1 Ŋunhili ŋayi Bolnydja nhinana yukurrana ḏämbumirri ḏaykun ḻoḻuŋura gulŋiyina, bala ŋuliŋurunydja walalanydja bunanana, ŋunhi Ḻiya-ŋärra'mirri yolŋu yäku Yananaya, ga wiripu-gulku' ḏilkurruwurru, ga ŋunhiyi yolŋu rom-marŋgi ŋayi yäku Datala. Marrtjinanydja walala ŋunhimalayina wäŋalili, märr walala yurru ŋanya Bolnhanydja ḻakarama ŋurikala Ŋurruŋuwala wal'ŋu Belikkala. 2 Ŋayinydja ŋunhi rom-marŋginydja yolŋu Datalanydja yäku dhärrana, bala ŋayi waŋanana, ḻakaraŋalana yukurrana bitjarrana, “Nhenydja dhuwala biyapul wal'ŋu dharrpal ḏarramu, ga biyapul nhe ḻiya-djambatjtja dhika buŋgawa ŋanapurruŋgu. Baman'nha ŋilimurru yukurrana nhinananydja dhiyala ḻatju'ŋura dhika mäwaya'ŋuranydja nhokalanydja goŋŋura, ŋunhi dhiyaŋu nhokala romdhu nhe wäŋanha dhuwalayi ŋamathaŋalanydja. 3 Bitjanna liŋgu ŋanapurru yukurra guyaŋirrinydja nhuna, ga märr-ŋamathirrina ŋanapurru yukurra mirithirrina nhokalaŋuwu dhiyakiyi romgunydja. Ŋanapurru ga nhuŋu yolŋunydja mirithirri yana. 4 Marŋgi ŋanapurru nhuŋu yolŋunydja ŋunhi nhe ŋuli yukurra ḻayḻayyun nhäŋura malanyŋuŋura romŋura, yurru ŋäka ŋarranha bulnha buku-djulŋi; ŋarra yurru dhuwala ḻakaramanydja dhumbuḻ, gurriri yana nhuŋu. Yakana ŋarra nhuna yurru djawaryunmaramanydja weyingumanydja dhiyaŋu dhärukthu.

5 “Yo, mari-djämamirri yulŋunydja dhuwala ḏarramunydja. Birrka'mirriŋura wäŋaŋura ŋayi ŋuli dhiyaŋuyi marinydja baḏuwaḏuyuna, goḏuy-wunha ŋuruku Djuwskunydja yolŋu'-yulŋuwu, bala walala ŋuli ŋoynha dhärranha, bala bunharaminyana yukurranha. Ŋayinydja dhuwala ŋurruŋu yolŋunydja ŋuruku yolŋu'-yulŋuwunydja ŋunhi walala malthunaramirri ŋurukuywu Natjurippuyŋuwu yolŋuwu. 6 Ŋayinydja dhuwala yätjnha yana yolŋunydja, yana ŋayi yukurra ḻayḻaymaramana ga warku'yunna ŋunhayi Godku buṉbunhanydja, bala ŋanapurru ŋanya mulkanana dhuwalayi yolŋunhanydja. Ŋanapurru bini ŋanya ŋunhiyi dhä-wirrka'yunaŋga yukurranha ŋanapurruŋgiyingala ŋuriŋi wal'ŋu Romdhu, 7 yurru ŋayinydja Latjiyanydja yäku ŋurruŋu marrtjina, bala djaw'yurranana yana märraŋalana ŋanapurruŋgala. 8 Ga ḻakaraŋala ŋayi ŋanapurruŋgu, ŋanapurru yurru marrtji dhipala, bala ḻakaramana ŋanya nhokala, nhä ŋayi djäma yukurrana yätj. Ŋunhi nhe yurru dhä-wirrka'yundja ŋanya, nhepina yurru ŋanya maḻŋ'maramanydja, ŋunhi ŋayinydja dhuwalayi yätj yana yolŋunydja yuwalk, ga ŋarranydja yukurra ḻakaramanydja nhuŋu yuwalk yana dhuwala.”

9 Ga walala wiripu-guḻkuny'tja ŋunhi Djuws waŋgany-manapanmina, bala yoraŋalana, “Yo, yuwalk. Yuwalk dhuwali ŋayi yätjtja yolŋu,” bitjarra.

