1 Yo, dhuwalanydja yuwalknha wal'ŋu dhäruk ŋunhi ŋuli yolŋu'-yulŋuyu yukurranha ḻakaranha, balanyara gam', “Ŋunhi ŋuli yolŋu ḏukṯukthirri ŋayi yurru ŋurruŋulili wapthun Godkalaŋumirriwu miṯtjiwu, ŋunhiyinydja manymak warray, yaka yätj; manymaknha yolŋuwu ŋunhiyinydja ŋayi yurru djäka yukurra yolŋu'-yulŋuwu bitjan ŋuthanmarama Godkalaŋuwu romgu.” 2 Yurru ŋunhiyinydja yolŋu ŋunhi ŋayi ŋurruŋu Godkalaŋumirriwu yolŋu'-yulŋuwu, ŋayinydja yurru balanyara yolŋunydja gam': Ŋayi yurru nhina yukurra ŋamathama dhika wal'ŋu, märr yurru yakana ŋula yolthu maḻŋ'marama nhanukala yätjtja ŋula nhä. Ŋayi yurru nhina yukurra waŋganygalaŋumirri yana miyalkkalaŋumirrinydja, nhanŋuway miyalk ŋunhi, ga yaka yurru ŋayi malthun yukurra ŋuriki nhanukiyingalaŋunydja ŋayi djälwu; ŋayi yurru yana gulmaranhamirri ŋanyapinyay ŋayi yätjŋurunydja malaŋuŋuru. Guyaŋirri ŋayi yurru dhunupakuma yana, ga yaka yurru ŋayi djäma ŋula nhä wakalliliyamanydja. Ŋayi yurru gumurr-ŋamathirri märramanydja yolŋunha mulkurunhanydja ŋunhi nhanukiyingalay ŋayi wäŋalili, bäyyi ŋunhi yakanydja nhanŋu gurruṯu'mirri galkiwuy. Ga bitjandhi bili ŋayi yurru warraŋulkuma yana maḻŋ'marama ḻakaramanydja Godku dhäruktja, marŋgikumanydja marrtji yolŋu'-yulŋunha. 3 Ŋunhiyi ŋurruŋunydja yolŋu yurru yakana leŋunydja yukurra ŋänitji'yunydja, ga yakana ŋayi yurru ŋula mari djäma buma yukurra, ga ŋarrtjun wiripuŋunha yolŋunha maḏakarritjthunydja dhärukthu yakana; yana ŋayi yurru mundhurrthirri dhika wal'ŋu gäma marrtji yolŋu'-yulŋunha wurrkurrum' yana bala, yakana ŋayi yurru waḏutja maḏakarritjthirri. Yakana ŋayi yurru djäl-ḏumurru rrupiyawu ga girri'wu ŋula nhäku. 4 Bitjan liŋgu ŋayi yurru yukurra djäka nhanukiyingalaŋuwu ŋayi galkiwuywu gurruṯu'mirriwu, märr nhanŋuway yurru wäŋa djingaryun ḻatju' dhika wurrkurrum' marimiriw nhämiriw, liŋgu ŋuriŋi yumurrku'yunydja nhanukala yukurra dhäruk märrama ŋanyana, märr-ŋal'yunna nhanukala. 5 Ŋuli nhanŋu yurru ŋurikiyi wäŋa yukurra djingaryun marimirrinydja dhirrkthirrktja, liŋgu ŋunhiyi ḏarramu yaka ŋayi marŋgi nhaltjan ŋayi yurru marŋgikuma yukurra nhanukalaŋu ŋayi galkiwuywu, märr yurru walala nhina waŋganyŋura yana marimiriw nhämiriw, yakana ŋayi yurru ŋunhiyi yolŋu djäka yukurra Godkalaŋumirriwunydja yolŋu'-yulŋuwu ŋamathama, märr yurru walalanydja yukurra nhina ŋamathama wal'ŋu dhika waŋganyŋura.

6 Ŋunhi ŋayi yurru yolŋu marrtji Garraywalanydja gali'lili wapthun, yakana ŋayi yurru waḏutjanydja yana ŋurruŋuyirri, ŋäthilinydja ŋayi yurru ŋuthan marrtji Godkala romŋura, ŋayipi ŋathili yurru, märr yurru ŋayi yaka ŋayipiyirri bathala ḻakaranhamirri. Ŋuli ŋayi yurru garrwarkunharamirrinydja ŋanyapinyay ŋayi, ŋayinydja yurru Godthunydja ŋanya murr'maramana yana, bitjarra ŋayi ŋäthili murr'maraŋala ŋunhiyi Mokuynha wal'ŋu.

7 Yo, Godkunydja yurru yolŋu ŋurruŋu nhina manymakkumana dhika wal'ŋu, ḏarrtjalk yana ŋula nhämiriw, märr yurru yakana ŋula yolthu maḻŋ'marama nhanukala yätjtja ŋula nhä, märr yurru yakana ŋanya ŋuriŋi yätjthunydja mokuyyunydja gaṯmarama ŋula nhäyu romdhu, bala galkinyamaramana.

