biai halu Arebiali ti tininaga balai anda heagoha dai bini.

13 Ani bialu Yudasa ibugua tano wai pabe hongohe bu mabubi mini Kasabini wiagoha wai bule pene. Tano ogoniha wali agali dindi tara taraha howa íbu hene dewaore haga hene. 14 Ani howa tinaga wai pabe hongohe bu mabu bini heagonaga hongoni hana ho hene. Ani bialu ti tomo nalu holene karulape tanoha wai kema lo manda bu hene. Ani howa ai tigua Yudasanaga ami agali biarume mbira buluba ndoda lo manda buwa tigua bime mo tandaga haga bialu hene. Agali uruni tigua bi ko lalu Ngode Datagaliwabe mege bialu hene. 15 Ani lalu heagola Yudasa ibugua dindi bibahende haru howa handame ho haga Ngode Datagaliwabehondo bi lene. Bamba Yosua heangi Ngode Datagaliwabehanda Yarigo tanoho ege pabe hongohe bu mabu bu heago bo gialape hai hene. Yuda tigua pabe ogoni masinimebi ege to̱le̱ timbunime bo gialene ndo. Danda timumebi ndo dege. Ani binigo manda bialu Yudasa ibugua tano ogoni karulole manda buwa wai hongo howa bialu heagola 16 Ngode Datagaliwabehanda ibu biamogo biyagome ibugua wai ogoni bialu bo poda hana howa wayali hene. Yudasa halu ibunaga ami agali biarume wali agali dewaore bo wahai hayagola ibu kuyama mbira bereago wali agali bayaru daramame to̱lene. Iba kuyama ogoni timbuninaga magi manda mida handari maria (400) berene.

17 Yudasa halu ibunaga ami agali biaru ti Kasabini tano wahalu hariga luore pialu Karagasa tano anda pene. Yuda agali maru dindi mini Daliga haga hearu tano ogoniha hene. 18 Ai Yudasa ibu puwa handalu hearia Timodi ibu abale wai mbira binigo ogonime ibu bo poda hana haya handala ibida peaha Yudasa pu aribia hene. Anigo Timodi ibu pialu ibunaga ami agali hongoheoreru tidi mbira ogoniha helalu pene. 19 Ani helalu pearia Magabeusunaga ami agali haru haga kirali Dosideusula Sosibadalame Timodinaga ami agali uruni baba wai bialu bo podahana halu daosini dege pira (10,000) bolangua howa bene. 20 Ani bialu Yudasa ibugua ami agali dewa mo tale bigi bialu tidi yu haga haga bilowa tinaga wai haru bamba holene dabo helowa haru helaga bini. Ani bialu ibuni abaleore Timodi haruru talima pole pene. Timodi ibunaga ami agali nde daosini dege handari mbirani pira kira (120,000) haru halu ami agali nogo hosini biruwa wai biagane daosini kirani handari duria (2,500) haru hene. 21 Ani piyagola ibira layago Timodi ibu hale howa ibunaga wali waneigini dabudabu wiarubi Kanaimi tano yu pelene Kanaimi tano polene hariga emene dorogeore ngagola ogoniha wai anda polene nakarulape wini. 22 Ai Yudasanaga ami agali tidi mbirago pialu anda piyagola Timodi halu ibunaga ami agali biaru mogo lalu duru lo hai hene. Ti mogolo henedago irane Ngode Datagaliwabenaga manane mbira biyago handa walia howa mogolo hene. Ani bialu ti ibida hariga nawi de hendeagoha pugupugu bialu ibida piai hene. Pialu tini mo luluya heagola tini aria dege dege ayu tibume dibaga dibaga bini. 23 Ani biyagola Yudasa halu ibunaga ami agali biarume talima pugupugu bialu waitigi daosini dege pira tebira (30,000) bibahende homelo bo wahai hene. 24 Ai Timodi ibuni ibida pialu hearia hameigini kira Dosideusu hearumebi hameigini Sosibada hameigini hearumebi minu yania hene. Ani biyagola Yuda wali agali aba ai̱ya wahebi wandari igiri daliahebi ibunaga garabayaha helai hene. Ani kago ainde ibu andaga dai nabiruyagua nde wali agali uruni homo aribia hai holobada, lene. 25 Ani lalu Timodi ibu henene buleore howa lalu ibugua wali agali uruni mbirago mo bo nahe baya hangu handaya ho halu baya hangu tini karia dai bilolebero lalu latagi hene. Ani laya handala tigua Timodi pelo yupe hene.