10 Ga dhäŋuru ŋuliŋurunydja ŋayi ŋuriŋi ŋurruŋuyunydja yolŋuyu Belikthunydja goŋdhuna waŋana Bolnha, ŋayina yurru waŋa. Bala ŋayi Bolnydja waŋana bitjarrana. “Ŋarranydja dhuwala märr-ŋamathirri yukurra, ŋunhi ŋarra yurru ḻakaranhamirrinydja ŋarranhawuy ŋarra gumurrŋuranydja nhokala, liŋgu nhenydja yukurrana dhuwala weyinŋumirrina nhinana dhiyala ŋanapurruŋgu dhä-wirrka'yunaramirrinydja yolŋu. 11 Bawala'mirriyuna yolŋuyu yurru nhuŋu ḻakaramanydja ŋarranha, ŋunhi ŋarra ŋunhala Djurutjalamdja wäŋaŋura märr-muka gurirri, yaka weyin, liŋgu märr-yawungu ŋarra yana marrtji balayi Djurutjalamlilinydja buku-ŋal'yunarawu Godku. 12 Walalanydja ŋuriŋi Djuwsthu maḻŋ'maraŋala ŋarranha ŋunhiliyi Godkala Buṉbuŋuranydja, yurru bäyŋu warray ŋarra yukurrana djäma ŋula nhä marinydja yolŋu'-yulŋuwu, ga yaka ŋarra yukurrana yolŋu'-yulŋunha gur'-guryurruna goḏuy-wuŋala mari ŋunhili buku-ŋal'yunaramirriŋura Buṉbuŋura, wo bawala'mirriŋura bäyŋu. 13 Yaka walala nhäŋalanydja ŋarranha ŋuriŋiyi walalay ŋula djämalili yätjlilinydja, yana walala yukurra nhuŋu djawukirrina ḻakarama, mayali'-wilkthunna nhuna. 14 Yurru ŋarra yurru ḻakaranhamirri yulŋunydja ŋarranhawuy ŋarra, ŋunhi ŋarranydja ŋuli malthunna ŋurikiyinydja Djesuwalaŋuwunydja Gatjaḻwu ŋunhi walala ŋuli ḻakarama yaka yuwalk. Yurru yuwalk ŋarra ŋuli buku-ŋal'yun Godkala ŋurikalanydja ŋunhi ŋayi ŋanapurruŋgalaŋuwu märi'muwu waŋarr. Ŋarranydja ŋuli yukurra märr-yuwalkthirri bukmakku yana romgu malaŋuwu ŋunhi ŋayi Mawtjitjthu nherrara, ga bitjandhi liŋgu ŋarra yukurra märr-yuwalkthirri bukmakku ŋunhi nhäku malaŋuwu ŋunhi walala ŋuriŋi dhäwu'-gänharamirriyu walalay ḻakaraŋala. 15 Ga ŋarra yukurra dhukarr-nhäma waŋganyguna yana, bitjandhi liŋgu bitjan walala, ŋurikina bili waŋganyguna ŋarra yukurra märr-gatjpu'yundja, ŋunhi ŋayi yurru Godthu gaŋgathinyamirriyama yolŋu'-yulŋunha ŋulaŋuru moluŋuru, bala walŋakumayi ŋamakurru'mirrinhanydja ga yätjmirrinha. 16 Yo, bitjanna liŋgu ŋarra ŋuli nhinanydja yukurra ŋamakurru' yana, märr yurru Godthu ŋayipi ga yolŋu'-yulŋuyunydja yaka nhäma ŋula nhä yätj ŋarrakalanydja.

17 “Yo, ŋula nhämunha'na dhuŋgarra ŋarra marrtjina nhinananydja bawala'mirriŋura yana wäŋaŋuranydja malaŋuŋura, bala ŋarra roŋiyina balayi Djurutjalamliliyi, gäŋala rrupiya ŋarrakalaŋuwuna yolŋu'-yulŋuwu, ga wiripunydja ŋarra ḏukṯukthina ŋarra yurru wekama mundhurr Godku, buku-ŋal'yun manapan. 18 Ga ŋunhalayi Godkala Buṉbuŋuranydja ŋarra yukurrana djämana ŋunhiyi romdja, buku-ŋal'yurrunana yukurrana Godku, liŋgu ŋunhiyinydja ḏarrtjalkkunhamirrinydja rom liŋguna dhawar'yurruna ŋarraku. Bäyŋu ŋunhilimi guḻkuny'tja yolŋu walala ŋarrakala, ga bäyŋu mari ŋula nhä. 19 Yurru ŋunhi wiripu-guḻku' Djuws ŋunhi Yaytjapuyŋu walala marrtjina, bala dhunupana ŋayathaŋalana ŋarranha ŋurrumiriwŋurana yana, nhämiriwŋurana. Ŋuli walala nhäŋala ŋarranha ŋula yätjlilinydja djämalili, walalanydja yurru ŋunhiyi walala walalawuy marrtji, ga ḻakarama nhuŋu dhiyala. 20 Ga dhiyaŋu walalay wiripunydja, walala ŋarranha yukurrana dhä-wirrka'yurruna ŋunhala Djurutjalam. Ŋuli walala maḻŋ'maraŋala yätjtja ŋarrakala, walalana yurru dhiyaŋuna walalay ḻakaramanydja nhuŋu nhä ŋarra djäma yätjkuŋala. Bäyŋu warray walala maḻŋ'maraŋala yätjtja ŋarrakala. 21 Yurru dhiyaku warray mak waŋganygu warray yulŋunydja walala gäŋalanydja ŋarranha dhipalayi, ŋunhi ŋarra waŋana walalaŋgala bitjarra, ‘Nhuma yukurra dhä-wirrka'yundja ŋarranha dhuwala gäthura, liŋgu ŋarra yukurra märr-yuwalkthirri, ŋunhi rakunydja yurru yolŋu biyapul walŋathirri moluŋuru.’ ” Bitjarrayina ŋayi yukurrana Bolyu ḻakaraŋalanydja Belikkala.