8 Ga bitjandhi liŋgu yolŋu, ŋunhi ŋayi ŋuli wapthun Garraywala djämalili, ŋunhi dharraymirri ŋayi Godkalaŋuwu miṯtjiwu, ŋunhiyinydja yolŋu yurru nhina yukurra ŋamathamana wal'ŋu yanana. Yakana ŋayi yurru djäma ŋula nhä wakalkuma yana be djambatjthu dhärukthu waŋa; yuwalkkuma yana ŋayi yurru guŋga'yundja yolŋu'-yulŋunhanydja, ga yakana ŋayi yurru waŋanharamirri ga wiḏiyal gäma yolŋunha, gupa-waŋa ŋula nhaltjan. Yakana ŋayi djäl-ḏumurru ŋänitjiwu ŋula nhäkunydja ḻukanharawu, ga yakana ŋayi wanaŋa-ḏumurru rrupiyawu wo girri'wu ŋula nhäku. 9 Ŋayi yurru Godkala ŋuriŋiyi djämamirriyu yolŋuyu ŋayathama baṯ bitjan Godku yuwalktja wal'ŋu dhäwu' ŋunhi ŋilimurru yukurra märr-yuwalkthirri, ŋunhiyi bili dhäwu' ŋunhi ŋayi Godthu warraŋulkuŋala ŋilimurruŋgala maḻŋ'maraŋala. Yuwalknha wal'ŋu ŋayi yurru marrtjina-wala yana yulŋunydja nhanukalaynha dhukarrkurrunydja.

10 Yakana yurru birrka'mirrinydja wapthun, ŋäthilinydja ŋanya yurru nhäma yukurra gatjarr'yun, ga bäy yurru ŋayi ga rom-dhunupayirri nhumalaŋgala maŋutjiŋura, yurruna ŋanya nhuma yurru nherraṉdja ŋunhimala djämalilinydja. 11 Ga dhäykanydja nhanŋu ŋurikiyi yurru nhina yukurra ŋamathama dhika wal'ŋu, ga guyaŋirri ŋayi yurru ḻatju'kuma, yaka djarrpi'kumanydja, ga yaka yurru ŋayi djäma ŋula nhä wakalliliyamanydja. Yaka ŋayi yurru wiḏiyal gäma yukurra yätjtja dhäwu', ŋula yolnha gupa-waŋanydja, ga yaka ŋayi yurru yukurra malthun nhanukalayŋuwu djälwu yana. Ŋayi yurru ŋunhiyi miyalktja märr-yuwalkthinyaramirri yolŋunydja, märr yurru wiripu-gulku'yu yolŋuyu dharaŋan muka ŋanya, ŋunhi ŋayi yurru yukurra djäma ŋamathamanydja wal'ŋu nhä malanha. 12 Ga ŋunhinydja ŋayi yurru yukurra nhinanydja ŋunhiyi ḏarramu waŋganygalaŋumirri miyalkkalaŋumirrinydja, ŋurikalaŋumirri liŋgu, nhanŋuway miyalk ŋunhi. Ga bitjandhi liŋgu ŋayi yurru nhanŋuway yumurrku'nhanydja marŋgikuma marrtji ḻatju'kuma yana, bala ḏaḏawmarama yätjŋuru, märr yurru nhanŋu wäŋanydja ḻatju' dhika yana wapurarr, ga yumurrku' nhanŋu yurru nhina yukurra märr-ŋamathinyaramirri dhika wal'ŋu waŋganyŋura.

13 Yo, ŋunhi ŋayi yurru yolŋuyu djäma ḻatju'kumanydja dhikanydja Godku, yolŋuyunydja ŋanya yurru wiripuŋuyunydja ḻatju'-ḻakaramana nhäma, märr yurru ŋayi yukurra ḻakarama dharuktja Godku ŋula nhämiriwnha goramiriwnha, rum'rumdhunamiriwnha yana, liŋgu wirrkina ŋayi yurru ŋunhiyi yolŋu märr-yuwalkthirri yukurra Djesu-Christkala.

14-15 Dimithi ŋarranydja yukurra dhuwala gatjpu'yunna yulŋunydja, galki ŋarra boŋgama marrtji dhipali, withiyurruna nhuna, yurru mak ŋarranha yurru gulmarama ŋula nhäyu gandarrŋuranydja. Yurru ŋarra wukirrina yukurra dhuwala yulŋunydja dhäruktja nhuŋu djorra'lilina, märr yurru nhe marŋgiyirri, nhaltjan yurru Godku ŋunhi yolŋu walala miṯtji nhina yukurra ŋamathama. Liŋgu Godkunydja miṯtji yolŋunydja walala dhuwala balanyara bitjan rumbalnydja nhanŋuna Godkuna, ŋunhi ŋayinydja dhuwala walŋa-ḏikṯik yana. Yo, ŋilimurrunydja dhuwala Godkunydja yolŋu walala ŋuli garrwarkuma ŋal'marama Godkunydja yuwalk rom, märr yurru ŋayi marrtjina-wala yana, bitjanna liŋguna yurru.

16 Yo, yuwalk dhuwala yulŋunydja. Godkunydja rom biyapul wal'ŋu garrwar ga dharrpal, yakana yurru yolŋuyu maḻŋ'maramanydja marrtji ŋuriŋi nhanukalay ŋayi be djambatjthunydja guyaŋinyarayu, yurru ŋayi Godthunydja liŋguna ŋunhi maḻŋ'maraŋalana ŋuliwitjarra Djesu-Christkalaŋukurruna. Wiripunydja ŋilimurru ŋuli ḻakarama ŋanya Christnha manikaykurru bitjan.