1 Àmànuhu umututukahy kar hezà'à.

Nuzawy kwaw hepuxi'a wi ipor wer ma'e.

2 Ezeapyaka katu Tupàn ize'eg iànoànogaw rehe nehe.

Einu iànoànogaw izuru wi uhem ma'e nehe.

3 Omomor iweraw haw ywak nànàn,

Ywy nànàn heityityk pà no.

4 Na'e teko wenu ize'eg ikororo mehe wà.

Wenu àmàn iànoànogaw wà no.

A'e 'ar mehe we iweraw haw nupytu'u kwaw u'ar ire.

5 Tupàn wànoànog uze'eg ikatuahy ma'e pupe.

Uzapo ma'e uhua'u ma'e. Nazapuner kwaw a'e ma'e ikwaw paw rehe.

6 Tupàn umugyr kar àmàntàtà ywy rehe.

Umugyr kar àmànuhu no.

7 Nezewe mehe teko upyta wàpuz me uma'ereko 'ym pà wà.

Nezewe mehe wexak kar a'e ma'e iapo har romo weko haw purupe.

8 Miar wixe uker haw pe wà.

Uzeàmim a'e pe wà.

9 Àmànuhu ywytu inuromo har ur kwarahy ihemaw awyze har kutyr har wi.

Tuixàgaw ur kwarahy heixe haw awyze har kutyr har wi.

10 Tupàn purupy haw umuàtà 'y.

Nezewe mehe 'y tàtà upyk yryhu.

11 Tupàn umynehem ywàkun 'y pupe.

Na'e ywàkun omomor uweraw haw no.

12 Ywàkun weruzar Tupàn ze'eg.

Uhàuhàz ywak rehe.

Uzapo Tupàn hemiapo karer wà,

Ywak nànàn, ywy nànàn no.

13 Tupàn umugyr kar àmàn ywy rehe

Zanerehe uzepyk pà.

Umugyr kar àmàn ywy rehe zaneamutar haw hexak kar pà zanewe no.

14 Izo. Epytu'u nezeapyaka pà nehe kury.

Nema'enukwaw ikatuahy ma'e Tupàn hemimutar rehe nehe.

15 Aipo erekwaw Tupàn hemiapo. Uze'eg a'e.

Na'e iweraw haw uhem ywàkun wi uhyape katu pà.

16 Ywàkun uzeaiko ywak rehe. Aipo erekwaw wamuzeaiko haw.

Tupàn ukwaw katu ma'e paw rupi a'e. Xixak ywàkun izeaiko haw zane. A'e rupi xikwaw Tupàn ikàgaw.

17 Ywytu kwarahy ihemaw awyze har kutyr har wi ur ma'e werur ywyxig tetea'u a'e. Tur 'ym mehe nerakuahy nekamir pupe.

Nerepuner kwaw nehemaw rehe a'e ywytu ywyxig inuromo har wi.

18 Nanekàg kwaw ne. Aipo erepuner Tupàn ipytywà haw rehe ywak imuzaiko haw rehe ne,

Imuàtà mehe ita imumew pyrer ài ne.

19 Uremu'e pe izupe ureze'eg àwàm rehe nehe.

Ta'e nurupuner kwaw ma'e rehe urema'enukwaw katu haw rehe xe.

20 Akyze Tupàn wi. A'e rupi naze'egahy kwaw izupe. Namume'u kwaw hemiawy kwer izupe.

Nezewe haw iapo haw nuzawy kwaw hemumaw pàwàm henoz taw.

21 Aze ywàkun upyk kwarahy, nazapuner kwaw hexakaw rehe.

Aze ywytu ur ywak imukatu pà, Uhyape wi kwarahy.

22 Kwarahy heixe haw awyze har kutyr har rehe xixak tatainy or hexakaw hereko har.

Tupàn ipuràgeteahy haw ipuner haw inuromo har zanemynehem a'e. Xixak tuwe ikatu haw.

23 Nazapuner kwaw Tupàn upuner wera'u ma'e ikwaw paw rehe.

Uhua'u ipuner haw.

Ikatuahy haw nupaw pixik kwaw.

Nuzuka kwaw teko wà.

24 A'e rupi teko ukyze izuwi wà.

— Aiko ma'e kwaw katu har romo ihe, aze amo i'i, Tupàn nuzekaiw kwaw hehe.