22 Ŋuriŋi Belikthu yukurrana ŋäkula ŋäthilinydja ŋunhi Garraywalaŋuwuynydja Rombuy, bala ŋayi bitjarrana waŋana. “Liŋguna dhuwala. Yalalana ŋarra nhuna yurru biyapulnydja dhä-wirrka'yun, ŋunhi ŋayi yurru ŋurruŋu ŋunhi Latjiya buna. Ŋulinyaramirriyuna ŋarra yurru romdja nherraṉ nhuŋu.”

23 Bala ŋayi waŋana bitjarra ŋurikala ḻoḻu-djäkamirriwalanydja, “Gatjuy märraŋana ŋanya, ga galkala balayina ŋunha ḻoḻulili. Nhäŋayi yukirriya yana yolŋunydja ŋanya dhipali, yurru manymak warray nhanukalaŋuwu ŋula ḻundu'mirriŋuwunydja, märr yurru walala nhäma ŋanya, ga ŋatha ŋula nhä gäma nhanŋu.”

24 Yo, ŋayinydja ŋunhi Bolnydja gulŋiyina yukurrana ḻoḻuŋura ŋula nhämunha' munha', bala ŋayinydja ŋanya withiyarana ŋuriŋiyi ŋurruŋuyu yäkuyu Belikthunydja ga nhanukala miyalkthu Durutjilayunydja yäkuyu, yurru ŋayinydja ŋunhi miyalktja ŋunhiyi Djuw bäpurru. Ŋayi Belikthu djuy'yurruna Bolwunydja garr'yunarawuna, bala ŋayi marrtjina Bolnydja, bala ḻakaraŋalana ŋayi yukurrana ŋanya Djesu-Christnhana, märr yurru maṉḏanydja bitjandhi liŋgu märr-yuwalkthirri ŋanya Djesunha.

Bala maṉḏa yukurrana ŋäkulana ŋanya ŋunhi Bolnha dhäruktja, 25 yana liŋgu ga waŋana ŋayi maṉḏanha bitjarrana, “Nhuma yurru nhina rom-dhunupayirri yana. Yaka malthurra nhumalaŋgalaŋunydja nhuma djälwu yana, liŋgu yalalaŋumirriyunydja nhuma yurru dhärra yukurra Godkala gumurrŋura mala-yarr'yunarawuna.” Bala ŋayinydja ŋunhi Beliktja beyaṉiyinana wirrkina, ŋunhi ŋayi ŋäkula ŋunhiyi dhäruktja, bala waŋana ŋayi bitjarrana, “Gatjuy liŋguna. Marrtjiyana nhe gatjuy. Yalalana ŋarra nhuŋu boŋgama djuy'yurrunydja,” bitjarrana ŋayinydja. 26 Liŋgu ŋayinydja ŋunhi Belikthunydja guyaŋina gatjpu'yurruna yanapi Bolyu wekanha nhanŋu rrupiya, märr yurru ŋayi marrtji yänana, dhayaḻana-wala. Bala ŋayi ŋuli bitjanana liŋguna gawaw'yunanydja yukurranha nhanŋu Bolwu waŋanhaminyarawunydja.

27 Ga weyinŋumirrina ŋayi yukurrana Bol gulŋiyinanydja ŋunhiliyi ḻoḻuŋuranydja, märrma'na dhuŋgarranydja ŋupara. Yaka ŋanya ŋuriŋiyi ŋurruŋuyunydja djuy'yurruna yänanydja; yana ŋayi yukurrana ŋanya ŋunhi murr'maraŋalana bitjarrana liŋgu yolŋunydja, märr yurru walala ŋanya ŋuriŋi wiripu-guḻku'yunydja yolŋu'-yulŋuyu Djuwsthu bäpurru'yu ḻatju'-ḻakarama ŋunhiyi ŋurruŋunha Beliknha. Yo, nhinananydja ŋayi yukurrana Bol ŋunhiliyi ḻoḻuŋura weyinŋumirrina, yana liŋgu ga yuṯana ŋurruŋu ŋuriki wäŋawu buŋgawa bunana, Botja-Bitjthana yäku; ŋayina ŋunhiyina Bitjthana wapthurruna Belikkalanydja dharapullili.