26 Yudasa ibugua Kanaimi tanoha puwa dama wali beda mitangi bialu bi pupu wiaga mini Adagadisi laga waigonaga anda heagoria puwa wali agali daosini dege pira kirani duria (25,000) bibahende bo wahai hene. 27 Ani bo wahai halu Eberono tano hongohe wali agali dindi tara taraha howa ibini dewaorehe wiagoha pene. Ani biyagola igiri daliahe tano ogoniha haga hearume ege pabe neneni howa timu batagi halu wai hongo howa bini. Ai tano tamuha masini tara tara ege to̱le̱ batagi holenebi timu batagi holenebi dewa wabu ngelowa wai bini. 28 Ani bialu heago helowa Yuda tigua Anduane Homogohondo ti biamogo bialu waitiginaga hongo bo podabe lalu bi hongo howa lene. Ani lalu tanoha gialalu anda puwa waitigi daosini dege pira kirani duria (25,000) ale bo wahai hene. 29 Ani bialu mani Eberono wahalu pialu tano mbira mini Bedesana Yarusaleme howa horo mbirani gao laragola heyalu puwa alendo ne laragola anda polene wiagoha pole pene. 30 Wali agali Yuda hameigini aria tano ogoniha haga hearume Yudasahondo lamialu lalu, Wali agali dindi aba tano ogoniha haga bu karume ina Yuda wali agali baya hangu handaya ho howa mo ko holene ngangi ina biamogo bialu haga ka lalu lamini. 31 Ani layago hale howa Yudasahanda bime hongo howa lalu, Horo bibahendengi anidagua biaabo halimu, lalu lamini. Ani lalu Horo Timbuni Mabuha Tomo Pigane Denegonaga biago kaware ibulene wiagola Yudasa halu ibunaga ami agali biaru heba Yarusaleme dai bini. 32 Horo timbuni ogoni mini Girigi bi lalu Pendigosi laga.✡ Har 23.16

Yudasa halu ibunaga ami agali biaru tigua horo mini Pendigosi ogoni hai halu Idumea dindiha gabumane agali haguane mini Gogiasala wai bule abale heyalu pene. 33 Ani biyagola Gogiasa ibugua ibunaga ami agali daosini dege tebirabi (3,000) ami agali nogo hosini biruwa wai biaga handari mariabi (400) mo mogo bu hene. 34 Ani howa wai bialu Yuda ami maru homene. 35 Yuda agali ami hongoheore pari wayali mini Dosideusu ibu tano mini Daliga howa ibini henego ogoni ibugua nogo hosini biruwa wai bialu howa Gogiasa talima pugu pugu bialu aga biagoria minu yania howa gililo yalu pubagi hene. Ani buwa ibugua homelo bolene hame nale hearia dege ami agali mende nogo hosini biruwa wai biaga Terese dindiha howa ibini heagome Dosidereusunaga gi ayu tibume gandulope hayagola Gogiasa ibu pora bialu ibida Maresa dindiha puabo halu pene.

36 Ainde Esediriasa halu ibunaga ami agali biaru heba wai luore biai howa tinaga hongo ibira hene. Ani heago Yudasa ibu de hondowa Anduane Homogohanda ibuni ti heba ko lalu manane mbira mo walia halu ibuni Yuda ami agali heba bamba habe lalu bi lene. 37 Ani lalu Yudasa ibugua ibunaga ami agaliru mo hongo halu lotunaga iba gana mbira mbira tininaga bi lalu lene. Ani lalu tigua wai pora bialu Gogiasanaga ami agali biaru balu bo taliatogo lai hene.

38 Wai biai halu Yudasahanda ibunaga ami agali mo mogo bialu Adulama tano pole pene. Puwa Sarere ogoninaga horo kane tagira ibulene wiagola Yuda wali agalinaga maname biaga winidadagua tini Anduane Homogonaga deni dodo nahe holenenaga biaga mana wiago bialu Sabada horonaga mana bialu hene. 39 Horo mendeni Yudasa halu ibunaga ami agali biaru tigua tinaga ami agali waiha homayarunaga tingini tini mamaliru hora heagoha dege mandagi tininaga tanoha hora hole mo pene. 40 Ani mo puwa handalu hemiria homayadarunaga gi adogeha Yabane wali agalinaga bi pupu wiaga gime wabini bigiya irame wabini wiaru mo yiaria de hendene. Ngode Datagaliwabenaga mana lowini ngagoha howa mbirale bi pupu wiaga gime wabini ogoniale Yuda wali agalime yulene nawi lalu lowini. Ai agali waiha homai hayadaruni irane ogonime homayada lo panaga hondo manda biai hene.✡ Man 7.25 41 Ani biyagonaga mini panaga handai henego tigua Anduane Homogonaga mini mo yaraga halu hene. 42 Ai Yuda tigua Ngode Datagaliwabehondo bi lalu tinaga ko ogonime mo wia hayadago mo wahaiore habe lalu bi lene. Yudasa ibugua ibunaga ami agali biaruhondo lamialu, Konaga pani ayu dege agali homai hayago ina de handarimagonigo ai tíha mana ko ngelo kemigo wahai halimu, lalu lamiai hene. 43 Ani lalu ibunaga ami agali biaruhondo muni ngidaba lowa siliba muni kuni daosini kira (2,000) mo mogo bini. Ani buwa agali loma binigo mo miaga Yarusaleme tanoha hearume tinaga mana ko ngago domolene lomabu milonaga mo pelene. Mana Yudasa ibugua binidagoni bayale tigabiore binigo irane wali agali homayaru mani lone heyulebirago manda bialu mini mbiraore hongohe wu howa ani bini. 44 Yudasa ibugua agali homayarunaga bi Ngode Datagaliwabehondo la henedago ibugua mini mbiraore nawi howa lenedale ogoni mana tiga nabi dege bialu kale. 45 Anigo ainde Yudasa ibugua agali bayale tigabi howa mana bayale bialu haga homeneru ti mani yolo bayale mulebira lo manda bu hene. Ani manda buwa Yudasa ibugua agali wai bialu homararunaga ko Ngode Datagaliwabehanda domo wahai helonaga loma wia hene.